Kkuh drông Klei bi kƀĭn phung bi ala kluôm ala tal XIV mơ̆ng Đảng, mơ̆ng knhal jih mlan 12/2025, čar Khánh Hòa mkŏ mjing klei mphŭn rŭ mdơ̆ng, mphŭn ba yua 5 hdră bruă prŏng. Bruă duh mkra ala ƀuôn mơ̆ng čar ăt lŏ dơ̆ng mkra mđĭ hlăm hnơ̆ng đĭ kyar thŭn 2025, mjing klei bi mlih klă mngač kơ klei hdĭp mda ala ƀuôn leh yan adiê ngă. Ti să Thuận Bắc, čar Khánh Hòa, lu gŏ êsei lŏ dơ̆ng gĭr ktưn tlaih ƀun kjăp, jhŏng ngă bruă, mkŏ mjing klei hdĭp mda hơĭt kjăp, trei mđao hĭn. Chamaléa Thị Điêm, djuê ana Raglay, ti alŭ Đá Mài Dưới, să Thuận Bắc brei thâo:

“Mđing kơ Klei bi kƀĭn XIV mơ̆ng Đảng, mnuih ƀuôn sang hmei đăo knang leh anăn čang hmăng phung bi ala lŏ dơ̆ng pioh klei mđing uêñ êlam kơ krĭng mnuih djuê ƀiă, bi leh Hră čih Hră hưn mdah kđi čar hlue si hdră giăm hŏng boh sĭt, bi liê djŏ boh phŭn, djŏ mnuih. Mơ̆ng anăn, kơrŭ wĭt ktang hĭn klei čang hmăng čŏng ngă, ai tiê bi hgŭm, gĭr ktưn mnuih ƀuôn sang, čiăng kơ mnuih djuê ƀiă amâo djŏ knŏng tlaih ƀun ôh ƀiădah lŏ đru mguôp jăk hlăm klei đĭ kyar mbĭt mơ̆ng lăn čar.”

 Nao hlăm Klei bi kƀĭn phung bi ala kluôm ala tal XIV mơ̆ng Đảng, bruă Đảng čar Khánh Hòa mâo 32 čô bi ala. Ai tiê đua klam phung bi ala bi êdah klă mngač hlăm hdră mprăp nao hlăm Klei bi kƀĭn. Klei blŭ mguôp phung knuă druh, đảng viên lehh anăn mnuih ƀuôn sang hlăm čar Khánh Hòa hŏng Hră čih Hră mơar Klei bi kƀĭn dưi ksiêm dlăng, mơĭt kơ Gưl dlông mơ̆ng hnưm. Phung bi ala pioh lu mmông ksiêm dlăng bi nik hră čih, čiăng dưi bi trông tŭ dưn. K’iăng nai prŏng, nai prĭn Phan Quốc Anh, nai mtô Sang hră gưl prŏng Văn Lang, bi ala kơ Êpul čar Khánh Hòa nao hlăm Klei bi kƀĭn tal XIV brei thâo:

“Kâo sa ai hŏng hră čih Hdră mtrŭn tal anei leh Đảng lŏ dơ̆ng bi mklă mđĭ kyar dhar kreh hrăm mbĭt hŏng mđĭ kyar bruă duh mkra. Hră čih mñă klă mđĭ kyar bruă dhar kreh, mkŏ mjing ênoh yuôm ala čar, dhar kreh anak mnuih leh anăn gŏ sang; dlăng bruă duh mkra mnơ̆ng kriê pioh, dhar kreh jing klei găl yuôm bhăn kơ klei đĭ kyar.  Mơ̆ng ai tiê đua klam phung bi ala, kâo srăng gĭr đru mguôp klei blŭ hlăm hră čih hră mơar, hdră ngă bruă.”

Hlue si Nghiêm Xuân Thành, Khua dlăng bruă Đảng čar, Khua êpul bi ala bruă Đảng čar Khánh Hòa, grăp čô bi ala hlăm êpul srăng mđĭ lar ai tiê đua klam, đru mguôp klei blŭ mơ̆ng tur knơ̆ng ksiêm dlăng boh sĭt mđĭ kyar mơ̆ng alŭ wăl leh anăn kluôm ala. Boh nik, srăng kƀĭn hlăm bruă čar bi mklă leh mơ̆ng boh sĭt:

Hŏng čar Khánh Hòa, čar ngă leh, leh anăn dôk ksiêm dlăng, kčĕ klei bhiăn,hdră êlan amâo djŏ knŏng hlăm bruă ba yua ôh ƀiădah mđing kơ klei kriê dlăng êa ksĭ mtah. Boh phŭn jing mđĭ kyar hiu čhưn ênguê, hdră bruă, bruă lŏ hma yua kdrăp mrâo, boh nik rông kan hdang yua kdrăp mrâo, mđĭ kyar hdră bruă logistics leh anăn bruă tuh tia mkra mjing êa ksĭ. Mbĭt anăn, čar srăng mguôp klei blŭ bi leh klei bhiăn, hdră êlan ti hnơ̆ng ala čar kñăm ba yua jih klei găl  mđĭ kyar bruă duh mkra êa ksĭ hlăm dŭm alŭ wăl mâo klei găl, mơ̆ng anăn đru mguôp jăk hlăm klei đĭ kyar mbĭt mơ̆ng lăn čar.”

Mơ̆ng boh sĭt mđĭ kyar jăk siam mơ̆ng alŭ wăl, boh nik dŭm boh tŭ hlăm klei kơrŭ wĭt bruă duh mkra- ala ƀuôn, kriê dlăng klei hdĭp mda yang ƀuôn leh anăn tă hdră mđĭ kyar hơĭt kjăp bruă duh mkra êa ksĭ, phung bi ala Khánh Hòa čang hmăng srăng đru mguôp klă sĭt hlăm bruă bi leh hdră êlan kluôm Klei bi kƀĭn. Dŭm klei blŭ mguôp jih ai tiê, đua klam anăn amâo djŏ knŏng bi êdah klei đăo knang phung knuă druh, đảng viên leh anăn mnuih ƀuôn sang Khánh Hòa hlăm klei tŭ jing mơ̆ng Klei bi kƀĭn tal XIV ôh, ƀiădah lŏ bi mklă klei gĭr hrăm mbĭt hŏng kluôm ala hlue ngă klei čang hmăng đĭ kyar pral, kjăp, mkŏ mjing lăn čar mdrŏng sah, jăk mơak hlăm wưng mrâo.