VOV4.Êđê - Aguah mbruê, mkŏ mjing leh klei bi lông knhal tuič leh anăn knăm mđup brei klei pah mni klei bi lông Hđeh êdam êra thâo mbruă kyua yan adiê thŭn 2021 hŏng êlan online. Klei bi lông anei dưi mkŏ mjing mơ̆ng hruê 25/5/2021 kơ jing jang mnuih ƀuôn sang mơ̆ng 16-25 thŭn dôk hdĭp hlăm ala čar, leh anăn mơ̆ng êpul bruă Đoàn gưl dlông ƀuôn prŏng Hồ Chí Minh bi mguôp hŏng hdră êlan mđĭ kyar mơ̆ng Êpul hgŭm lu ala ti Việt Nam mkŏ mjing.

Boh phŭn klei bi lông dar wil hlăm akŏ hđeh êdam êra hŏng dŭm hdră êlan thâo mbruă čiăng mđĭ klei thâo srăng kơ klei mlih yan adiê, dŭm hdră êlan bi hrŏ klei mlih yan adiê leh anăn êwa čhŏ sang ală kĭng. Leh hruê mmông ksiêm dlăng, bi klă, êpul ksiêm dlăng čuăn ruah leh 10 êpul bi lông hŏng 10 klei kčĕ kdlưn čiăng bi lông ti knhal tuič. Ayŏng Nguyễn Văn Hiển, dôk ngă bruă ti kđông kahan knông lăn Si Pa, knơ̆ng gĭt gai lĭng kahan čar Điện Biên mâo klei kdlưn hĭn hlăm klei bi lông, mâo mă hră pah mni mơ̆ng êpul bruă Đoàn gưl dlông leh anăn ênoh prăk đru mđĭ kyar bruă ngă anăn mâo ênoh 50 êklăk prăk.

Y Ƀel pô mblang