Blŭ hrăm bi ruĕ klei bi kƀĭn, Khua bruă kƀĭn ala Trần Thanh Mẫn mñă klă, hŏng ai tiê mă bruă hŏng klei mjêč, djŏ hŏng hdră biăn leh anăn mâo bruă đua klam, Dhar bruă gĭt gai Bruă Kƀĭn Ala dưi leh jih jang mta phŭn hdră êlan klei kƀĭn tal 48 hŏng 17 mta phŭn bi trông klă anăp leh anăn đa đa mta phŭn ksiêm dlăng hŏng hră mơar, mprăp lu mta phŭn kơ klei kƀĭn tal 10.

Khua bruă kƀĭn ala Trần Thanh Mẫn mñă klă, gưl kƀĭn mlan 9 jing gưl kƀĭn yuôm bhăn brei klei blŭ mguôp kơ dŭm mta phŭn hưn mdah hlăm klei kƀĭn tal 10 hŏng lu mta phŭng msĕ si brei klei blŭ mguôp gưl tal 2 kơ bruă mprăp kơ klei kƀĭn tal 10, ksiêm dlăng, bi klă hdră êlan mkŏ mjing hdră bhiăn 2026, brei klei blŭ mguôp dŭm klei hưn mdah ksiêm wĭt wưng păn bruă mơ̆ng Bruă Kƀĭn Ala leh anăn dŭm anôk bruă knŭk kna, bruă mprăp kơ klei ruah khua leh anăn hlăm brô 50 hdră mkăp klei bhiăn, hdră mtrŭn yuôm bhăn mkăn.