Sa hruê kăm êlâo kơ hruê Nôel, ti gŭ adiê hjan, hlăm wăl Sang Aê Diê Mằng Lăng, phung đăo dôk bi kih waih, bi msiam ƀăng boh tâo, ana hngô Nôel hŏng dŭm mta mnơ̆ng yua. Nguyễn Thành Toán, mnuih ƀuôn sang ti alŭ Ngân Sơn brei thâo:

“Thŭn anei amâo mâo djăp ênŭm msĕ hŏng grăp thŭn kyua hmăi kjham kyuanăn ngă mă sơnei yơh. Ăt mâo ana hngô Nôel, leh anăn rup Khua Yang Yêsu, amĭ Mari, Yôsuê. Ti sang pô ăt bi msiam ƀăng boh tâo điêt hĭn ti anăp sang.”

Hŏng lu gŏ sang, srăng guôn sui kơh dưi mgaih msir boh jhat mơ̆ng klei êa lip ngă, ƀiădah truh kơ Nôel anei, dŭm gŏ sang mphŭn mâo klei hơĭt. Nguyễn Văn Sen,  ti alŭ Hội Tín brei thâo, gŏ sang êa đung jih djăp mta ngăn drăp, mnơ̆ng rông leh anăn boh mnga. Ƀiădah kyua mâo klei đăo mgang, alŭ ƀuôn bi kơup mgang, Knŭk kna đru, Nôel thŭn anei ăt hơuh mđao.

“Khădah sơnăn, dŭm yan Noel hơuh mđao, bŏ hŏng klei khăp mơ̆ng Aê Diê brei kơ êpul êya, mâo klei mđĭ ai ktang. Hmăng hmưi grăp čô thâo bi khăp lu hĭn čiăng găn klei jŭ jhat.”

Ăt hŏng ai tiê anăn, ayŏng Phan Văn Truyền, alŭ Hội Tín, brei thâo, klei ñu leh anăn mnuih ƀuôn sang wah lač lu hĭn jing mâo klei êđăp ênang. Leh dŭm hruê j jhat mơ̆ng klei yan adiê ngă. Hmăng hmưi grăp čô lŏ hnưm wĭt hlăm klei hdĭp aguah tlam.

 “Klei êa lêč hmăi lu sơnăk kơ bruă duh mkra, ai tiê. Noel thŭn anei grăp čô bi wah lač akâo klei êđăp ênang, leh anăn hơêč hmưi kơ grăp čô hnưm lŏ wĭt hŏng klei hdĭp aguah tlam”.

Hluê si linh mục Phêrô Võ Thanh Nhàn, pô đru kiă krĭng đăo Mằng Lăng, hlăm krĭng đăo mâo 527 gŏ sang hŏng hlăm brô 1.560 čô đăo, dôk ti dŭm să Tuy An Đông, Tuy An Bắc leh anăn sa kdrêč Tuy An Tây. Klei êa lêč mrâo êgao ngă kơ lu gŏ sang tŭ klei hmăi. Kyuanăn, Noel thŭn anei dŭm gŏ sang bi msiam man dưn, kñăm bi đru hdơ̆ng pô găn klei dleh dlan. Krĭng đăo ăt bi mguôp hŏng dŭm êpul ngă bruă jăk đru kơ phung đăo hnưm bi hơĭt klei hdĭp.

“Noel thŭn anei hmei čiăng lač khădah tuôm hŏng lu klei dleh dlan kyua angĭn êbŭ, êa lip ƀiădah đru kơ hmei mâo ai tiê kjăp găn jih klei dleh dlan, klei lông dlăng. Lač hŏng klei đăo hmei ƀuh grăp klei lông dlăng ñu mâo knhal, tơdah drei mâo klei đăo srăng găn jih klei lông dlăng hlăm klei hdĭp.”

Ênai tiêng liêng sang Aê Diê Mằng lăng kwang ti krah wăl ƀuôn sang Dak Lak mrâo êgao klei angĭn êbŭ, êa lêč. Noel ti Mằng Lăng thŭn anei amâo mâo ƀlêč ƀlir pui mngač, amâo mâo hơ̆k mơak msĕ hŏng grăp thŭn, ƀiădah mâo boh tŭ dưn yuôm bhăn. Anăn jing Nôel mơ̆ng klei thâo bi khăp, mơ̆ng klei đăo dưi kuč mngač ti anăp klei dleh dlan, mơ̆ng anăn phung đăo dưi kgŭ dơ̆ng, mđing kơ klei hdĭp êđăp ênang phă anăp.