Hruê mgi (9/10), Klei bi kƀĭn phung bi ala Bruă Đảng čar Lâm Đồng tal I, wưng 2025 – 2030 srăng klă sĭt mkŏ mjing. Ti Đà Lạt, anôk mkŏ mjing klei bi kƀĭn leh anăn anôk phŭn dŭm čar Dak Nông, Bình Thuận hđăp jăk siam lu hla čhiăm gru, mnga bi êdah ai êwa mrâo kkuh drông klei bi kƀĭn.

Klei bi kƀĭn phung bi ala bruă Đảng čar Lâm Đòong tal I, wưng 2025 – 2030 jing klei bi kƀĭn kđi čar yuôm bhăn kruăk klei bi hgŭm sa anăn tlâo čar Dak Nông, Bình Thuận leh anăn Lâm Đồng, ba čar prŏng hĭn kluôm ala mŭt hlăm wưng đĭ kyar kluôm leh anăn kjăp. Nguyễn Khắc Bình, Khua adŭ bruă Đảng čar Lâm Đồng, brei thâo: Hră mơar Klei bi kƀĭn phung bi ala bruă Đảng čar Lâm Đồng tal I, wưng  2025 – 2030 dưi mprăp leh jăk. Klei hưn mdah kđi čar mă leh klei blŭ mguôp mơ̆ng bruă mặt trận čar kwar leh anăn dŭm êpul bruă kđi čar, ala ƀuôn; klei blŭ mguôp hlăm klei bi kƀĭn 128 bruă đảng, êpul bruă đảng hlăm bruă Đảng čar; mkŏ mjing klei bi trông kreh knhâo hgŭm, tă hdră mđĭ kyar, mbĭt anăn mă klei blŭ mguôp gĭt gai mơ̆ng Êpul mă bruă Phŭn bruă kđi čar. Bruă mprăp kơ klei bi kƀĭn mâo čar Lâm Đồng mprăp bi leh.