Leh giăm sa thŭn blŭ hrăm hŏng ƀĭng hgŭm, truh kơ mlan 8 thŭn anei, knơ̆ng bruă Duh mkra mnia mblei Việt Thắng, ƀuôn hgŭm Ea Kar, čar Dak Lak dưi ba čhĭ 25 êbâo hlâo jep ksu čŭt hlăm sang truh kơ Mi.

Sơnăn, leh lu thŭn bi ktưn hŏng jep ksŭ ti China, Philipines leh anăn đa đa ala čar Ngŏ Dhŭng Asi, knơ̆ng bruă êngao knŭk kna gưl kdriêk – ƀuôn hgŭm mơ̆ng Dak Lak dưi truh leh ti anôk kbưi, mprăp kơ klei kpĭ bi ktưn mrâo.

Nguyễn Thị Dung, Khua knơ̆ng bruă brei, čiăng bi ktưn ti anôk mnia mblei mrô sa tar rŏng lăn msĕ si Mi, êngao kơ klei thâo mrâo mrang, klei kriê dlăng, knơ̆ng bruă ăt mprăp kơ ngăn prăk čiăng mđĭ ai dưi mkra mjing, bi mâo djăp mnơ̆ng dhơ̆ng djŏ hdră kčah. Jing sa čô lĭng kahan mâo kơhưm hlăm êbeh 20 thŭn mơ̆ng dŭm knơ̆ng prăk alŭ wăl, Nguyễn Thị Dung đăo knang. Việt Thắng srăng mâo djăp ai dưi.

Êjai phung tuê lŏ brei lu srăng mgô̆ Việt Thắng pŏk phai sang măi leh anăn duh bi liê thiăm kdrăp mrâo mrang čiăng rơ̆ng mâo djăp mnơ̆ng dhơ̆ng kơ ƀĭng hgŭm. Myun êdi kyua mâo Agribank Dak Lak hrăm mbĭt ngă klei đru, mkŏ mjing klei găl čiăng kơ hmei lŏ dơ̆ng dưi lĭng čan duh bi liê kơ kdrăp yua leh anăn sang măi. Knơ̆ng prăk brei čan mkŏ mjing klei găl, ngă hră mơar pral, khuăt leh anăn klei lĭng čan ăt ênưih mơh.

Hŏng knơ̆ng bruă duh mkra mnia mblei Thế Kỷ, ƀuôn hgŭm Drai Bhăng, čar Dak Lak, hdră čô̆ kơ bruă mơ̆ng klei rông mnơ̆ng jing sa knơ̆ng bruă mnia mblei, ăt brei ƀuh klei yuôm bhăn mơ̆ng prăk lĭng čan leh anăn yua prăk mbruă. Lê Thị Tuyết Sương, khua knơ̆ng bruă brei thâo, klei găl mơ̆ng knơ̆ng bruă jing dưi bi lar bruă rông mnơ̆ng, dưi mkŏ mjing klei găl lĭng čan găl ênưih, leh anăn yua prăk hlăm klei mnia mblei.

“Prăk kâo dôk čan mơ̆ng knơ̆ng prăk jing 3 êklai prăk. Mphŭn kčưm kâo mă hŏng grăp gưl, čiăng duh bi liê rŭ mjing war rông, mjeh rông, mnơ̆ng ƀơ̆ng. Leh dưi hrui wĭt prăk mơ̆ng rông mnŭ dua ung mô̆ duh bi liê mnia mblei hŏng nah êngao”.

Hŏng krĭng lăn klei găl bruă lŏ hma jing tur knơ̆ng, lu knơ̆ng bruă, gŏ sang mnia mblei ti Dak Lak čô̆ kơ bruă mơ̆ng bruă lŏ hma, amâodah duh bi liê nao mbĭt hŏng klei mnia mblei. Kyuanăn, ênoh prăk đru kơ bruă lŏ hma mâo bruă klam yuôm bhăn hlăm klei đru mđĭ kyar bruă duh mkra êngao knŭk kna, hluê si hdră mtrŭn mrô 68 mơ̆ng Phŭn bruă kđi čar. Čiăng dưi ngă bruă klam anei, êngao kơ dŭm anôk bruă, adŭ bruă, knơ̆ng prăk lŏ bi mguôp hŏng dŭm êpul bruă mkŏ mjing dŭm êtuh êpul lĭng čan ti dŭm alŭ, ƀuôn. H Ley Sia Êban, knuă druh bruă phung mniê ƀuôn hgŭm Drai Bhăng, čar Dak Lak brei thâo, hŏng dŭm êpul bruă ti alŭ wăl, dŭm êpul lĭng čan dưi đru kơ mnuih ƀuôn sang tŭ dưn êdi.

“Hŏng bruă mkŏ mjing dŭm êpul lĭng čan ăt msĕ mơh mnuih ƀuôn sang dưi lĭng čan ênưih hĭn, mgaih msir klei čiăng pô. Hĭn kơnăn, Agribank ăt pŏk mlar ênoh prăk lu hĭn čiăng bi mâo djăp klei čiăng pŏk mlar mnia mblei mơ̆ng mnuih ƀuôn sang. Êjai mâo ênoh prăk mnuih ƀuôn sang jhŏng mđĭ kyar bruă mnia mblei, mđĭ kyar bruă duh mkra gŏ sang”.

 Lê Văn Thịnh, Khua Knơ̆ng bruă Agribank Dak Lak brei thâo, hlăm wưng Dak Lak mâo êa ksĭ, klei ba čhĭ boh mnga mơ̆ng čar ăt mâo lu klei găl, knơ̆ng prăk srăng mâo klei mkra mlih čiăng bi lar klei găl anei.

“Anăp anei hmei mâo dŭm hdră êlan klă klơ̆ng leh anăn dưi mâo ênoh tuê lu, kñăm kơ phung tuê djŏ tuôm hŏng klei mnia mblei boh mnga. Anăn jing sa hlăm dŭm kmeh gơ̆ng mơ̆ng čar Dak Lak. Ară anei dưi nao jĕ leh anăn mâo leh đa đa klei ƀuăn leh anăn dôk mtrŭt mđĭ hluê si hdră. Mĭn tĭng hlăm thŭn 2025 anei ăt srăng mđĭ kyar, gĭr bi êgao hdră kčah Phŭn bruă ngăn prăk jao.

Amâo djŏ knŏng jing brei čan prăk, dŭm knơ̆ng bruă ti Dak Lak dưi leh anăn dôk hrăm mbĭt hŏng knơ̆ng bruă leh anăn mnuih ƀuôn sang. Mơ̆ng dŭm klei kuôl kă ba čhĭ boh mnga truh kơ tar rŏng lăn truh kơ gru hmô bruă duh mkra gŏ sang ti dŭm ƀuôn êlan, jih jang dôk đru mguôp mđĭ kyar bruă duh mkra alŭ wăl, mđĭ hnơ̆ng klei hdĭp mnuih ƀuôn sang leh anăn mñă klă bruă klam kmeh gơ̆ng mơ̆ng bruă duh mkra êngao knŭk kna./.