Ti čar Lâm Đồng, 3 êlan dơ̆ng êran pral phŭn ala čar dôk dưi pŏk ngă mjêč.  Êlan dơ̆ng êran pral Tân Phú – Bảo Lộc, hlue si hdră bi hgŭm knŭk kna êngao knŭk kna, mâo boh taih 66km, hlăm anăn mâo kdrêč găn čar Lâm Đồng taih 55km, mphŭn rŭ mdơ̆ng hruê 19/ 12/ 2025.

  Bruă ruh mgaih anôk ala dưi pŏk ngă mơ̆ng mlan 10 thŭn 2025. Truh ară anei, alŭ wăl bi mklă hdră msir tla hnô kơ 590/ 898 gŏ êsei hmăi djŏ. Hŏng hdră bruă êlan dơ̆ng êran pral Dưr - Dhŭng nah Yŭ, kdrêč Gia Nghĩa – Chơn Thành mâo boh taih 129km, hlăm anăn mâo kdrêč găn čar Lâm Đồng taih êbeh 23 km mâo leh 135/ 152 gŏ êsei mnuih ƀuôn sang bi mklă hdră tla, mĭn tĭng bi leh hlăm mlan  1/ 2026. Hŏng êlañ dơ̆ng êran pral Bảo Lộc – Liên Khương, taih 74km, mâo leh 2.347 hră mơar/ 2.464 hră mơar bi mklă tla prăk. Dlăng kluôm jih 3 hdră bruă, ênoh hră mơar tla hnô ruh mgaih anôk ala dưi bi mklă tla mâo leh êbeh 87%.