Kơ 8 mta bruă hlăm jih hlăm jih klei hlue ngă dŭm hdră êlan kluôm. Nai prĭn Bàn Tuấn Năng, Hlăm êpul hgŭm bruă kreh knhâo mda asei Việt Nam, mâo klei mđing êdi kơ dhar kreh lehanăn anak mnuih: Atur knơ̆ng kơ ai tiê yang ƀuôn, ai ktang hlăm klei hdĭp boh kdrŭt kơ klei mđĭ kyar lăn čar. Klei hâo mdah ti anôk kƀĭn prŏng 14 mơ̆ng Đảng mñă leh: “Đĭ kyar kjăp êlâo hĭn jing knang kơ anak mnuih lehanăn dhar kreh. Bi mkŏ mjing lehanăn ngă jih jang tŭ dưn hlăm lăn čar, klei tŭ dưn kơ dhar kreh, klei tŭ dưn mơ̆ng găp djuê lehanăn ênoh čuăn mơ̆ng anak mnuih Việt Nam bi năng hŏng klei mđĭ kyar ênuk gưl mrâo…” Nai prĭn Bàn Tuấn Năng mblang:

Dhar kreh mâo yap nanao jing atur krơ̆ng kjăp kơ ai tiê. Boh phŭn kơ ai tiê mjing klei ktang hlăm klei hdĭp, pioh kơ klei mđĭ kyar lăn čar. Lač kơ klei bluh đĭ hlăm bruă mjuăt bi hriăm wưng leh êgao, brei drei ƀuh mâo dŭm hdră êlan msĕ si: Amâo lŏ hrui mă ôh prăk hriăm kơ phung hđeh, bi sa hnơ̆ng jih jang hdruôm hră hriăm hlăm kluôm ala… Anei jing klei bluh đ prŏng, kut kat mâo leh khua gĭt gai Đảng kiă kriê, lehanăn knŭk kna, dŭm phŭn dhar bruă hlăk dôk ngă.”

Nguyễn Quang Đồng, Khua anôk bruă ksiêm duah hdră êlan lehanăn klei mđĭ kyar klei hâo hưn (IPS) bi mni kơ mta bruă kreh knhâo, kdrăp mrâo, klei bi mlih hŏng klei knhêč, lehanăn bruă bi mlih mrô: Boh phŭn kơ klei mđĭ kyar. Ñu lŏ brei thâo:

Drei ƀuh leh hdră mđĭ kyar bruă hâo hưn hlăm 40 thŭn leh klei mlih mrâo, mâo ngă leh truh ti hnơ̆ng dưi ngă. Tơdah amâo mâo ôh klei duh bi liê prŏng kơ bruă kreh knhâo kdrăp mrâo, amâo srăng dưi mđĭ hĭn ôh klei mlih mrâo, amâo mâo lŏ đĭ ôh klei tŭ dưn bruă knuă, mơ̆ng anăn čiăng mđĭ kơhưm mơ̆ng Việt Nam hŏng jih jang bruă hlăm ala čar, lehanăn hŏng jih jang klei tŭ dưn hlăm tar rŏng lăn. Kyuanăn, klei mĭn čiăng mâo klei bluh đĭ prŏng kơ bruă kreh knhâo kdrăp mrâo jing klei amâo mâo dưi hngah ôh msĕ si hră mơar mơ̆ng klei bi kƀĭn tă leh.”

Sa ai hŏng klei mĭn anăn, Vũ Hoàng Liên, Khua êpul hgŭm Internet Việt Nam, bi êdah klei sa ai prŏng hŏng jih jang hdră êlan prŏng kơ klei mđĭ kyar bruă kreh knhâo, kdrăp mrâo, kơ dhar kreh lehanăn anak mnuih mâo bi êdah leh hlăm klei hâo mdah hlăm hră mơar klei bi kƀĭn prŏng 14 mơ̆ng Đảng: 

Klă sĭt jing djŏ hŏng klei găl mă bruă hlăm klei jing ti Việt Nam, anak mnuih Việt Nam. Klei kiă kriê msĕ snei, jing pral hŏng klei găl ti Việt Nam mjing klei bluh đĭ, sĭt nik bi jưh knang hlăm klei kreh knhâo, kdrăp mrâo, mlih mrâo hŏng klei knhêč, lehanăn klei bi mlih mrô./.