VOV4.Êđê- Mlan mbrue (24/10), Knăm mđup brei klei pah mni hră klei mrâo ala čar tal 15 mkŏ mjing leh ti Sang Dhar kreh ngă bruă hgŭm mbĭt Việt Xô, Hà Nội. Anei jing klei pah mni kreh mkŏ mjing prŏng, mâo k’hưm hĭn êdi mơ̆ng phung ngă bruă klei mrâo hlăm ala čar. Nao hlăm knăm anei mâo Khua Lăn Čar Nguyễn Xuân Phúc mbĭt hŏng kphung khua kiă kriê Đảng, knŭk kna. Klei pah mni hră klei mrâo tal 15 thŭn 2020 mâo ênoh phung bi lông lu hĭn mơ̆ng êlâo dih truh kơ ară anei, hŏng êbeh 1800 mta klei ba bi lông hriê mơ̆ng 63/63 Êpul hgŭm bruă klei mrâo čar, ƀuôn prŏng. Hlăm ênoh anei, mâo 150 mta klei bi lông truh kơ gưl knhal tuič. Anei jing klei bi lông hră klei mrâo ala čar mâo hrŏng ruah 1 klei pah mni yuôm bhăn, mbĭt hŏng anăn, Êpul gơ̆ng mđup brei 9 klei pah mni ênoh A, 25 klei pah mni ênoh B, 45 klei pah mni ênoh C, lehanăn 32 klei pah mni mđĭ ai kơ dŭm mta hră klei mrâo. Sang mđung asăp blŭ Việt Nam mâo mă truh 3 klei pah mni ênoh B, 1 klei pah mni ênoh C lehanăn sa klei pah mni mđĭ ai./.

Pô mblang: Y-Khem Niê