Leh 40 thŭn mlih mrâo, dŭm boh tŭ dưn prŏng, klei yuôm bhăn hƀuê ênuk kơ klei đĭ kyar bruă duh mkra- ala ƀuôn, rơ̆ng kjăp kđi čar, rơ̆ng êđăp ênang lĭng kahan leh anăn ñŭ kma hŏng tač êngao êlam mjing leh tur knơ̆ng kjăp, mđĭ klei đăo knang yang ƀuôn hŏng Đảng. Boh sĭt ti Lăn Dap Kngư jing klei bi mklă jăk kơ êlan djŏ klă anăn. Mnuih ƀuôn sang krĭng djuê ƀiă čang hmăng hŏng klei tŭ jing mơ̆ng klei bi kƀĭn  tal 14, dŭm hdră êlan mâo hnơ̆ng kluôm sui srăng dưi pŏk ngă pral. Ayŏng Y Sắc Ly Arul, ti ƀuôn hgŭm Ƀuôn Ama Thuôt, čar Dak Lak bi êdah klei čang hmăng, hdră êlan yuôm bhăn mơ̆ng Đảng srăng hnưm dưi hlue ngă klă klơ̆ng, mjing klei bi mlih klă mngač hlăm klei mđĭ kyar bruă duh mkra ala ƀuôn, boh nik hŏng krĭng mnuih ƀuôn sang djuê ƀiă.

 “Kâo čang hmăng Đảng leh anăn Knŭk kna lŏ dơ̆ng mđing uêñ lu hĭn kơ mnuih djuê ƀiă, hlăm anăn mâo mnuih Êđê hmei; kâo mđing uêñ kơ bruă kriê pioh leh anăn mđĭ lar knhuah dhar kreh djuê ana, mguôp hŏng mđĭ kyar hiu čhưn ênguê, čiăng kơ klei hdĭp mnuih ƀuôn sang ƀrư̆ dưi mđĭ.”

Hlăm dŭm thŭn êgao, klei mđing uêñ mơ̆ng Đảng leh anăn Knŭk kna bi mklă hlăm dŭm hdră êlan djŏ klă mjing leh klei jăk siam hlăm klei hdĭ mnuih djuê ƀiă. Mơ̆ng anôk bruă êlan klông nah gŭ, sang hră, mdrao mgŭn truh kơ klei đru mkra mjing, bi hrŏ ƀun kjăp, kriê pioh knhuah dhar kreh… lu hdră êlan mâo leh hlăm klei hdĭp, ba klei tŭ dưn klă mngač, mâo mnuih ƀuôn sang sa ai. Hlăm klei mơak tŭ jing kơ Klei bi kƀĭn tal 12, Hmên, mnuih ƀuôn sang ƀuôn Tuơh Ktu, să Đak Đoa, čar Gia Lai brei thâo:

 “Kâo ƀuh mơak snăk, tŭ ư kyua klei Knŭk kna gĭt gai mđing ba hdră êlan yuôm bhăn, boh nik dŭm hdră êlan kơ krĭng mnuih djuê ƀiă, đru leh djăp mta kơ mnuih ƀuôn sang hmei. Kâo đăo knang: anăp anei Đảng Knŭk kna lŏ dơ̆ng mđing, lŏ dơ̆ng gĭt gai lăn čar gĭr ktưn, mnuih ƀuôn sang sa ai tiê. Đảng srăng mâo hdră êlan djŏ guôp čiăng lăn čar ƀrư̆ hruê đĭ kyar kjăp ktang hĭn”.

Mơ̆ng boh sĭt klei hdĭp, knuă druh, đảng viên leh anăn mnuih ƀuôn sang dŭm čar Lăn Dap Kngư - Dhŭng kwar Krah đăo knang Đảng lŏ dơ̆ng bi leh hdră êlan djuê ana hlue si hdră mđĭ lar klei găl, mă mnuih ƀuôn sang jing phŭn hlăm hdră mđĭ kyar, mơ̆ng mđĭ kyar hiu čhưn ênguê êpul êya truh kơ mđĭ bi liê anôk bruă nah gŭ, rơ̆ng klei duh ƀơ̆ng kjăp ti anăp klei bi mlih yan adiê. Rơ Châm H’Yéo, Khua Knơ̆ng bruă mặt trận čar kwar Việt Nam čar Gia Lai bi mklă, klei đăo knang hlăm Đảng dưi ksul mbŭ hlăm lu gưl ênuk leh anăn ară anei lŏ dơ̆ng dưi mđĭ lar:

 “Mnuih ƀuôn sang Lăn Dap Kngư sa ai tiê tui hlue Đảng, tui hlue Awa Hồ. Čang hmăng Đảng lŏ dơ̆ng mđing uêñ, mjing klei găl kơ Lăn Dap Kngư mđĭ kyar bruă duh mkra, dhar kreh, mtô bi hriăm, hŏng klei mkŏ mjing Lăn Dap Kngư mdrŏng sah kơ bruă duh mkra, mdrŏng kơ klei thâo.”