VOV4.Êđê - Tlam 28/10/2021, Khua knŭk kna Phạm Minh Chính mbĭt hŏng phung khua gĭt gai ASEAN, nao hlăm Knăm mjưh ruê̆ Klei bi kƀĭn gưl dlông ASEAN tal 38 leh anăn 39 leh anăn dŭm Klei bi kƀĭn gưl dlông djŏ tuôm leh anăn Knăm jao ngă Khua gĭt gai ASEAN thŭn 2022 kơ Ala mtao Campuchia. Blŭ hrăm ksiêm wĭt hŏng bruă klam jing Khua gĭt gai ASEAN thŭn 2021, Ala mtao Brunei bi mklă amâo uên kơ klei dleh dlan kyua klei ruă Covid-19 dleh ktuê dlăng, ASEAN lŏ dơ̆ng đĭ kyar ktang. Mđing truh kơ êdei anăp, Ala mtao Brunei mtă brei lŏ dơ̆ng mđĭ dŭm klei gĭr mkŏ mjing Êpul êya ASEAN mơ̆ng tur knơ̆ng mđĭ klei mĭn lu tĭng leh anăn mkŏ mjing sa klei bhiăn kjăp ktang ti krĭng wăl. Tŭ ngă bruă klam jing Khua gĭt gai ASEAN thŭn 2022, Khua Knŭk kna Campuchia hưn mdah akŏ thŭn  Khua gĭt gai ASEAN 2022 jing “ASEAN ngă bruă mdrơ̆ng hŏng dŭm klei lông dlăng” kyua klei djŏ, êđăp ênang leh anăn mdrŏng sah ti krĭng wăl, mđĭ ktang mkŏ mjing sa êpul êya mtăp mđơr, kjăp ktang leh anăn kluôm ênŭm djŏ guôp hĭn hŏng ai tiê phŭn mơ̆ng ASEAN hrăm mbĭt mđĭ sa hnơ̆ng trah dlăng, sa klei jăk, sa êpul êya.

H Zawut pô mblang