Ti alŭ Kon Tun, să Tu Mơ Rông, čar Quảng Ngãi, A Hai, 50 thŭn jing pô ba akŏ hlăm hdră mlih mrâo klei ngă bruă čiăng mđĭ kyar hdră duh mkra gŏ sang. Ară anei gŏ sang ñu mâo 20 ha lăn, hlăm anăn êbeh 10 ha dliê pla, lu jing ana Gáo kñĭ. Mbĭt anăn, ñu lŏ pla pluă ana bời lời, hông, xà cừ mguôp hŏng rông êmô ana mđai ti gŭ kyâo dliê, mơ̆ng anăn mđĭ hnư hrui wĭt. Amâo djŏ knŏng mbruă bruă duh mkra, A Hai lŏ mtrŭt mjhar mnuih ƀuôn sang bi mlih klei mĭn pla mjing, bi mlih mơ̆ng hdră pla mjing ƀiă hruê ba pla dŭm mta ana sui thŭn mguôp hŏng bruă răng mgang wăl hdĭp mda.

“Kâo gĭr pla mjing čiăng mđĭ kyar bruă duh mkra. Pô dưi ngă snăn kơh čô anak dưi hluê ngă. Đảng viên brei ba akŏ, nao êlâo hlăm hdră mđĭ kyar bruă duh mkra. Tinei, pô mtrŭt mjhar mnuih ƀuôn sang mđing kơ bruă duh mkra pla mjing, êmuh hrăm, kah mbha hdră ngă bruă tŭ dưn.

Ăt ti să Tu Mơ Rông, amai Y Khương (36 thŭn), Khua ƀuôn hlŏng ngă Khua bruă Đảng alŭ Ngọc Leng jing sa hlăm dŭm čô knuă druh êdah êdi gưl nah gŭ hlăm hdră mtrŭt mjhar mnuih ƀuôn sang bi mlih mnơ̆ng pla, ƀrư̆ mđĭ hnư hrui wĭt, mkra mđĭ klei hdĭp. Mơ̆ng thŭn 2024, amai Y Khương jhŏng pla kphê hŏng ênhă 6 sao. Jih jang mjeh kphê mâo să đru, knuă druh bruă lŏ hma ktrâo lač kơ hdră mnêč mơ̆ng hdră klei ƀăbg, pruê hbâo truh kơ dlăng kriê. Leh êbeh 1 thŭn, ana kphê đĭ jing jăk. Amai Y Khương lač, jing đảng viên brei ba akŏ hlăm hdră mđĭ kyar čiăng kơ mnuih ƀuôn sang tui ngă.

“Mtô mblang, mtrŭt mjhar mnuih ƀuôn sang bi mlih klei mĭn, hdră ngă. Ana kphê mâo hnư hrui wĭt hơĭt, mnuih buôn sang ƀuh tŭ dưn kyua anăn ăt jhŏng hlue engă mơh. Êlâo adih pla hbei ƀlang ƀiădah djiê lu. Mơ̆ng thŭn 2024, kâo mtrŭt mjhar mnuih ƀuôn sang pla kphê. Thŭn 2024, alŭ Ngọc Leng mâo 24 gŏ sang nao hgŭm, truh thŭn 2025 mâo 25 gŏ sang, hnư hrui wĭt mơ̆ng kphê, cacao đĭ kyua anăn hĭn mơh diñu lŏ gĭr ngă bruă.

Mơ̆ng dŭm gru hmô duh ƀơ̆ng klă klơ̆ng, ai tiê ba Hdră mtrŭn mŭt hlăm klei hdĭp ti să Tu Mơ Rông ƀrư̆ dưi bi sĭt. Alŭ wăl bi mklă mđĭ kyar bruă duh mkra jing bruă klam phŭn, mguôp hŏng mta kñăm bi hrĭ ƀun hơĭt kjăp lehanăn mkŏ mkra krĭng ƀuôn sang mrâo.

Hlăm wưng thŭn 2025 – 2030, să Tu Mơ Rông mâo mta kñăm mđĭ hnư hrui wĭt kah knar grăp čô truh 63 êklăk prăk/thŭn. Čiăng dưi mâo mta kñăm anei, să ruah bruă lŏ hma jing phŭn, hlăm anăn ana kphê jing mnơ̆ng phŭn. Hlăm 2 thŭn păn bruă, să gĭr mđĭ kyar 300 ha kphê, ƀrư̆ mjing krĭng pla mƀĭn sa anôk. Võ Trung Mạnh, Khua bruă Đảng să Tu Mơ Rông, čar Quảng Ngãi brei thâo, alŭ wăl dôk pŏk ngă hdră mkra mrô krĭng pla čiăng kơ hdră anăn knăl kphê Tu Mơ Rông, mđing truh hnơ̆ng čuăn ba čhĭ kơ ala tač êngao.

“Sa hlăm 6 bruă klam phŭn mơ̆ng să jing gĭt gai kjăp bruă bi mlih hdră mĭn, hdră ngă mphŭn mơ̆ng knuă druh, đảng viên. Knuă druh, đảng viên amâo kah mbha bruă Đảng, mặt trận să amâo dah anôk bruă sang čư̆ êa să dưi nao hgŭm hlăm bruă klă klơ̆ng, mơ̆ng bruă mjut mjing, mđing truh kơ bruă ksiêm dlăng, mtrŭt mjhar. Ksiêm dlăng tinei jing ngă bruă, bi ksiêm dlăng, amâo djŏ guôn leh kơh ksiêm dlăng.

Dŭm boh tŭ lehanăn hdră ngă mơ̆ng nah gŭ ti Tu Mơ Rông jing klei bi êdah klă kơ ai tiê ba Hdră mtrŭn Klei bi kƀĭn bruă Đảng čar Quảng Ngãi gưl tal 1, wưng thŭn 2025 – 2030 mŭt hlăm klei hdĭp. Dŭm alŭ wăl mguôp hŏng hdră mđĭ kyar bruă duh mkra hŏng mkra mđĭ klei hdĭp mnuih ƀuôn sang, mnuih ƀuôn sang jing phŭn, jing tur knơ̆ng ba Quảng Ngãi đĭ kyar pral, hơĭt kjăp hlăm wưng mrâo.

Bruă Đảng čar Quảng Ngãi bi mklă hdră ksiêm dlăng kjăp, mtô mblang jing bruă klam phŭn, pŏk ngă tŭ dưn hdră mtrŭn mơ̆ng čar truh kơ nah gŭ. Hồ Văn Niên, Khua bruă Đảng čar Quảng Ngãi mtă kơ bruă Đảng, bruă knŭk kna mjêč mkŏ mkra hdră ngă bruă, hdră kčah klă klơ̆ng, mguôp hŏng klei đua klam mơ̆ng pô djă akŏ.

“Mtrŭt mđĭ bruă hluê ngă dŭm hdră phŭn, mâo klei bi mguôp, mjing boh kdrŭt lar bra, mtrŭt mđĭ kyar hdră duh mkra – ala ƀuôn. Ksiêm dlăng dŭm hdră dôk kpăk đuôm mơ̆ng sui čiăng ruh mtlaih jih klei gun kpăk, mđĭ pral wưng hluê ngă amâo dah msir mghaih djŏ hdră mtrŭn, amâo ngă luič liê./.