Klei suaih pral jing ngăn dưn yuôm bhăn mơ̆ng grăp čô mnuih, lehanăn jing atur knơ̆ng yuôm bhăn kơ klei ala čar mđĭ kyar kjăp. Hŏng boh klei mrâo mâo lu klei lông dlăng kơ klei ruă tưp, kơ klei mnuih mduôn khua đĭ lu, klei čhŏ djhan wăl hdĭp mda, lehanăn klei bi mlih knhuah hdĭp, snăn bruă răng kriê bi kjăp klei suaih pral kơ mnuih ƀuôn sang jing leh bruă čuăn mjêč êdi. Hdră mtrŭn mrô 72-NQ/TW hrue 09/9/2025 mơ̆ng Phŭn bruă kđi čar kơ “Dŭm hdră jăk, kđiăm hĭn klei răng kriê lehanăn mđĭ klei suaih pral mnuih ƀuôn sang” mâo mkŏ mjing, jing leh knhuang yuôm bhăn kơ hdră mă bruă lehanăn tă êlan kjăp dưi ngă nanao tui si klei kut kat mơ̆ng Đảng hlăm bruă mdrao mgŭn.

Hlăm wưng thŭn 2026–2030, Hdră mtrŭn mrô 72 mâo leh klei čoh čuăn yuôm bhăn, jing rŭ mdơ̆ng hdră êlan mdrao mgŭn hlăm klei mtăp mđơr, hŏng klei jăk, mâo klei tŭ dưn, lehanăn ñŭ kma hŏng tač êngao, rơ̆ng kơ jih jang mnuih dưi mâo klei dlăng kriê klei suaih pral, hŏng ênoh djŏ guôp, klă mngač:

- Mđĭ klei suaih ktang asei mlei, mđĭ klei thâo mĭn, mđĭ awan dhuan, lehanăn thŭn hdĭp jŏk mơ̆ng mnuih ƀuôn sang. Truh thŭn 2030, mđĭ awan dhuan kah knar mơ̆ng phung hđeh, lehanăn hđek êlăk mơ̆ng 1-18 thŭn lŏ thiăm ƀiă êdi 1,5cm; thŭn hdĭp jŏk kah knar truh 75,5 thŭn, hlăm anăn thŭn hdĭp suaih pral bi djăp 68 thŭn.

- Bi hrŏ klei ktrŏ kyua klei ruă duam, lehanăn dưi răng kriê djăp mta klei ênưih ba klei amâo mâo suaih asei mlei. Hnơ̆ng ênoh mâo tlŏ mgang djăp mta  vắc-xin hlăm hdră tlŏ mgang bi mâo êbeh 95%. Hnơ̆ng ênoh jih jang mnuih mâo nao hlăm klei mjuăt asei mlei lŏ đĭ thiăm 10%. 

Lŏ dơ̆ng kiă kriê bi kjăp ya mta klei jing amâo mâo jăk kơ asei mlei msĕ si kpiê, ƀiêr, hăt êhăng, lehanăn anôk hdĭp mda mơ̆ng lăn, lehanăn êa, êwa…

- Mnuih ƀuôn sang dưi mâo klei mkă dlăng mdrao mgŭn hŏng klei jăk, anăp truh kơ klei dlăng kriê klei suaih pral kluôm ênŭm.

- Mơ̆ng thŭn 2026, mnuih ƀuôn sang mâo mkă dlăng klei suaih pral jêñ jêñ, amâodah dưi ksiêk ruah dưi mkă dlăng klei suaih pral amâo mâo liê prăk ôh, ƀiă êdi 1 thŭn 1 blư̆, mâo ngă hră mơar kăp ktuê dlăng klei suaih pral tơl jih klei hdĭp, ƀrư̆ ƀrư̆ bi hrŏ klei ktrŏn kơ ênoh bi liê hlăm bruă mdrao mgŭn. truh thŭn 2030, mnuih ƀuôn sang dưi dưn hdră mdrao mgŭn amâo lŏ liê prăk kăk ôh , dôk hlăm knua klei dưn mơ̆ng hră ênua bruă mdrao mgŭn djŏ klei bhiăn.

- 100% boh sang êa drao ti gưl ƀuôn hgŭm mâo klei duh bi liê kơ bruă nah gŭ, kdrăp mdrao mgŭn, mnuih mă bruă tui si bruă klam mdê mdê, truh thŭn 2027 mâo ƀiă êdi mơ̆ng 4-5 čô phung aê mdrao. Mđĭ hĭn hnơ̆ng mkă dlăng mdrao mgŭn hŏng hră ênua mdrao mgŭn ti dŭm boh sang êa drao gŭl ƀuôn hgŭm êbeh 20%.

- Truh thŭn 2026, hnơ̆ng ênoh dưi luôm bruă mdrao mgŭn hŏng hră ênua mdrao mgŭn êbeh 95% ênoh mnuih, truh thŭn 2030 čiăng dưi mâo hnơ̆ng luôm ênŭm bruă ênua mdrao mgŭn hŏng jih jang mnuih, mđĭ hĭn djăp hdră mkŏ mjing hră ênua răng kriê klei suaih pral.

