Klei bi kƀĭn tal XIV mâo akŏ: “Ti gŭ hla čhiăm gru hing ang mơ̆ng Đảng, hrăm mbĭt, sa ai ngă tŭ dưn dŭm mta kñăm mđĭ kyar lăn čar truh thŭn 2030, čŏng pô hdră êlan, đĭ kyar hlăm ênuk kpưn đĭ mơ̆ng djuê ana, kyua klei êđăp ênang, êngiê, ngă phŭn, mdrŏng ktang, mrâo mrang, yâo mơak, hơĭt kjăp truh kơ yang ƀuôn ngă phŭn”. Klei bi kƀĭn tal XIV mơ̆ng Đảng bi leh hdră kčah mtrŭn, hŏng bruă klam ksiêm wĭt bruă hluê ngă Hdră mtrŭn Klei bi kƀĭn tal XIII mguôp hŏng hdră ksiêm wĭt 40 thŭn mlih mrâo, mñă klă dŭm boh tŭ yuôm bhăn, hưn mdah dŭm klei êdu kƀah, bi mklă mta phŭn, klei hriăm prŏng, mâo boh yuôm hlak mblang lehanăn boh sĭt kơ hdră mkŏ mkra, mđĭ kyar ala ]ar, bi trông lehanăn bi mklă hdră êlan, bruă klam phŭn kơ wung thŭn 2026 - 2030, hnơ̆ng trah dlăng truh thŭn 2045, ksiêm dlăng klă lehanăn kluôm hdră mkŏ mkra Đảng, anôk bruă kđi čar doh mngač, kjăp ktang, ruah Anôk dlăng bruă Đảng gưl dlông tal XIV.

Hŏng ai tiê mlih mrâo, đua klam anăp Ala čar lehanăn Djuê ana, Klei bi kƀĭn ruah leh Anôk dlăng bruă Đảng gưl dlông tal XIV mâo 200 čô, mâo 180 čô khua êmua klă klơ̆ng lehanăn 20 čô khua êmua mkăp.

Aguah 23/1, Anôk dlăng bruă Đảng gưl dlông tal XIV mkŏ mjing leh Klei bi kbiƀn tal sa, ruah Phŭn bruă kđi čar, Khua gĭt gai Đảng, Khua hlăm Anôk bruă Đảng, Dhar bruă ksiêm dlăng Đảng gưl dlông, Khua dhar bruă ksiêm dlăng gưl dlông Đảng tal XIV.

Klei bi kƀĭn phung bi ala kluôm ala tal XIV mơ̆ng Đảng tŭ jing jăk siam jing klei bi êdah mơ̆ng knhuah gru hgŭm mguôp mơ̆ng Đảng, bi êdah klei đăo knang lehanăn čang hmăng kyua sa Việt Nam êđăp ênang, hnŭk êngiê, ngă phŭn mil pô, sah mdrŏng, kreh dhar, yâo mơak, mŭt hlăm ênuk gưl mrâo, ênuk gưl đĭ kyar sah mdrŏng tigŭ klei gĭt gai mơ̆ng Đảng, mkŏ mkra ala čar Việt Nam yang ƀuôn êngiê ngă phŭn./.