Amai Võ Thị Tuyết Nhung, anôk bruă mdrao mgŭn tian prôč jing sa klei bi hmô jăk. 9 thŭn siă suôr hŏng bruă, amâo mâo djŏ knŏng kreh kruiñ hlăm bruă knuă dlăng kriê lehanăn mdrao mgŭn phung hđeh, amai lŏ lu blư̆ jing mnuih thâo myơr êrah, hlăm dŭm klei čiăng kơ êrah hŏng klei mjêč. Truh kơ ară anei, ñu mâo leh truh 22 ngă klei myơr êrah msĕ snăn, hmao đru dŏng lu mnuih ruă čiăng kơ êrah hŏng klei mjêč dưi tlaih mơ̆ng klei djiê. Hŏng ñu, grăp blư̆ brei êrah snăn jing lŏ thiăm sa klei găl dŏng hdĭp mnuih ruă.

“Hlăm klei đru dŏng mjêč snăn kâo mâo mtam klei mĭn mkăp brei êrah kơ mnuih riêng gah, brei kơ digơ̆ lŏ mâo thiăm wưng găl hlăm klei mdrao mgŭn. Grăp blư̆ mmông msĕ snăn jing kâo lŏ mâo ngă leh sa bruă jăk hŏng mnuih mkăn. Amâo mâo djŏ hjăn kâo ôh hlăk dôk ngă klei anei kơ jih jang mnuih, mâo mbĭt hŏng ung kâo, amĭ kâo, ayŏng amai adei kâo, jing păt jih mnuih hlăm gŏ sang nao hlăm klei myơr êrah sơăi. Ƀiădah grăp blư̆ mâo klei dŏng mdrao mjêč, dôk čiăng kơ êrah hŏng klei mjêč mơh snăn hmei mtam yơh mprăp ai tiê nao myơr êrah.”

Mbĭt hŏng Nhung, klei myơr êrah jing leh klei mưng hŏng phung knuă druh, nai êa drao hlăm sang êa drao mdrao hđeh Gia Lai. Khua adŭ bruă msĕ si amai Đỗ Thị Thu Hà brei thâo:

“Kâo bi mĭn sa aruăt êrah drei brei jing sa klei hdĭp lŏ hdĭp, anăn jing bruă nga yuôm bhăn êdi. Snăn êjai pô myơr êrah pô amâo mâo mĭn jing sa mta bruă prŏng prĭn ôh. Kyuadah êjai ƀuh mnuih ruă hlăk dôk čiăng mjêč kơ êrah, êjai anăn pô mâo klei dưi pô myơr yơh.”

Amâodah mnuih ti gưl prŏng hĭn msĕ si aê mdrao Rmah Din ăt lu blư̆ leh mơh myơr êrah, ñu lač:

“Jih jang phung nai aê êa drao ti sang êa drao hđeh anei mâo sơăi ai tiê čiăng myơr êrah pioh dŏng mdrao mnuih ruă. Hŏng ai tiê jing kyua mnuih ruă yơh jing tal êlâo, snăn phung nai aê êa drao thâodah mnuih mă bruă mkăn hlam sang êa drao ăt sa ai hlăm klei myơr êrah pioh dŏng đru mnuih ruă.”

Ƀuh klei dôk mdrao mnuih ruă mâo mta klei ruă lik êrah mơ̆ng tian amĭ  (Thalassemia) mơ̆ng anak ñu ti sang êa drao mdrao hđeh Gia Lai, amai Nông Thị Tươi, dôk ti ƀuôn hgŭm Ia Piơr mgei ai tiê ti anăp klei hur har mơ̆ng phung nai aê mdrao tinei. Hlăm dŭm mmông dôk mjêč snăn hlăm klei mdrao mgŭn, êjai anăn ênoh êrah hlăm sang êa drao hlăk kƀah, snăn phung nai aê mdrao mtam yơh amâo mâo lŏ ngĭ ngư̆ ôh, myơr mtam êrah pô pioh dŏng mdrao mnuih ruă ti sang êa drao anei.

“ĕ điêt hlăm sang mâo klei ruă lik êrah mơ̆ng tian amĭ, lehanăn grăp mlan hriê kơ sang êa drao anei mbŏ êrah, mbŏ êrah jêñ jêñ yơh. Lehanăn tinei mprăp nanao ai tiê klei myơr êrah kơ phung hđeh hlăm klei mdrao mgŭn.”

Dŭm aruăt êrah kyua klei khăp, amâodah knŏng mguôp leh sa kdrêč klei dŏng hdĭp mnuih ruă, ƀiădah lŏ bi lar knhuah siam hlăm klei thâo myơr êrah bŏ hŏng klei khăp hlăm yang ƀuôn anei. Anei jing klei bi knăl kơ knhuah “nai êa drao msĕ hŏng amĭ” êjai phung nai aê mdrao amâo mâo djŏ knŏng ngă bruă mdrao mgŭn, ƀiădah lŏ mơĭt klei čang hmăng hlăm klei hdĭp kơ mnuih mkăn, hŏng bruă ngă dlăng hơăi mang điêt dhiêt anăn, ƀiădah jing yuôm bhăn snăk./.