Mâo hriăm mjuăt leh bruă mrô, lu gŏ sang phung ngă lŏ hma ti Lào Cai thâo hưn mdah mnơ̆ng pô mâo dơ̆ng mơ̆ng hlăm đang mtam. Hŏng sa blư̆ livestream, mnuih blei mơ̆ng djăp anôk ênưih thâo ƀuh, akâo blei, lehanăn hriê truh hlăm đang hiu dlăng lehanăn lông ngă dŭm mta bruă hlăm đang hma, jing bruă hiu čhưn hlăm lŏ hma. Amai Lù Minh Tình, pô đang boh ti ƀuôn hgŭm Mường Khương lač: Msĕ si hmei bi lar leh hlăm TikTok mâo lu phung tue tuôm hriê čhưn leh hlăm đang hmahmei, hŏng ênoh hră blei mŭt hlăm đang hma jing 30 êbâo prăk, lehanăn mâo ƀơ̆ng boh dŭm čiăng, lehanăn lŏ blei ba wĭt boh kruĕ mmih hŏng ênoh 20 êbâo prăk/kg. Mlan tal êlâo hmei mâo čhĭ leh jih giăm 3 tôn boh kruĕ mmih.”

Klei anei brei ƀuh, hŏng kdrăp mrâo mrang mâo đru leh kơ phung ngă lŏ hma ti   Lào Cai bi hrŏ êwang bi kpleh hlăm klei bi mnia mblei. Amâo mâo djŏ knŏng hŏng boh kruĕ mmih, lu mnơ̆ng mơ̆ng bruă pla mjing mkăn msĕ si čê, mtei, sa nhân, braih Séng Cù… ăt hưn mdah hlăm hla pŏk yang ƀuôn, mkŏ mnuih blei hŏng mnuih pla mjing.     Phạm Đức Trung, K’iăng khua knơ̆ng bruă sang čư̆ êa ƀuôn hgŭm Mường Khương lač:

 Hmei mkŏ leh mơh êlan hlăm klei bi mnia mblei, lehanăn mâo klei mta mtăn kơ mnuih ƀuôn sang thâo ba yua hla pŏk yang ƀuôn. Phŭn tal êlâo jing hŏng mnuih blei yua jĕ giăm jŭm Lào Cai đuič, ƀiădah ară anei truh kơ Hà Nội,  Hải Phòng… mnuih ƀuôn sang thâo yua đĭng blŭ thâo mĭn leh sơăi, bi thâo yua hla pŏk yang ƀuôn jăk leh.

Hlue ngă hdră ala čar kñăm mrô 1719, Lào Cai mâo ngă leh lu hdră msĕ si đru hdră mă bruă, mjuăt bi hriăm klei thâo kiă kriê, đru brei čan prăk hŏng mnga hdjul, ngă hră mơar, kiă kriê boh mnga bruă pô mă, hưn mdah boh mnga alŭ wăl pô mâo… Ară anei lu mnơ̆ng mơ̆ng alŭ wăl dưi čhĭ mnia lar ƀar truh hŏng lu alŭ wăl mkăn. Dương Tuấn Nghĩa, K’iăng khua knơ̆ng bruă dhar kreh, mjuăt asei mlei, lehanăn hiu čhưn ênguê čar Lào Cai lač:

Mnuih ƀuôn sang thâo ba yua kdrăp mrâo mrang hŏng klei pral, mâo lu hlăm web, tiktok, facebook  dưi ba yua hŏng klei tŭ jing. Klei anei đru leh dŭm knơ̆ng dhar bruă msĕ si Knơ̆ng bruă kreh knhâo lehanăn kdrăp mrâo, knơ̆ng bruă dhar kreh, hiu čhưn ênguê. Hmei dưi ba yua leh lu kdrăp mrâo, boh nik ba klei bi mlih mrô hlăm ƀuôn sang, boh nik hlăm phung mda asei.

Mơ̆ng bruă lŏ hma truh kơ bruă kdrăp mrô jing leh knhuang bi mlih prŏng hlăm klei mĭn kơ bruă duh mkra mnia mblei hlăm mnuih ngă lŏ hma krĭng dlông čư̆ čhiăng   Lào Cai. Leh mâo ktrâo atăt djŏ hdră, mnuih ƀuôn sang dưi thâo yua kdrăp mrâo, kpưn đĭ hlăm klei mnia mblei. Klei bi mlih mrô – hlăk jing leh kliăng pŏk ƀăng kơ klei mđĭ kyar kjăp bruă lŏ hma mơ̆ng alŭ wăl./.