VOV4.Êđê - Hlăm gưl bluh đĭ klei ruă tưp Covid-19 tal 4 anei, čar Dak Lak mâo êbeh 1300 čô mnuih mâo klei ruă tưp Covid-19, jing čar mâo ênoh mnuih ruă lu hĭn ti krĭng Lăn Dap Kngư. Ênoh mnuih mâo klei ruă tưp đĭ hmar, klei ktrŏ hlăm bruă mdrao mgŭn ƀrư̆ hruê ƀrư̆ prŏng, grăp čô aê mdrao, nai mdrao dôk gui lu klei rŭng răng mdê mdê. Ƀiădah hlăm grăp anôk bruă mdê mdê, diñu ăt gĭr jih ai čiăng bi lông hŏng hruê mmông msưh kdŭn klei ruă tưp. Mâo lu phung ngă bruă lui leh bruă pô ti tluôn čiăng ngă bi leh bruă klam.

Ti wăl bi ktlah hjăn Anôk bruă sang hră lĭng kahan răng mgang klei êđăp ênang Sang hră gưl prŏng Lăn Dap Kngư, sa knưl bi hdơr mrâo dưi mkŏ mjing čiăng kơ amai Trần Thị Hương (kkiêng thŭn 1983) jing pô đru mdrao ti sang êa drao mdrao hluê ênhiang djuê ana Dak Lak dôk mă bruă tinei pioh hdơr kơ ama ñu djiê hlăk hruê 1-9. Êa ală êluh leh ñu knŏng dưi čang ênguôt kơ ama mơ̆ng kbưi, dưi ƀuh klei dơr ti ƀuôn sang Nam Định knŏng dưi ƀuh hlăm Zalo hlăm đĭng blŭ. Amai hương čang hmăng, klei ruă Covid-19 hnưm dưi msưh kdŭn čiăng amai dưi wĭt kơ sang čuh brui mngưi kơ msat ama ñu: “Yan mdei prŏng mrâo êgao kâo ăt mâo hdră kčah ba anak čô wĭt čiăng mơak hŏng aduôn aê kyua aduôn aê ăt khua thŭn leh, ƀiădah kyua klei ruă tưp amâo dưi wĭt ôh, ară anei ñu hlŏng đuê̆ nao hĕ anăn klei kčah bi tuôm amâo dưi hluê ngă ôh. Čang hmăng grăp čô mnuih hrăm mbĭt čiăng msưh kdŭn klei ruă tưp čiăng pô dưi wĭt kơ ƀuôn sang čuh brui mngưi kơ ama.”

15 thŭn mă bruă ti Anôk bruă ksiêm mkă –ksiêm dlăng rup- klei suaih pral mơ̆ng Anôk bruă ktuê dlăng klei ruă čar Dak Lak, amai Nguyễn Thị Kim Tuyền tlă anăp hŏng lu mta klei ruă tưp hlăm mnuih. Ƀiădah leh jing mnuih mă bruă hlăm Êpul hiu duah mrô 3, jing êpul phŭn hlăm hdră gang mkhư̆ klei ruă Covid-19 kơh ñu thâo jih klei dleh dlan, huĭ hyưt leh anăn klei săn asei sĭt ngă bruă klam.

Amai Tuyền brei thâo, êbeh 3 mlan êgao, leh klei ruă Covid-19 ti Dak Lak dleh ktuê dlăng, wăt tơdah aguah ưm amâodah mlam, sĭt ti anôk mâo mnuih ruă snăn êpul mơ̆ng ñu lŏ nao čiăng hiu duah. Khă gơ̆ mă bruă jih hruê, mlam hlăm chum ao rang mgang krĭp, ƀiădah bi mklă bruă mă mta ksiêm mkă jing yuôm bhăn bi mklă kơ bruă gang mkhư̆ klei ruă tưp, anăn diñu hnêč grăp mnĭt, grăp mmông čiăng bi leh bruă klam pral hĭn. Klei hdĭp grăp čô mnuih, klam jing sa čô mô̆, sa čô amĭ lui hĕ ti tluôn êjai: “Hnơ̆ng mmông snăn amâo hưn êlâo ôh, tăp năng aguah, tăp năng truh krah mlam Sĭt leh ngă bruă snăn kơh dưi huă ƀơ̆ng, lu blư̆ 1-2 mmông aguah kơh dưi huă, ƀơ̆ng êjai đuič. Aguah hruê êdei ăt kăn mâo mmông ngă êsei djam leh mơh, pô ƀơ̆ng ƀêñ mi amâodah mnăm êa. Ară anei mâo Zalo snăn pô iêu, pô ƀuh rup anak pô amâo thâo lŏ mjing ôh. Čiăng răng mgang kơ anak hŏng ung snăn pô ngă snăn yơh, kyua bruă knuă mơh.”

Mơ̆ng hruê 15/8, leh Anôk mdrao klei ruă tưp mơ̆ng Sang êa drao prŏng Krĭng Lăn Dap Kngư dưi bi mlih jing mdrao ơ phung mâo klei ruă Covid-19 kjham ti krĭng wăl Lăn Dap Kngư, 21 čô mâo phung mă bruă mdrao mgŭn, aê mdrao, phung kăp đru leh anăn phung ngă bruă hŏng kdrăp masin ngă bruă lu hĭn čiăng đru kơ phung ruă tlaih mơ̆ng klei djiê.

Aê mdrao chuyên khua II Trịng Hồng Nhựt, Khua Anôk bruă mdrao kơ phung djŏ mnơ̆ng ruă, klam bruă Wăl mdrao kơ phung djŏ Covid-19 kjham ti Sang êa drao prŏng Lăn Dap Kngư brei thâo, phung ruă ba tinei mâo lu klei ruă êlâo leh, leh anăn ênưih truh kơ djiê. Klei djiê hŏng hdĭp giăm snăk, phung aê mdrao hlăm anôk mdrao kơ mnuih ruă Covid-19 kjham gĭr jih hruê mlam, grăp mnĭt mmông gĭr hlăm bruă anei. “Hmei duah djăp hdră wăt klei ba yua jih klei găl, klei thâo, wăt ai tiê klei mĭn phung aê mdrao čiăng grăp mnĭt, grăp mmông dưi đru krơ̆ng klei hdĭp mnuih ruă ti anăp klei djiê.”

Klei gang mkhư̆ klei ruă Covid-19 adôk sui leh anăn mâo lu klei dleh dlan, phung mă bruă hlăm anôk phŭn gang mkhư̆ klei ruă tưp ti Dak Lak ăt dôk mđĭ klei mĭn, klei jhŏng, hruê mlam hiu duah phung tuôm bi tuôm hŏng mnuih ruă, kriê dlăng, rang mgang klei hdĭp mnuih ruă leh anăn yang ƀuôn, Diñu jing phung jhŏng ktang ngă bruă hgăm hlăm bruă gang mhư̆ klei ruă tưp.