Ayŏng Trần Hải Đăng, Khua rŭ mdơ̆ng hdră bruă XL02, êlan Vũng Áng – Bùng, kdrêč êlan găn čar Quảng Bình brei thâo: Ară anei anôk bruă dôk iêô mkrum hlăm brô 800 čô mnuih mă bruă kƀĭn rŭ mdơ̆ng hruê mlam, jih gưl Tết kñăm rơ̆ng hnơ̆ng hdră bruă:

“Hdră bruă mâo nanao pui mtrang mngač, hnêč yan adiê găl ênưih, hmei mbha 3 gưl mă bruă jih hruê mlam. Ti dŭm anôk rŭ mdơ̆ng êlan phŭn hdră bruă msĕ si klei dăp, tur, hmei mbha đ’điêt jing dŭm anôk rŭ mdơ̆ng nanao. Gưl Tết wĭt gŏ sang mơak snăk, ƀiădah kyua bruă klam mbĭt, hmei lŏ dôk hlăm anôk mă bruă, đru mguôp ai tiê pô, gĭr bi leh hdră bruă yuôm bhăn mơ̆ng ala čar.”

Amâodah dŭm anôk hdră bruă mkăn hlăm kluôm ktuê êlan dơ̆ng êran pral Dưr- Dhŭng, dŭm anôk bruă rŭ mdơ̆ng dôk mjêč mŭt hlăm êlan Dưr - Dhŭng, dŭm anôk bruă dôk mjêč mŭt hlăm bruă mjêč, mđĭ truh kơ klei kñăm, đru hlue ngă tŭ dưn hdră kñăm 3000km êlan dơ̆ng êran pral hlue si klei Khua Knŭk kna mtă. Ai tiê bi lông anei mâo phung lĭng kahan Binh đoàn 12 mđĭ pŏk ngă, hŏng ai êwa leh anăn klei gĭr lu, msĕ si klei kah mbha mơ̆ng Đại tá Nguyễn Tuấn Anh, K’iăng Khua gĭt gai Binh đoàn 12, K’iăng Khua Knơ̆ng bruă rŭ mdơ̆ng Trường Sơn:

Rŭ mdơ̆ng dŭm ktuê êlan êran pral, hmei mđing kơ bruă hdră mnêč rŭ mdơ̆ng ti tur lăn awăt. Brei dŭ mdiăng bi leh kơh ngă bruă mkăn. Čiăng rơ̆ng hnơ̆ng, hmei iêô mkrum ba nao masin kdrăp mnơ̆ng djăp ênŭm, mơ̆ng anăn iêo mkrum hlăm gưl anei kƀĭn mnuih mă bruă čiăng rŭ mdơ̆ng hdră bruă, rơ̆ng kơ hnơ̆ng leh anăn hnơ̆ng jăk êlan dơ̆ng êran pral.”

  Thŭn 2025 anei, ƀuôn prŏng Hồ Chí Minh ăt pŏk ngă lu hdră bruă êlan klông yuôm bhăn, hlăm anăn mâo dŭm hdră bruă êlan dơ̆ng êran pral, mkŏ hŏng dŭm êlan klông găn ƀuôn prŏng. Bùi Xuân Cường, K’iăng Khua Knơ̆ng bruă sang čư̆ êa ƀuôn prŏng Hồ Chí Minh,brei thâo, mđing kơ gưl bi lông 500 hruê mlam bi leh dŭm hdră bruă, srăng kƀĭn bi lông rŭ mdơ̆ng dŭm hdră bruă yuôm bhăn hŏng ai tiê leh anăn klei gĭr mkŏ dŭm hdră bruă êlan dơ̆ng êran pral leh anăn dŭm hdră bruă êlan klông yuôm bhăn, đru mđĭ kyar bruă duh mkra- ala ƀuôn mơ̆ng ƀuôn prŏng Hồ Chí Minh leh anăn kluôm krĭng nah Dhŭng:

Êlâo kơ Tết Nguyên Đán srăng mâo hlăm brô 10 hdră bruă lŏ dơ̆ng pŏk ngă. Mbĭt anăn êlan 3, mơ̆ng ai tiê pŏk ngă klei bi lông mơ̆ng Khua knŭk kna, snăn kƀĭn bi lông rŭ mdơ̆ng êlâo kơ leh hlăm thŭn 2025, čiăng ba hlăm klei ba yua hlăm êlan dlông 15 km, mkŏ hŏng êlan dơ̆ng êran pral ƀuôn prŏng HCM- Long Thành – Giầu Dây mkŏ hŏng tač êdeh phiơr prŏng Long Thành. Mđĭ lar ai tiê bi lông, mđĭ lar hnơ̆ng dŭm hdră bruă rơ̆ng mđĭ lar hlăm thŭn 2025 čiăng pŏk ngă hdră bruă êlan dơ̆ng êran pral rơ̆ng hnơ̆ng. Êngao anăn, srăng kƀĭn pŏk ngă hdră bruă msĕ si kdrŭn dŭ mdiăng mnơ̆ng lu ala čar Cần Giờ.

