Dŭm hruê anei, êlan ƀê tông mơ̆ng wăl krah ƀuôn hgŭm M’Drak nao ti ƀuôn M’Suôt ƀlêč ƀlir hla čhiăm gru hrah mtŭ kñĭ, panô hâo hưn kơ klei kƀĭn kluôm tal 14 mơ̆ng Đảng. Hlăm klei hơ̆k mơak leh yan hrui êmiêt, đảng viên Y-Liêu Niê, mnuih Êđê ti ƀuôn M’Suôt, ƀuôn hgŭm Mdrak brei thâo, sa ai hŏng klei bi lông ktưn tŭ drông klei kƀĭn prŏng kluôm ală, mnuih ƀuôn sang hur har pla kbâo, kphê, tiu, durian, rông ŭn mnŭ, mđĭ hnư hrui wĭt, kyuanăn klei hdĭp đĭ kyar. Ară anei anôk bruă amâo lŏ mâo gŏ sang ƀun ôh, kluôm ƀuôn knŏng adôk 11/172 gŏ êsei ƀun. Mđing truh kơ klei kƀĭn prŏng kluôm ala tal 14, đảng viên Y- Liêu Niê mâo lu klei hmăng hmưi:

“Mnuih ƀuôn sang hmăng hmưi Đảng leh anăn knŭk kna lŏ dơ̆ng uêñ mĭn, duh bi liê thiăm hdră mđĭ kyar êlan klông, êa doh, knơ̆ng kdơ̆ng êa, sang hră mơar, anôk mdrao mgŭn, mbĭt anăn mâo lu hdră êlan đru kơ anak čô mnuih djuê ƀiă dưi hriăm hră, hriăm bruă, mâo bruă mă, hluê anăn đru mkŏ mjing ƀuôn sang ƀrư̆ hruê ƀrư̆ mdrŏng ktang leh anăn đĭ kyar.”

Pô thâo mbruă H’Ring Mlô, 68 thŭn, mnuih Êđê ti ƀuôn M’găm, ƀuôn hgŭm Mdrak brei thâo, wưng păn bruă êgao, kyua klei uêñ mĭn mơ̆ng Đảng leh anăn knŭk kna mbĭt hŏng klei gĭr mơ̆ng mnuih ƀuôn sang, klei hdĭp dưi mđĭ hĭn, dhar kreh dưi djă pioh. Asei ñu pô leh anăn phung mduôn hlăm ƀuôn gĭr djă pioh bruă pơ̆k mñam, knă kpiê amâodah dŭm boh tŭ dhar kreh mkăn… amâo mâo brei luč ram. Biădah, čiăng kơ bruă kriê pioh hơĭt kjă, leh klei kƀĭn kluôm, ñu hmăng hmưi dŭm gưl bruă, dhar bruă lŏ dơ̆ng mâo hdră êlan gưl guôp, bi mguôp mđĭ kyar bruă hiu čhưn ênguê êpul êya hŏng kriê pioh leh anăn mđĭ lar knhuah gru dhar kreh djuê ana Êđê. Pô thâo mbruă H’ Ring Mlô lač:

“Sang kâo mâo êlan Ngŏ Trường Sơn găn leh anăn 1,4ha lăn pla leh kphê, ana ƀơ̆ng boh leh anăn mâo mdơ̆ng sang krum. Kâo thâo knă kpiê, pơ̆k mñam leh anăn dŭm mta mnơ̆ng ƀơ̆ng Êđê. Leh klei kƀĭn kluôm, hmăng hmưi dŭm gưl bruă, dhar bruă đru čiăng kơ gŏ sang mbĭt hŏng mnuih ƀuôn sang hlăm ƀuôn M’găm mđĭ kyar bruă hiu čhưn ênguê êpul êya, mbĭt anăn kriê pioh dhar kreh, bruă pơ̆k mñam, klei tông čing. Ară anei êlan klông đĭ kyar, ngă bruă hiu čhưn ênguê ênưih hĭn kơ êlâo, ƀiădah čiăng mâo klei đru, klei tă hdră mơ̆ng Đảng leh anăn knŭk kna.”

          K’iăng khua bruă êdam êra ƀuôn hgŭm Mdrak Y-Khương Mlô brei thâo, phung mda asei jing kngan hnuă mơ̆ng Đảng, boh nik hlăm wưng leh bi mŭt mbĭt. Sa ai hŏng klei bi lông ktưn tŭ drông klei kƀĭn kluôm tal 14 mơ̆ng Đảng, đoàn viên, phung êdam êra să Mdrăk ngă lu mta bruă klă klơ̆ng. Êbeh 2.550 čô êdam êra ngă bruă nao bi doh, yuôl hla čhiăm gru, pano hâo hưn kơ klei kƀĭn prŏng kluôm ala. Boh nik, mơ̆ng mlan 7/2025 truh kơ ară anei, dŭm pluh êbâo gưl čô đoàn viên mtô kơ mnuih ƀuôn sang ngă hră mơar knŭk kna, bi mrâo VneID, đru kơ bruă knŭk kna alŭ wăl ngă bruă jăk. Mđing truh kơ klei kƀĭn prŏng kluôm ala tal 14 mơ̆ng Đảng, Y-Khương Mlô bi êdah klei hmăng hmưi:

“Leh klei kƀĭn kluôm tal 14 mơ̆ng Đảng, kâo hmăng hmưi phung mda asei hmei lŏ dơ̆ng hriăm, kah mbah klei thâo, mâo klei uêñ mĭn, čiăng thâo dŭm klei hriăm mrâo, mâo thiăm klei găl bi lar bruă klam hlăm klei bi mlih mrô, mbĭt anăn nao hgŭm kriê pioh, bi lar knhuah gru dhar kreh leh anăn dŭm hdră kơ phung êdam êra, phung hđeh.”

          Mdrak mâo êbeh 22.000 čô mnuih ƀuôn sang, giăm 40% jing mnuih djuê ƀiă, bruă Đảng ƀuôn hgŭm mâo giăm 1.200 čô đảng viên mă bruă ti 56 êpul bruă Đảng. Hŏng klei đăo knang kơ Đảng leh anăn klei kƀĭn prŏng kluôm ala tal 14, mơ̆ng đảng viên, mnuih ƀuôn sang truh kơ phung êdam êra dôk bi lông ktưn mă bruă knuă, djă pioh knhuah dhar kreh, đru mkŏ mjing bruă knŭk kna nah gŭ kjăp ktang, hmăng hmưi sa gưl kƀĭn prŏng kluôm ala tŭ dưn, pŏk kơ sa wưng đĭ kyar mrâo kơ ƀuôn sang./.