Ti ƀuôn prŏng Hà Nội, hlăm dŭm mlan mphŭn pŏk ngă Hdră mtrŭn Klei bi kƀĭn prŏng XVIII bruă Đảng ƀuôn prŏng wưng 2025–2030, lu hdră êlan prŏng dưi hlue ngă klă klơ̆ng hŏng dŭm hdră bruă mâo hnơ̆ng prŏng. Dua hdră bruă phŭn, anăn jing êlan dơ̆ng wăl anôk siam êa krông Hồng leh anăn Wăl ƀuôn prŏng mjuăt asei mlei Olympic dưi čang hmăng mjing knhuang đĭ kyar, pŏk êlan “Klei jăk siam krông Hồng”, hlăm wưng giăm. Khua hlăm Phŭn bruă kđi čar, Khua dlăng bruă Đảng ƀuôn prŏng Hà Nội Nguyễn Duy Ngọc brei thâo:

“Anei jing 2 hdră bruă yuôm bhăn, đru mđĭ kyar ƀuôn prŏng, krĭng dap mnai krông Hồng leh anăn kluôm ala, mđing mkŏ mjing klei jăk siam krông Hồng duh kơ klei kñăm đĭ kyar GRDP mơ̆ng 11 % kơ dlông hlăm thŭn mtam leh anăn jih wưng, mjing klei mrâo mrang kơ ƀuôn prŏng phŭn, jăk siam, jiă knhuah gru, mbruă, gĭr ktưn jing wăl ƀuôn prŏng mbruă mtah, thâo mĭn, mkŏ kluôm rŏng lăn”

Amâo djŏ knŏng Hà Nội ôh, hlăm kluôm ala, lu alŭ wăl dôk hrăm mbĭt pŏk ngă anôk bruă nah gŭ phŭn, mơ̆ng êlan klông, wăl tuh tia mkra mjing kdrăp mrâo truh kơ wăl anôk hdĭp mda, mjing boh kdrŭt lar bra klei đĭ kyar.

 Hlăm boh klei dlông rŏng lăn mâo klei bi mlih ktang, bruă duh mkra kluôm mơ̆ng Việt Nam lŏ dưi krơ̆ng kjăp. Wưng 2021–2025, đĭ kyar GDP kah knar mâo 6,3%, hjăn thŭn 2025 mâo 8,02%; hnơ̆ng bruă duh mkra đĭ 514 êklai USD, dăp tal 32 dlông rŏng lăn; GDP kah knar grăp čô mnuih êbeh 5.000 USD. Klei prăk luč ênoh dưi ksiêm dlăng, klei bi knar prŏng mơ̆ng bruă duh mkra dưi rơ̆ng. K’iăng nai prŏng, nai prĭn Nguyễn Thường Lạng, Sang hră gưl prŏng bruă duh mkra ala ƀuôn, lač dŭm boh tŭ anei mâo klei yuôm bhăn snăk:

“Anei jing tur knơ̆ng kjăp kơ wưng đĭ kyar mrâo, hlăm anăn brei kƀĭn mlih mrâo mtah, mlih mrô; jhŏng khăt bi hrŏ hră mơar, mđĭ klei dưi kơ anôk bruă duh mkra čiăng mjing klei đĭ kyar kơ bruă duh mkra.”

Thŭn 2025, kluôm ala mâo giăm 300 êbâo anôk bruă duh mkra mkŏ mjing mrâo leh anăn lŏ wĭt ngă bruă; ênoh čih anăn mbŏ hlăm bruă duh mkra mâo giăm 6,4 êklai prăk. Krĭng wăl FDI lŏ dơ̆ng mâo bruă klam yuôm bhăn, hŏng ênoh bi liê hlue ngă wưng 2021–2025 mâo êbeh 158 êklai USD, brei ƀuh klei jăk mơ̆ng wăl bi liê Việt Nam.

Mŭt hlăm wưng 2026–2030, klei kñăm đĭ kyar GDP kah knar mơ̆ng 10%/thŭn kơ dlông dưi bi mklă. Dŭm hdră bruă nah gŭ phŭn msĕ si êlan êdeh treng êran pral Dưr - Dhŭng, anôk bruă nah gŭ mrô, êa pui êwa čuh, logistics; hŏng hdră tă mđĭ kyar bruă duh mkra ala ƀuôn mtah, duh mkra mrô, tuh tia mkra mjing “Make in Vietnam”, mbĭt anăn jing bruă ngă mơ̆ng bruă dhar kreh, hiu čhưn ênguê… srăng pŏk wăl đĭ kyar mrâo kơ lăn čar. Pô thơ̆ng kơ bruă duh mkra Nai prĭn Lê Duy Bình brei thâo:

Ai tiê čŏng ngă êlâo hĭn brei bi êdah hơĭt kjăo bruă duh mkra kluôm, hlăm klei thâo kriê dlăng hdră êlan ngăn prăk leh anăn mđĭ kơhưm mơ̆ng bruă duh mkra Việt Nam hlăm klei ñŭ kma hŏng lu ala čar.”

Hŏng klei đĭ kyar, dŭm klei êdah kdlưn kơ klei bhiăn, anôk bruă nah gŭ leh anăn mnuih mă bruă dưi pŏk ngă hrăm mbĭt. Klei bi kƀĭn Bruă kƀĭn ala gưl XV dưi lač jing klei bi kƀĭn hƀuê ênuk, hŏng lu klei bhiăn, hdră mtrŭn ruh mgaih klei kpăk đuôm kơ klei bhiăn, kơrŭ wĭt klei găl, bi mlih klei mĭn kriê dlăng mbruă jing mđĭ kyar, mjưh mdei klei dêč kơ bruă klam. Hŏng tur knơ̆ng kjăp dưi mkŏ mjing, Nai prŏng, nai prĭn Phan Xuân Sơn, Khua Anôk ksiêm hriăm kơ anak mnuih, đăo knang:

“Kâo đăo knang nanao hlăm klei đĭ kyar mơ̆ng djuê ana leh anăn đăo knang hlăm klei Đảng gĭt gai leh anăn djuê ana drei mâo sa klei jhŏng, sa knuih hdĭp dưi lač jing kjăp, mbruă, găn klei dleh dlan hlăm djăp ênŭk. Hlăk mŭt hlăm ênuk mrâo, drei ăt mđĭ lar knuih hdĭp jăk anăn leh anăn Đảng jing phŭn mơ̆ng đjuê ana. Ară anei klei bi kƀĭn tal 14 mơ̆ng Đảng jing hdră êlan mkŏ mjing sa Đảng jing êngao kơ klei hđăp snăn mâo klei jăk siam, knuih hdĭp snăn srăng ba djuê ana Việt Nam mŭt hlăm ênuk jăk siam msĕ si djuê ana mkăn dlông rŏng lăn”

Hŏng klei đăo knang kjăp hlăm klei Đảng gĭt gai, hŏng klei čang hmăng gĭr ktưn mơ̆ng jih djuê ana, kyua sa lăn čar Việt Nam mdrŏng sah, jăk mơak, bi knar hŏng dŭm ala čar mkăn hlăm êma krĭng, đảng viên leh anăn mnuih ƀuôn sang kluôm ala đăo knang, hŏng tur knơ̆ng boh tŭ mâo leh, hŏng ai tiê čŏng ngă, jhŏng, hŏng klei mĭn mlih mrâo leh anăn ngă bruă jih ai tiê, lăn čar drei srăng yua tŭ dưn  djăp klei găl, găn djăp klei dleh dlan, hlue ngă klei kñăm mđĭ kyar pral leh anăn kjăp./.