Tui si phung knuă druh, đảng viên lehanăn mnuih ƀuôn sang ti Lăn dap kngư – Ktue hang ksĭ kwar krah, klei yuôm bhăn hĭn jing, leh klei bi kƀĭn prŏng Đảng 14 jing bruă mkŏ mjing hlue ngă hdră mtrŭn bi pral, jih ai tiê lehanăn klă mngač. Bùi Viết Tiệm, dôk ti êpul mrô 7, ƀuôn hgŭm Chư Sê, čar Gia Lai lač, jih jang dŭm hdră êlan prŏng klă sĭt mâo nao hlăm klei hdĭp, tơdah mâo bi êdah hŏng dŭm mta bruă tơl mnuih ƀuôn sang ƀuh jing sĭt kơh:

“Dŭm phŭn dhar bruă bi pral ksiêm dlăng, mlih mrâo dŭm klei čoh čuăn ăt dôk mđĭ mđal, bi kpăk kơ bruă mđĭ kyar, lehanăn mtrŭn kơ dŭm klei ktrâo atăt klă mngač, čiăng kơ alŭ wăl bi sa ai hlue ngă. Djăp alŭ wăl hlue ngă hdră mtrŭn hŏng dŭm mta bruă brei mnuih ƀuôn sang ƀuh, lehanăn thâo săng. Mơ̆ng klei bi mlih hdră mă bruă, mđĭ hnơ̆ng kjăp klei mă bruă kơ mnuih ƀuôn sang, truh kơ bruă mjing klei duah ƀơ̆ng kjăp, lehanăn mđĭ hnơ̆ng hrui wĭt kơ mnuih ƀuôn sang.”

Tui si phung duh mkra thâo ƀuh, Nguyễn Thị Diễm Kiều, sa čô pô duh mkra ti ƀuôn hgŭm Đắk Đoa, čar Gia Lai bi êdah klei čang hmăng leh klei bi kƀĭn prŏng Đảng 14, djăp alŭ wăl srăng mâo dŭm hdră êlan klă mngač hĭn kơ phung duh mkra, boh nik bruă ba yua klei kreh knhâo - kdrăp mrâo, lehanăn klei bi mlih mrô:

“Kâo čang hmăng leh klei bi kƀĭn prŏng, snăn čar srăng mâo dŭm hdră êlan jăk truh hŏng phung duh mkra, boh nik bruă ba yua klei kreh knhâo, kdrăp mrâo, mâo dŭm klei đru duh bi liê kơ kdrăp mrâo, đru mjuăt bi hriăm kơ mnuih mă bruă kơ kdrăp mrâo. Ăt čang hmăng kơ knŭk kna srăng đru thiăm kơ phung duh mkra dưi dưn klei mnia mblei hlue hŏng điện hŏng k’hưm kjăp čiăng kơ phung duh mkra jih ai tiê leh mă bruă, dưi bi ktưn hlăm klei mnia mblei, amâo mâo lĕ hlăm klei phung mplư bi mčhua.”

Ti dŭm alŭ wăl krĭng taih kbưi, krĭng mnuih djuê ƀiă, čang hmăng prŏng hĭn leh klei bi kƀĭn prŏng Đảng 14, jing mâo klei mđing uêñ klă hĭn, djŏ hŏng klei hdĭp mnuih ƀuôn sang sĭt.  Hmên, djuê ana Ba Na ti ƀuôn Tuơh Ktu, ƀuôn hgŭm Đak Đoa, čar Gia Lai lač:

“Kâo đăo knang anăp anei Đảng knŭk kna lŏ dơ̆ng mđing lu hĭn, kiă kriê lăn čar kjăp hĭn, mnuih ƀuôn sang sa ai tiê mbĭt. Đảng mâo dŭm hdră êlan djŏ guôp čiăng kơ lăn čar knư̆ hrue knư̆ mâo klei đĭ kyar kjăp.”

Tui si H’ Hương B.Krông, dôk ti ƀuôn hgŭm Ea Kao, čar Daklak, klei bi kƀĭn prŏng Đảng 14 mâo leh klei čoh čuăn kơ phung knuă druh klă sĭt jĕ giăm mnuih ƀuôn sang, thâo săng kơ mnuih ƀuôn sang, mđing hmư̆, lehanăn mghaih msir bi pral jih jang bruă mơ̆ng nah gŭ.

“Čăng hmăng hŏng grăp čô mnuih djă hlăm dŭm bruă kiă kriê, mđĭ hĭn bruă klam pô, păn kjăp jih boh klei, mđing hmư̆, lehanăn rơ̆ng klei tŭ dưn, klei mnuih ƀuôn sang čang hmăng.

 Tui si Võ Chí Vương, Khua knơ̆ng bruă kiă kriê bruă knuă čar Khánh Hòa, čiăng bi djŏ hŏng dŭm hdră êlan kjăp, lehanăn klei čang hmăng prŏng mơ̆ng klei bi kƀĭn prŏng Đảng 14, čiăng bi mâo phung knuă druh mnuih mă bruă jing phung kjăp thâo bruă. Ngă tŭ jing jih jang bruă hŏng mnuih ƀuôn sang, hŏng phung duh mkra, anăn yơh jing ênoh čuăn yuôm bhăn pioh mkă hnơ̆ng mơ̆ng anôk bruă knŭk kna kiă kriê:

“Kơ bruă knuă druh, hlăm boh klei mrâo mrang ară anei, hlăm dŭm hdră năng mđing jing: Lŏ dơ̆ng mđĭ klei thâo hlăm mnuih mă bruă, êjai klei dăp bi khuăt êpul mă bruă, mă bruă hŏng klei tŭ dưn, mlih mrâo sĭt hlăm klei hrŏng ruah, dăp mnuih, ba yua knuă druh djŏ anôk djŏ bruă, mbĭt anăn mđing mjuăt bi hriăm phung knuă druh, mnuih mă bruă, bi năng hŏng bruă knuă wưng ară anei.”

Mơ̆ng boh sĭt dôk găn ti Lăn dap kngư - Krĭng ktue hang ksĭ kwar krah brei ƀuh, klei čang hmăng prŏng hĭn leh klei bi kƀĭn prŏng Đảng không amâo mâo djŏ knŏng jing kơ hdră êlan kluôm đuič ôh, ƀiădah brei nâo hlăm bruă knuă mă klă mngač, lehanăn mă bruă hŏng klei tŭ dưn. Tơdah leh bruă knuă mơ̆ng knŭk kna mâo ngă, jih jang dŭm phŭn dhar bruă, lehanăn alŭ wăl bi krăp mă bruă msĕ, hŏng jih ai tiê, dlăng kơ mnuih ƀuôn sang, lehanăn phung duh mkra jing knơ̆ng, snăn klei tŭ dưn mơ̆ng klei bi kƀĭn prŏng Đảng 14 klă sĭt mâo klei tŭ dưn lehanăn nao hlăm klei hdĭp sĭt êmĭt hĭn, mjing boh kdrŭt kơ lăn čar mâo klei đĭ kyar pral lehanăn kjăp hlăm wưng ênuk mrâo./.