Ƀri gưl nao hlăm Klei bi kƀĭn gưl dlông ASEAN tal 46, tlam (26/5), Khua knŭk kna Phạm Minh Chính mâo leh klei bi tuôm hŏng Khua knŭk kna Lào Xỏn-xay Xi-phăn-đon. Dua Khua knŭk kna bi tŭ ư mđĭ pŏk ngă 2 hdră bruă mkŏ êlan klông yuôm bhăn jing êlan dơ̆ng êran pral Hà Nội - Viêng Chăñ, êlan êdeh treng Viêng-chăn - Vũng Áng.

 Hlăm klei bi tuôm, Khua knŭk kna Lào Xỏn-xay Xi-phăn-đon bi mni lač jăk kơ klei đru jih ai tiê leh anăn klei đru jăk siam mơ̆ng Việt Nam kơ Lào hlăm klei bi blah mtlaih êngiê djuê ana êlâo dih ăt nsĕ mơh klei đĭ kyar lăn čar hruê anei; bi mklă, Knŭk kna Lào srăng bi hgŭm kjăp hŏng Knŭk kna Việt Nam pŏk ngă tŭ dưn, djŏ hnơ̆ng dŭm hdră bruă bi hgŭm phŭn dua ala čar, klă sĭt bi hdơr dŭm knăm mơak yuôm bhăn mơ̆ng dua đảng, dua knŭk kna hlăm thŭn 2025. Dua Khua knŭk kna bi tŭ ư bi hgŭm kjăp pŏk ngă tŭ dưn klei kuôl kă gưl dlông dua ala čar; bi hgŭm rơ̆ng klei êđăp ênang ala ƀuôn; mđĭ klei bi hgŭm, lĭng kahan, mđĭ mkŏ dua bruă duh mkra kơ anôk bruă êlan klông, êa pui êwa čuh, dăng kông leh anăn hiu čhưn ênguê, hlăm  anăn lŏ dơ̆ng mđĭ pŏk ngă 2 hdră bruă mkŏ êlan klông yuôm bhăn jing êlan dơ̆ng êran pral Hà Nội - Viêng-chăn, êlan êdeh treng Viêng-chăn - Vũng Áng./.