Tă êlan mă bruă hlŏng truh kơ thŭn 2045:

- Ktưn bi mâo anôk hdĭp mda jăk, mâo ênoh kơ hnơ̆ng mkă klei suaih pral mnuih ƀuôn sang, hnơ̆ng ênoh dưi luôm jih hdră êlan răng kriê klei suaih pral knar hŏng dŭm ala čar hlăm alŭ wăl lehanăn dlông rŏng lăn.

- Mnuih ƀuôn sang mâo thŭn hdĭp jŏk kah knar êbeh 80 thŭn, hlăm anăn thŭn hdĭp suaih jing êbeh 71 thŭn, awan dhuan, ai ktang, boh dlông kah knar mơ̆ng êdam êra jing knar hŏng dŭm ala čar mâo hnơ̆ng hdĭp đĭ kyar.

- Hdră êlan kơ klei mdrao mgŭn đĭ kyar, mtăp mđơr, tŭ dưn, kjăp, mă klei răng mgang klei ruă jing tal êlâo hĭn, čiăng dưi bi sĭt klei suaih pral knư̆ hrue knư̆ mâo mđĭ hĭn, lehanăn hŏng lu hdră êlan kơ mnuih ƀuôn sang.

Čiăng dưi bi sĭt hŏng ênoh čuăn lač anăn, Hdra mtrŭn mrô 72 kruak leh dŭm bruă čuăn, hdră mă bruă klă mmngač:

1.Mlih mrâo bi ktang klei mĭn, lehanăn hdră êlan mă bruă hlăm klei kiă kriê, gĭt gai, mkŏ mjing hlue ngă bruă răng mgang, dlăng kriê lehanăn mđĭ klei suaih pral mnuih ƀuôn sang.

2.Bi leh jih jang klei bhiăn mă bruă, mđĭ klei thâo hlăm bruă mdrao mgŭn, boh nik bruă răng mgang, bruă ti sang êa drao nah gŭ, mđĭ ai ktang mơ̆ng bruă mdrao mgŭn hŏng knhuuah djuê ana pô

3.Mjuăt hriăm knhuah jăk mơ̆ng phung nai aê mdrao , mjuăt bi hriăm jih jang phung aê mdrao mâo keli thâo sĭt, djŏ hŏng ai tiê mnuih ruă, lehanăn ñŭ kma hŏng ala tač êngao.

4.Mđĭ mlih hdră êlan ngăn prăk kơ bruă mdrao mgŭn, mâo klei tŭ dưn kjăp mơ̆ng hdră êlan mdrao mgŭn hŏng hră ênua mdrao mgŭn.

5.Mđĭ kyar bruă kreh knhâo, kdrăp mrâo, mlih mrâo hŏng klei knhêč, lehanăn bi mlih mrô kluôm dhuôm hlăm bruă dlăng kriê klei suaih pral.

6.Mđĭ kyar anôk bruă mdrao mgŭn êngao knŭk kna, iêo jak jih ai dưi mă bruă hŏng klei tŭ dưn, jih jang ai ktang kơ bruă mđĭ kyar bruă mdrao mgŭn.

Hdră mtrŭn mrô 72 mâo klei yuôm bhăn hlăm hdră êlan mđĭ kyar lăn čar. Sa ala čar knŏng dưi mâo klei đĭ kyar, knŏng tơdah jih jang mnuih ƀuôn sang mâo klei suaih pral. Duh bi liê kơ bruă mdrao mgŭn, jing klei duh bi liê kơ êdei anăp, kơ mnuih mă bruă jing boh phŭn kơ klei mđĭ kyar bruă duh mkra ala ƀuôn.

Hdră mtrŭn amâo mâo djŏ knŏng mghaih msir dŭm mta klei awăt kƀah hlăm bruă mdrao mgŭn ară anei, ƀiădah lŏ mjing klei mđĭ kyar pral wăt hlăm klei mĭn, lehanăn klei mă bruă. Bruă bi mlih mơ̆ng “mdrao klei ruă” nao kơ bruă “Dlăng kriê klei suaih pral kluôm dhuôm”, mơ̆ng klei amâo čŏng răng truh kơ klei čŏng ngă êlâo, mơ̆ng klei mdrao mgŭn, nao kơ bruă răng mgang êlâo, jing knhuang yuôm bhăn, djŏ guôp hŏng hdră êlan mđĭ kyar dlông rŏng lăn.

Mbĭt anăn, hdră mtrŭn mrô 72 đru bi kjăp jih jang klei đăo knang mơ̆ng mnuih ƀuôn sang hlăm bruă mdrao mgŭn, mđĭ hĭn hnơ̆ng tŭ hlăm klei hdĭp lehanăn hnơ̆ng ênoh klei jăk jĭn gưl lăn čar. Anei ăt jing klei yuôm bhăn đru kơ Việt Nam mđĭ hĭn ai dưi bi ktưn lehanăn k’hưm pô hŏng tar rŏng lăn./.