Sang Đặng Thị Duy Hiền, ti alŭ Thành Nam, ƀuôn hgŭm Suối Dầu, čar Khánh Hòa klưh jih hlam gưl hjan prŏng leh êgao. Mâo klei đru mơ̆ng bruă sang čư̆ êa alŭ wăl, lehanăn lĭng kahan, sang Đặng Thị Duy Hiền dơ̆ng ru mdơ̆ng mrâo. bruă rŭ mdơ̆gn sang tuôm hŏng lu klei dleh dlan, kyua kƀah mnuih thâo rŭ mdơ̆ng, kƀah mnơ̆ng rŭ mdơ̆ng, lehanăn adiê kăn jăk rei. Ti anăp klei msĕ snăn, knuă druh, lĭng kahan mơ̆ng  Đại đội Trinh sát Cơ giới 1, mơ̆ng knơ̆ng bruă kahan čar Khánh Hòa pô ngă “hdră êlan Quang Trung” nao đru dŭ ba mnơ̆ng d–ơ̆ng pioh kơ bruă rŭ mdơ̆ng, đru bi mkra sang. Knŏng hlăm sa wưng bhiâo, sang mrâo dơ̆ng êdah, ba klei mơak lehanăn hơĭt ai tiê kơ Đặng Thị Duy Hiền.

“Mâo knŭk kna đru mdơ̆ng brei sang čiăng bi hơĭt anôk dôk anei. Kâo lač jăk kơ dŭm dhar bruă mâo đru leh kâo dưi mdơ̆ng sang êlâo kơ Tết nguyên đán. Lĭng kahan mă bruă năng ai truh 30% ênoh prăk mdơ̆ng sang, snăn lŏ blei thiăm mnơ̆ng mnua mkra hĕ bi jăk"”

Dŭm hrue êgao, hạ sĩ Nguyễn Hoài Nam, glăm Đại đội Trinh sát Cơ giới 1, mơ̆ng knơ̆ng bruă kahan čar Khánh Hòa, jih ai tiê mă bruă. Leh dŭ boh tâo, ñu lŏ trŭt êdeh dŭ simăng leh lŭk kơ ayŏng adei kliă atur sang.

“Adiê hlăm dŭm hrue anei hjan nanao, ƀiădah phung knuă druh, lĭng kahan ăt gĭr mă bruă čiăng bi leh sang tui si hdră kčah. Anăn jing bruă klam mơ̆ng hmei.”

        Sang kơ Lê Thị Đã, ti êpul anôk dôk mrô 1, ƀuôn hgŭm Đô Vinh, čar Khánh Hòa, hlăk dơ̆ng bi leh. Klei mơak êdah leh hlăm ƀô̆ mta mơ̆ng sa čô mniê mrâo găn klei luič liê prŏng hlăm gưl êa lip leh êgao. Võ Văn Tâm, anak êkei Lê Thị Đã bi êdah ai tiê pô leh ƀuh lĭng kahan hriê đru diñu lŏ mdơ̆ng pưk sang:

“Gưl êa lip prŏng leh êgao. Kyua mâo bruă sang čư̆ êa alŭ wăl, lehanăn   Trung đoàn 896 đru leh kơ gŏ sang hŏng jih ai tiê. Ară anei, sang dơ̆ng jing leh, hơĭt yơh.”

          Ngă “Hdră êlan Quang Trung” mâo khua knŭk kna mtrŭt mjhar, Knơ̆ng bruă lĭng kahan čar Khánh Hòa hgŭm hŏng dŭm êpul êya kahan krĭng 4 kahan êa, Lữ đoàn Đặc công mrô 5 mâo mkŏ mjing leh truh 70 êpul rŭ mdơ̆ng, hŏng giăm 1.150 čô knuă druh, lĭng kahan mbĭt hŏng kdrăp mă bruă, pral nao đru mnuih ƀuôn sang lŏ wĭt rŭ mdơ̆ng pưk sang leh klei êa lip.

        Amâo mâo djŏ knŏng mdơ̆ng pưk sang, lĭng kahan lŏ mdơ̆ng klei đăo knang kơ mnuih ƀuôn sang krĭng êa lip. Mơ̆ng dŭm klei klưh rai, klei luič liê kyua êa ngă, sa klei hdĭp mrâo hlăk lŏ dơ̆ng bluh đĭ hlăm ƀuôn sang Khánh Hòa – kjăp ai tiê hĭn, h'uh mđao hĭn, hlăm klei khăp lĭng kahan lehanăn mnuih ƀuôn sang./.