Čar Lâm Đồng mphŭn pŏk leh hdră rŭ mjing anôk bruă bi hriăm mjuăt ktang asei mlei ala čar ti Đà Lạt. Hdră mơ̆ng Phŭn bruă dhar kreh, mjuăt asei mlei leh anăn hiu čhưn ênguê jing pô duh bi liê, dưi rŭ mjing ti ênhă lăn êbeh 10ha ti ƀuôn hgŭm Liangbiang- Đà Lạt, ênoh duh bi liê giăm 300 êklai prăk. Hdră mâo 3 wăl anôk phŭn: B1, B2 leh anăn B3. Hlăm anăn, wăl B3 mrâo phŭn rŭ mjing mâo ênhă giăm 3,5ha mâo brông luê êa mâo čuôr gang, anôk hriăm golf. Wăl B2 mâo ênhă êbah 3,7ha, mâo dŭm sang bi lông dưi rŭ mdơ̆ng mơ̆ng mlan 10/2023 leh anăn mĭn tĭng bi leh ti knhal jih thŭn anei.

Wăl B1 dưi mkra mjing  čiăng rŭ mdơ̆ng wăl sang dôk kơ phung mtô, phung thơ̆ng kơ bruă leh anăn phung bi lông, mbĭt hŏng dŭm anôk bruă đru, mĭn tĭng bi leh ti knhal jih thŭn 2026. Hdră anei dưi duh bi liê hŏng êlan mrâo mrang leh anăn hrăm mbĭt, rơ̆ng kơ dŭm klei găl ala čar leh anăn tar rŏng lăn. Anôk bruă đru kơ klei hriăm mjuăt, bi lông leh anăn bi lar hdră bruă mjuăt asei mlei hlăm mnuih ƀuôn sang, nao mbĭt hŏng mđĭ kyar bruă hiu čhưn ênguê leh anăn dhar kreh, đru mguôp hlăm klei mđĭ kyar bruă duh mkra ala ƀuôn mơ̆ng lăn čar, hlăm anăn mâo čar Lâm Đồng.