Aguah mbruê 27/1, Knơ̆ng gĭt gai lĭng kahan čar Gia Lai bi mguôp hŏng Bruă sang čư̆ êa să Ia Puč mkŏ mjing hdră “Yan mnga knông lăn - mđao ai tiê mnuih ƀuôn sang” thŭn 2026 hŏng lu mta bruă klă klơ̆ng mđing truh kơ mnuih ƀuôn sang krĭng knông lăn.

Hdră mâo klei mjĕ mjuk dhar kreh, klei kdŏ mmuñ, mđup brei mnơ̆ng kơ gŏ sang ƀun, Knŭk kna dlăng ba, gŏ sang dleh dlan, mkă dlăng klei ruă leh anăn mbha êa drao.

Dŭm anôk bruă, phung mâo ai tiê kmah mđup brei êbeh 800 hnư mnơ̆ng hŏng ênoh êbeh 600 êklăk prăk. Mbĭt anăn jing dŭm mta bruă nah êngao msĕ si anôk čhĭ mnơ̆ng ênoh 0 prăk, anôk čhĭ djam lĭng kahan knông lăn, Anôk hlăm lêñ leh anăn bi lông đŭng điŏ, mkŏ mjing ai êwa hơ̆k mơak, bi mguôp lĭng kahan - mnuih ƀuôn sang. Anei jing bruă grăp tuôr, đru ngă tŭ dưn hdră bi hơĭt klei hdĭp yang ƀuôn, đru kơ mnuih ƀuôn sang krĭng knông lăn drông tết.