Hruê mbruê (23/4), Anôk dlăng bruă Đảng čar Dak Nông bi kƀĭn leh anăn bi mklă hdră msir dăp dŭm anôk bruă knŭk kna gưl să. Mơ̆ng 71 să, ƀuôn hgŭm, wăl krah, Dak Nông srăng bi mŭt adôk 28 să, ƀuôn hgŭm. Hdră msir anei srăng lŏ dơ̆ng hưn mdah hŏng Êpul gơ̆ng bruă ƀuôn sang čar Dak Nông, hlăm klei bi kƀĭn mkŏ mjing hlăm hruê 25/4 kơ anăp. Êlâo anăn, Knơ̆ng bruă sang čư̆ êa čar Dak Nông mbha leh êbeh 148.600 hră mă klei blŭ  kơ phung bi ala mnuih ƀuôn sang jih jang gŏ sang ti čar.

 Boh tŭ, mâo 144.643 čô bi ala tŭ ư hŏng hdră bvi mŭt, mâo êbeh 96%. Kơ anôk bruă knŭk kna gưl ƀuôn hgŭm, ƀuôn prŏng Gia Nghĩa bi mŭt jing 3 ƀuôn hgŭm msĕ si: mkŏ mjing ƀuôn hgŭm Dưr Gia Nghĩa mơ̆ng tur knơ̆ng bi mŭt dŭm ƀuôn hgŭm Quảng Thành, Nghĩa Thành, Nghĩa Đức leh anăn să Đắk Ha; mkŏ mjing ƀuôn hgŭm Dhŭng Gia Nghĩa mơ̆ng tur knơ̆ng bi mŭt dŭm ƀuôn hgŭm Nghĩa Phú, Nghĩa Tân leh anăn să Dak R’Moan; Mkŏ  mjing ƀuôn hgŭm Ngŏ Gia Nghĩa mơ̆ng klei bi mŭt ƀuôn hgŭm Nghĩa Trung leh anăn să Dak Nia.