Hlăm mlam knhal jih thŭn adiê êăt, hlăm sang mâo phung lĭng kahan đru mkra mđĭ, khuăt, mđao, Trần Thị Ba, ti alŭ Phú Hậu, să Suối Hiệp, čar Khánh Hoà lŏ wĭt hdơr kơ mlam sa mlan êâo, êa đĭ pral, ñu mbĭt hŏng phung hlăm alŭ lĕ hlăm klei dleh dlan êdu. Mmong amâo thâo lŏ bĭt mjing, phung lĭng kahan hmao truh, đru dŏng ñu ti krah ling klei djiê:

“Kâo mĭn sang kâo djiê jih leh. Êa đĭ pral ka tuôm ƀuh. Kâo ur krao mơai, ƀuh phung lĭng kahan kâo hơ̆k mơak êdi. Kâo amâo dưi êbat ôh, brei diñu ƀă yơh.”

Hlăm anôk ngă bruă mơ̆ng hdră Quang Trung krŭ wĭt krĭng êa lip Khánh Hoà hruê anei, mâo kriê kngan ngă bruă mơ̆ng phung kahan êa krĭng 4. Êpul lĭng kahan dŭ brĭk, lŭk čuah rŭ mdơ̆ng sang đru kơ mnuih ƀuôn sang dŭm hruê kmhal jih thŭn drông tết anei, ăt jing êpul lĭng kahan knhăk hĭn, diñu đĭ mran găn êa lêč mâo hŏng anei 3 hruê kăm, đru dŏng mnuih ƀuôn sang. Khua knơ̆ng gĭt gai Nguyễn Anh Tuấn, khua gĭt gai krĭng 4 kahan êa brei thâo: mlam hruê 19/11, leh mâo asăp mtrŭn, knơ̆ng gĭt gai krĭng mâo asăp mtrŭn tiŏ nao kahan hlăm klei hjan prŏng, êa lêč bi ktlah, êpul mâo ƀô̆ mta ti dŭm anôk êa êngăp êlam hĭn. Hlăm wưng bhiâo, êbeh 5000 gưl čô knuă druh, lĭng kahan mbĭt hŏng 100 boh kdrăp yua dưi tiŏ nao, ngă klei đru dŏng, mbĕ đuĕ êbeh 5.400 čô nao ti anôk êđăp ênang, hlăm anăn mâo 6 čô hđeh ĭ leh anăn sa čô mniê dơ̆ng kkiêng. Khua knơ̆ng gĭt gai Nguyễn Anh Tuấn  brei thâo:

Êjai khua knơ̆ng kiă kriê mâo asăp mtrŭn 8 mmông hmei nao mtam, truh 9 mmông truh ti Diên Khánh. Hmei truh ti dŭm anôk êlam hĭn mơ̆ng ƀuôn, să, dŭm anôk mmông anăn amâo dưi truh ôh. Klei mñă kơ khua gĭt gai jing srăng nao mbĭt hŏng lĭng kahan. Ya dŏ anôk bruă mâo srăng ba đru mnuih ƀuôn sang jih.”

dŭm hdră êlan đru mdŏng dưi mkra mlih mbruă, hmao djŏ, bi hrŏ jih hnơ̆ng klei hmăi kơ anak mnuih hlăm wưng klei hjăn hlĭm êa lêč êgao hnơ̆ng mkă hŏng klei đăo tĭng. Ai tiê jing đru dŏng mnuih ƀuôn sang êlâo, hưn mdah êdei. Hlăm dua hruê 20 leh anăn 21/11, lĭng kahan mă leh 3 tôn lương khô, ba yua dŭm masin kar êa čiăng mkăp brei êa doh kơ mnuih ƀuôn sang anôk êa lip êlam. Êjai êa hrŏ, lĭng kahan dơ̆ng bi bi doh wăl hdĭp mda, bi hluh êlan klông, đru mkra wĭt sang dôk, sang hră mơar. Thiếu tá Nguyễn Công Trứ, Êpul công binh, sang hră Sĩ quan Không quân brei thâo:

          “Lĭng kahan êmiêt sang kơ mnuih ƀuôn sang, sang hră mơar brei phung hđeh nao sang hră. Truh kơ ară anei, kyua bruă ti êlan lu đei srăng yua wăt êdeh êdâo, hjan kngan mnuih amâo dưi ngă ôh. Anăn jing êdeh kčao, êdeh mdiăng… bi doh wăl hdĭp mda leh anăn bi hluh êlan kơ mnuih ƀuôn sang mâo klei găl êrô êbat.”

Amâo djŏ knŏng đru dŏng ti anăp, êpul lĭng kahan čar Khánh Hoà lŏ čŏng pô mkŏ mjing dŭm hdră êlan mkăp đru gang mkhư̆ klei yan adiê ngă, bi mguôp hriăm mjuăt, mâo hdră êlan đru dŏng, ksiêm dlăng êpul êya, êdeh êdâo, bruă nah tluôn đru hluê si grăp hnơ̆ng klei truh tơl, nao mbĭt hŏng klei čuăn krŭ wĭt hơĭt kjăp leh klei yan adiê ngă. Êpul gĭt gai lĭng kahan čar bi trông hŏng dŭm anôk bruă mơ̆ng Phŭn bruă lĭng kahan, kluôm čar tiŏ nao giăm 16.000 čô knuă druh, lĭng kahan, 238 boh êdeh, ngă klei mbĕ đuĕ 118.000 čô nao ti anôk êđăp ênang. Đại tá Nguyễn Túy, Khua knơ̆ng gĭt gai lĭng kahan čar Khánh Hoà mñă ktang:

“Srăng nao klă klơ̆ng grăp alŭ wăl, mbha êpul bruă, kdrăp yua găl guôp.  Mran, cano ya mta dưi nao truh ti anôk. Srăng đru dŏng mnuih tal êlâo, leh anăn ngă bruă mkăp brei mnơ̆ng ƀơ̆ng, êa mñăm kơ mnuih ƀuôn sang êjai êa hrŏ leh”.

Gưl yan adiê ngă mrâo êgao ngă truh klei hmăi kjham ti čar Khánh Hoà, hŏng 22 čô djiê, 20 čô êka, 89 boh klưh rai kluôm, 290 boh sang jhat rai. Ti anăp klei anăn, Khua bruă Đảng čar Khánh Hoà mñă kơ dŭm gưl bruă, dhar bruă ngă ktang phĭt 5 “srăng ngă” leh anăn hdră êlan “4 tinăn mtam”, mbĭt anăn rơ̆ng kơ klei hơĭt yang ƀuôn, krŭ wĭt bruă mkra mjing, mđing ai dưi kơ bruă gang mkhư̆ klei yan adiê ngă. Bi klă bruă klam mơ̆ng êpul lĭng kahan, Khua bruă Đảng čar Khánh Hoà Nghiêm Xuân Thành mñă klă:

“Êpul lĭng kahan nao đru, tiŏ nao lu knuă druh, lĭng kahan, lu êdeh êdâo hrăm mbĭt, klă sĭt jing êpul kmeh gơ̆ng đru dŏng mnuih ƀuôn sang, leh anăn wăl hlăm bruă msir boh jhat klei êa lêč hlăm wưng êgao.”

Boh sĭt ti čar Khánh Hoà brei ƀuh, hlăm grăp boh klei dleh dlan, lĭng kahan yơh jing anôk knang kjăp mơ̆ng mnuih ƀuôn sang, jing êpul nao êlâo, kmeh gơ̆ng hlăm bruă răng mgang klei hdĭp, ngăn prăk leh anăn krŭ wĭt leh klei truh yan adiê.