Hlăm hruê akŏ thŭn anei, Khua phŭn bruă êlan klông dŭ mdiăng Trần Hồng Minh nao ksiêm dlăng, êmuh hrăm dŭm anôk rŭ mdơ̆ng êlan dơ̆ng êran pral Dưr - Dhŭng. Mrâo anei, hlăm 2 hdră bruă êlan dơ̆ng êran pral Vũng Áng - Bùng leh anăn Bùng - Vạn Ninh, kdrêč găn čar Quảng Bình mtă kơ phung bi liê, phung duh bi liê ktuê dlăng hnơ̆ng, ba nao kdrăp masin rŭ mdơ̆ng jih hruê Tết čiăng kơ êdeh êdâo găn êrô hlue si hdră kčah. Hlue si Trần Hữu Hải,  Khua Anôk bruă kriê dlăng hdră bruă 6, pô duh bi liê hdră bruă, čiăng rơ̆ng hnơ̆ng hdră bruă, Anôk bruă mtă kơ phung rŭ mdơ̆ng brei mbŏ kdrăp mnơ̆ng, mmông  mă bruă, êpul mă bruă, ngă nanao jih hruê Tết čiăng rơ̆ng hnơ̆ng kčah. Truh wưng anei, hnơ̆ng rŭ mdơ̆ng mâo êbeh 70%, mĭn tĭng srăng bi leh êlâo kơ gưl 30/4/2025.

 Djŏ tuôm kơ bruă ruh mgiah anôk ala ti alŭ wăl, Trần Phong,  Khua Knơ̆ng bruă sang čư̆ êa čar Quảng Bình brei thâo, truh ară anei, čar jao leh klă klơ̆ng anôk kơ dŭm anôk rŭ mdơ̆ng. Khădah snăn, ară anei  kdrêč êlan găn alŭ wăl ăt adôk hlăm brô 40 gŏ êsei mnuih ƀuôn sang čang hmăng mbĕ đuĕ kơ anôk dôk mrâo. Kơ bruă anei, Khua phŭn bruă Trần Hồng Minh brei thâo, anei jing klei čang hmăng djŏ klă, brei mâo mmông leh anăn hdră msir ruh mgaih. Êlâo hĭn Phŭn bruă leh anăn phung rŭ mdơ̆ng srăng kƀĭn čiăng rŭ mdơ̆ng bi leh hlăm gưl hruê 30/4/2025. Boh nik, thŭn 2025, hŏng bruă ba lu hdră bruă phŭn bruă êlan klông dŭ mdiăng ngă bruă, mbĭt anăn bi leh hdră kñăm 3.000 km êlan dơ̆ng êran pral jing bruă klam brei mâo klei kƀĭn jih hnơ̆ng čiăng bi leh. Khua phŭn bruă êlan klông dŭ mdiăng Trần Hồng Minh, ƀuăn rơ̆ng:

Lu klei gun kpăk, dleh dlan mâo kƀĭn ruh mgaih msĕ si hdră ruh mgaih anôk ala, mnơ̆ng dhơ̆ng rŭ mdơ̆ng, duh kơ dŭm hdră bruă, boh nik krĭng nah Dhŭng. Truh ară anei, hnơ̆ng dŭm hdră bruă phŭn dưi rơ̆ng. Dŭm hdră bruă êlan dơ̆ng êran pral Dủ - Dhŭng msĕ si êlan dơ̆ng êran pral Quảng Ngãi – Khánh Hoà mĭn tĭng srăng êbeh hdră kčah 3-6 mlan. Phŭn bruă srăng mđĭ klei bi hgŭm, rơ̆ng ngă jăk bruă klam thŭn 2025.

 Ksiêm dlăng ai tiê gĭt gai mơ̆ng Khua knŭk kna: “Klei dleh dlan ti anôk snăn ruh mgaih tinăn” leh anăn “Amâo dưi lač hơơh, amâo dưi lač dleh ôh”, Phŭn bruă êlan klông dŭ mdiăng pral bi hgŭm hŏng dŭm phŭn bruă, dhar bruă djŏ tuôm mkŏ mjing êpul mă bruă hŏng dŭm alŭ wăl pŏk ngă hdră msir, đru kơ phung rŭ mdơ̆ng ruh mgaih klei dleh dlan kơ mnơ̆ng rŭ mdơ̆ng, mđĭ đru kơ hdră bruă êlan klông truh hdră kñăm, hlue ngă hdră kñăm 3000km êlan dơ̆ng êran pral hlăm thŭn 2025 anei djŏ tui si hdră kčah, đru mguôp mđĭ kyar bruă duh mkra lăn čar hlăm wưng mrâo./.