VOV4.Êđê - Tlam hruê 3/10, êpul mâo giăm 1.300 čô mnuih mơ̆ng dŭm čar dôk bluh mâo klei ruă ti kwar Dhŭng đĭ êdeh p’phŭt wĭt leh kơ ƀuôn sang truh ti Kon Tum.

Ti anôk gak răng ksiêm dlăng klei ruă tưp mrô 1 Sao Mai, hlăm să Hòa Bình, ƀuôn prŏng Kon Tum, ktuê êlan mơ̆ng nah Dhŭng mŭt hlăm čar, dŭm êpul djŏ tuôm tinei mkŏ mjing leh hdră ngă bruă kñăm gang mkhư̆ klei ruă Covid 19 lehanăn đru kơ mnuih ƀuôn sang wĭt kơ ƀuôn sang pô. Klei hưn mơ̆ng êpul djŏ tuôm ti anôk gak răng ksiêm dlăng klei ruă tưp mrô 1 Sao Mai, knŏng tlam hruê 3/10, mâo leh 644 boh êdeh p’phŭt hŏng giăm 1.300 čô mnuih mơ̆ng dŭm čar nah Dhŭng wĭt kơ ƀuôn sang truh ti čar Kon Tum.

Mơ̆ng hdră ksiêm dlăng, mâo 94 čô jing mnuih ƀuôn sang Kon Tum, 17 čô jing mnuih ƀuôn sang Quảng Ngãi, giăm 1.200 čô jing mnuih ƀuôn sang mơ̆ng Quảng Nam truh kơ Dưr. Kñăm rơ̆ng kơ hdră gang mkhư̆ klei ruă Covid 19 lehanăn rơ̆ng kjăp klei êđăp ênang hlăm hdră wĭt kơ ƀuôn sang găn alŭ wăl čar, Anôk bruă sang čư̆ êa ƀuôn prŏng Kon Tum ba nao leh 100 čô knuă druh, mnuih mă bruă lehanăn êpul djŏ tuôm nao đru gang mkhư̆ klei ruă tưp lehanăn đru kơ mnuih ƀuôn sang./.

H Nêč pô mblang