Hŏng Lăn dap kngư – Dhŭng kwar krah, mơ̆ng sa krĭng dôk dleh dlan, ară anei mñă klă leh bruă klam yuôm bhăn hlăm hdră duh mkra, lĭng kahan – răng mgang klei êđăp ênang, mjing tur knơ̆ng kơ hnơ̆ng trah dlăng mđĭ kyar sui thŭn mơ̆ng “Ênuk gưl kpưn đĭ”. Hoàng Công Khiêm, Kơiăng khua bruă Đảng ƀuôn hgŭm Xuân Trường- Đà Lạt, čar Lâm Đồng brei thâo:

“Knuă druh, đảng viên lehanăn Mnuih ƀuôn sang đăo knang, hŏng ai ktang bi hgŭm mguôp, grăp čô mnuih krŭ wĭt klei čang hmăng, klei čŏng pô kpưn đĭ snăn ala čar srăng đĭ kyar, mnuih ƀuôn sang trei mđao, yâo mơak”.

Klei êdah êdi mơ̆ng Hră mơar Klei bi kƀĭn XIV mơ̆ng Đảng jing bi mklă gru hmô đĭ kyar mrâo, hdră kreh knhâo – kdrăp mrâo lehanăn bi mlih mrô ngă boh kdrŭt phŭn. Hŏng Lăn dap kngư, gru hmô anei pŏk lŏ mkŏ dăp bruă lŏ hma hluê kdrăp mrâo, bruă duh mkra mtah, mđĭ boh tŭ yuôm. Hŏng krĭng Dhŭng kwar krah, boh nik dŭm alŭ wăl ktuê hang ksĭ, anei jing tur knơ̆ng čiăng mđĭ kyar bruă duh mkra êa ksĭ mtah, hiu čhưn ênguê mâo hnơ̆ng tŭ jăk, bruă pui kmlă doh lehanăn logistics mrâo mrang. Hră mơar Klei bi kƀĭn XIV mơ̆ng Đảng kyua anăn amâo djŏ knŏng jing hdră êlan kluôm, ƀiădah lŏ pŏk êlan mđĭ kyar djŏ guôp hŏng klei găl mdê bi krĭng. Đảng viên Mai Văn Tuấn ti ƀuôn hgŭm Phù Đổng, čar Gia Lai brei thâo:

“Hră mơar Klei bi kƀĭn XIV mơ̆ng Đảng bi mklă hdră kreh knhâo mrâo mrang, bi mlih mrô jing boh kdrŭt đĭ kyar, hŏng hmei ti nah gŭ ênưih mơh thâo săng, si srăng ngă čiăng kơ mnơ̆ng lŏ hma čhĭ mâo ênoh, bi hrŏ klei luič liê. Bi mlih mrô amâo djŏ klei dleh dlan ôh, mâo mrô krĭng pla, mâo hră čih pioh điện tử, mâo mrô bi mklă phŭn agha snăn mnơ̆ng anăn srăng dưi ba čhĭ ti wăl anôk mnia mblei prŏng”.

Sa gru kruăk mkăn hlăm Hră mơar Klei bi kƀĭn XIV mơ̆ng Đảng jing mñă hdră ngă bruă klă klơ̆ng: Lač hlŏng ngă mtam: Mta kñăm, bruă klam, hdră msir klă klơ̆ng, mguôp hŏng boh tŭ, klei sa ai mnuih ƀuôn sang jing giê mkă boh tŭ ngă bruă. Asăp hưn mthâo anei mâo boh tŭ yuôm hŏng Lăn dap kngư – Dhŭng kwar krah, anôk dôk tlă anăp hŏng lu klei lông dlăng msĕ si bi mlih yan adiê, klei yan adiê kƀah, kƀah anôk bruă nah gŭ, hdră duh ƀơ̆ng kơ mnuih ƀuôn sang krĭng taih kbưi, krĭng mnuih djuê ƀiă. Đảng viên Nay Lợi, djuê ana Jarai, să Ia Hiao, čar Gia Lai brei thâo:

“Kâo buh jăk êdi klei blŭ lač hlŏng ngă mtam, blŭ ƀiă mă lu, tơdah ngă bruă brei mdưm boh tŭ mơ̆ng Mnuih ƀuôn sang jing mrô sa.

Dăl hlăm Hră mơar Klei bi kƀĭn XIV mơ̆ng Đảng mñă klă bruă đua klam phŭn mơ̆ng Mnuih ƀuôn sang hlăm djăp hdră êlan mđĭ kyar. Hŏng lăn dap kngư – Dhŭng kwar krah, anôk mâo lu djuê ana, klei đăo, klei găl hdĭp mda, ai tiê klei mĭn ƀrư̆ hruê mâo boh tŭ yuôm hlăm bruă bi kjăp klei hgŭm mguôp djuê ana, rơ̆ng klei hơĭt kjăp bruă kđi čar – ala ƀuôn. Khua mduôn Điểu Xem, djuê ana Mnông, să Kiến Đức (Lâm Đồng) brei thâo:

 “ Đảng bi mklă mnuih ƀuôn sang jing phŭn, mnuih ƀuôn sang đăo knang. Hdră mtrŭn jĕ giăm hŏng klei hdĭp, knuă druh hmư̆ mnuih ƀuôn sang khădah dleh dlan, mnuih ƀuôn sang ăt sa ai. Klei hgŭm mguôp kjăp klă sĭt ƀuôn sang srăng hơĭt ênang, ala čar đĭ kyar”.

Mơ̆ng Hră mơar Klei bi kƀĭn XIV mơ̆ng Đảng dưi ƀuh, “Ênuk gưl kpưn đĭ” amâo djŏ knŏng kbiă hriê mơ̆ng dŭm hdră êlan phŭn, ƀiădah lŏ kbiă hriê mơ̆ng klei bi mlih klă sĭt mơ̆ng anôk bruă kđi čar, klei hrăm mbĭt mơ̆ng mnuih ƀuôn sang. Tơdah klei mĭn đĭ kyar mrâo dưi bi sĭt hŏng bruă ngă klă klơ̆ng, lăn dap kngư – Dhŭng kwar krah dưi mjing boh kdrŭt đĭ kyar, đru mguôp hlăm klei đĭ kyar kluôm mơ̆ng ala čar./.