Ti ƀuôn Alê A, ƀuôn hgŭm Êa Kao, čar Dak Lak, lu mnuih nao ti Sang dhar kreh êpul êya, mđing tui ksiêm kơ Klei bi kƀĭn hluê tivi. Y Kanin brei thâo:

"Grăp čô mnuih tinei hgŭm mguôp, mâo lu djuê ana ayŏng adei mdê mdê, hmei mơak lehanăn čang hmăng srăng mâo lu klei bi mlih hlăm wưng ti anăp. Phung khua êmua jing mnuih thâo êdi, mâo hnơ̆ng trah dlăng kbưi, kâo đăo knang Klei bi kƀĭn srăng tŭ jing jăk siam. Čang hmăng Klei bi kƀĭn srăng mâo hdră mtrŭn mtrŭt mđĭ bruă lŏ hma, prăk duh kơ bruă, dhar kreh čiăng mđĭ kyar bruă duh mkra.

Ti ƀuôn Stơr, să Tơ Tung, čar Gia Lai, ayŏng Đinh Bơn, brei thâo:

“Ƀuôn hmei jing ƀuôn krĭng taih kbưi. Čang hmăng mơ̆ng Klei bi kƀĭn Đảng anei, Knŭk kna, bruă sang čư̆ êa dŭm gưl mđing hĭn kơ ƀuôn sang. Mnuih ƀuôn sang hmei čang hmăng Klei bi kƀĭn Đảng tŭ jing jăk siam, mâo dŭm hdră mtrŭn djŏ guôp mđĭ kyar ala čar”.

Hŏng klei đăo knang kơ Đảng, Lâm Tấn Bình, sa čô ksiêm hriăm lu mnuih Čam ti să Bắc Bình, čar Lâm Đồng, čang hmăng, Klei bi kƀĭn tal XIV mơ̆ng Đảng srăng ba mdah hdră mtrŭn djŏ klă hŏng klei đĭ kyar mơ̆ng ala čar hlăm wưng mrâo.

Mnuih ƀuôn sang djuê ƀiă hlăm anăn mâo mnuih Čam čang hmăng hlăm dŭm hdră mtrŭn mơ̆ng Đảng đru kơ ala čar Việt Nam lehanăn mnuih djuê biă lŏ dơ̆ng mđĭ kyar bruă duh mkra, kriê kjăp knhuah dhar kreh djuê ana. Čiăng dưi mâo snăn, jih jang djuê ana lŏ dơ̆ng mđĭ lar hdră mtrŭn bi hgŭm mguôp djuê ana čiăng ba ala čar kpưn đĭ kjăp hlăm ênuk gưl mrâo.