Ti ƀuôn Akŏ Dhông, ƀuôn hgŭm Ƀuôn Ama Thuôt, mnuih ƀuôn sang bi nao ti Sang dhar kreh êpul êya tui ksiêm kơ Knăm mphŭn pŏk Klei bi kƀĭn tal XIV mơ̆ng Đảng hlăm ai êwa mpŭ, hơ̆k mơak. Amai H’Tít Alêô, mnuih ƀuôn sang ƀuôn Akŏ Dhông brei thâo:

“Tui ksiêm klă anăp Klei bi kƀĭn bruă Đảng tal 14 kâo ƀuh mơak lehanăn ktưn hưn êdi kyua anei jing sa hdră yuôm bhăn mơ̆ng ala čar. Kâo čang hmăng Đảng mâo hdră mtrŭn mđĭ kyar bruă hiu čhưn ênguê êpul êya čiăng rơ̆ng kjăp lehanăn mđĭ lar dhar kreh mnuih djuê ƀiă hlăm ênuk gưl ñŭ kma.

Ti ƀuôn Alê A, ƀuôn hgŭm Êa Kao, ai êwa hơ̆k mơak dôk lar ti djăp anôk, mơ̆ng dŭm boh sang krum truh kơ ktuê êlan krĭng ƀuôn sang. Hlăm sang dhar kreh êpul êya, mnuih ƀuôn sang nao tui ksiêm leh hruê bi kƀĭn tal êlâo mơ̆ng Klei bi kƀĭn. Y- Kanin, mnuih ƀuôn sang buôn Alê A brei thâo:

Mnuih ƀuôn sang hlăm ƀuôn bi nao ti Sang dhar kreh êpul êya tui ksiêm klei hâo hưn kơ Klei bi kƀĭn. Hmei čang hmăng Klei bi kƀĭn srăng ba mdah lu hdră mtrŭn klă sĭt, đru mđĭ kyar bruă duh mkra – ala ƀuôn, mđing hĭn kơ krĭng mnuih djuê ƀiă, kriê kjăp lehanăn mđĭ lar knhuah dhar kreh dŭm djuê ana, mtrŭt mđĭ hdră mnia mblei ti alŭ wăl”.

Ti nah Ngŏ, ti dŭm ƀuôn hiu trah mă kan ktuê hang ksĭ, ai êwa mđing truh kơ Klei bi kƀĭn ăt mkŏ mjing hŏng klei mčhĭt mơuăt. Lu phung hiu mă kan bi êdah klei đăo knang lehanăn čang hmăng hlăm dŭm hdră mtrŭn mjing boh kdrŭt mđĭ kyar kluôm mbĭt anăn čang hmăng lŏ mâo hdră mtrŭn hơĭt ai tiê ngă bruă, kriê kjăp klei dưi kiă kriê kluôm ênŭm krĭng ksĭ mơ̆ng ala čar. Đặng Nhu, mnuih hiu trah mă kan ƀuôn hgŭm Phú Yên mñă:

“Hmei jing mnuih hiu mă kan, čang hmăng Klei bi kƀĭn srăng mâo hdră mtrŭn mđĭ kyar bruă mnơ̆ng hlăm êa čiăng mnuih ƀuôn sang hơĭt ai tiê ngă bruă, mđĭ kyar hdră duh mkra, răng mgang kjăp krĭng ksĭ”.