Rơ Châm H’Yéo, ti ƀuôn hgŭm Pleiku, čar Gia Lai – Khua hđăp Anôk kriê dlăng bruă Đảng čar, Khua hđăp knơ̆ng bruă Mặt trận čar Gia Lai mđing tui ksiêm kơ klei hâo hưn kơ Klei bi kƀĭn phung bi ala kluôm ala čar tal XIV mơ̆ng Đảng. H’Yéo brei thâo, kyua mâo klei gĭt gai, mđing dlăng mơ̆ng Đảng hŏng krĭng mnuih djuê ƀiă, klei hdĭp mnuih ƀuôn sang ti Gia Lai lehanăn kluôm krĭng Lăn dap kngư dưi mkra mđĭ leh klă sĭt lehanăn bi mlih hlăm djăp mta ra klei.

Mnuih ƀuôn sang Lăn dap kngư sa ai tiê hluê Đảng, hluê Awa Hô. Čang hmăng Đảng drei lŏ dơ̆ng mđing dlăng, mjing klei găl kơ Lăn dap kngư lŏ dơ̆ng mđĭ kyar bruă duh mkra, dhar kreh, mjuăt bi hriăm, hŏng hdră mkŏ mkra Lăn dap kngư kjăp kơ hdră duh mkra, mâo lu klei thâo. Anei yơh jing bruă yuôm bhăn.

Hŏng klei dlăng mơ̆ng sa čô lu thŭn mă bruă tă hdră lehanăn gĭt gai hdră mtrŭn djuê ana, Ksor Phước, ti Gia Lai, Khua hđăp Anôk dlăng bruă Đảng gưl dlông, Khua hđăp phŭn bruă hlŏng klam Khua Dhar bruă djuê ana mơ̆ng Knŭk kna – mñă hdră djuê ana lehanăn dŭm hdră mtrŭn kơ krĭng mnuih djuê ƀiă mâo leh Đảng lehanăn knŭk kna krơ̆ng kjăp nanao. Ksor Phước đăo knang hlăm wưng păn bruă mrâo, Đảng lehanăn Knŭk kna srăng mđing ba yua tŭ dưn boh tŭ yuôm dhar kreh djuê ana, lăn mnga êa mơak, knhuah gru hƀuê ênuk čiăng mđĭ kyar hdră dhar kreh, hiu čhưn ênguê hơĭt kjăp, mguôp hŏng hdră mđĭ kyar bruă duh mkra bi mguôp kriê pioh knhuah gru.

Bruă djuê ana jing sa mta bruă mâo phung roh kreh bi mčhua čiăng mtrŭt mčhur, bi rai klei bi hgŭm mguôp djuê ana. Jăk hĭn brei drei mkŏ mjing jăk hdră mnuih ƀuôn sang răng mgang klei êđăp ênang Ala čar, mđĭ hdră răng mgang klei êđăp ênang hlăm mnuih ƀuôn sang, bi kjăp hdră răng mgang hlăm klei mđĭ kyar bruă duh mkra – ala ƀuôn mâo klei bi knar mbĭt. Mđĭ kyar bruă duh mkra čiăng mđĭ hĭn hdră lĭng kahan – răng mgang klei êđăp ênang čiăng mđĭ kyar bruă duh mkra. Anei jing klei kâo čiăng êdi hŏng wưng păn bruă ti anăp mơ̆ng Đảng hŏng kluôm ala, boh nik hlăm krĭng mnuih djuê ana ƀiă ti Việt Nam”.

Ti krĭng Yŭ Dưr, mnuih ƀuôn sang djuê ƀiă ăt dôk mdidng truh kơ Klei bi kƀĭn phung bi ala kluôm ala tal XIV mơ̆ng Đảng, ba mơĭt klei čang hmăng hlăm dŭm hdră mtrŭn yuôm bhăn mơ̆ng Đảng hlăm ktuê êlan đĭ kyar mrâo. Nguyễn Văn Độ, đảng viên ti ƀuôn Hưng Hà, să Chiềng Khương, čar Sơn La čang hmăng Klei bi kƀĭn tal XIV srăng lŏ tă dŭm hdră êlan, hdră msir phŭn, sui thŭn, djŏ guôp hŏng klei găl mâo mơ̆ng mnuih djuê ƀiă, boh nik hlăm hdră mđĭ kyar bruă duh mkra mguôp hŏng hdră bi hrŏ ƀun hơĭt kjăp.

Hmei čang hmăng Đảng lehanăn Knŭk kna lŏ dơ̆ng mjing klei găl kơ ƀĭng ngă lŏ hma dưi čan prăk. Mbĭt anăn mđĭ ai dŭm anôk bruă duh mkra mđing kơ hdră mkra mjing êlam hlăm bruă lŏ hma ti krĭng taih kbưi, msĕ si hlăm bruă pla mjing, rông mnơ̆ng čiăng ba wĭt boh tŭ bruă duh mkra kơ mnuih ƀuôn sang.

Knuă druh, đảng viên lehanăn mnuih ƀuôn sang să Chiềng Khương, čar Sơn La ăt bi êdah klei čang hmăng dŭm hdră ala čar kñăm dưi pŏk ngă mđrăm mbĭt, tŭ dưn, bọoh nik Hdră mđĭ kyar bruă duh mkra – ala ƀuôn hlăm krĭng mnuih djuê ƀiă lehanăn čư̆ čhiăng, dưi dlăng jing tur knơ̆ng yuôm bhăn đru kơ mnuih ƀuôn sang lŏ mâo djăp klei găl duh kơ bruă pla mjing, bi hơĭt klei hdĭp. Đào Việt Phương, Kơiăng khua Anôk bruă Đảng să brei thâo:

Hmei đăo knang lehanăn čang hmăng Klei bi kƀĭn tal XIV mơ̆ng Đảng srăng ba mdah dŭm hdră êlan mâo hnơ̆ng trah dlăng phŭn, mjing boh kdrŭt kơ hdră mđĭ kyar bruă duh mkra – ala ƀuôn hơĭt kjăp hlăm wưng mrâo. Mnuih ƀuôn sang čang hmăng mâo klei mđing hĭn kơ bruă lŏ hma, mâo hdră đru kơ bruă lŏ hma pla mjing mnơ̆ng ba čhĭ. Mbĭt anăn čang hmăng kơ Đảng lŏ mâo klei bhiăn, hdră mtrŭn mđĭ kyar bruă duh mkra – ala ƀuôn djŏ guôp hŏng krĭng knông lăn msĕ si mđĭ kyar krĭng ƀăng jang knông lăn./.