VOV4.Êđê- Ti čar Kon Tum mơ̆ng 5-10 truh hruê 6/10, bruă mdrao mgŭn alŭ wăl ƀuh nanao phung djŏ klei ruă leh anăn lŏ wĭt djŏ kman Sars-Cov-2. Anei jing phung mă bruă čŏng wĭt mơ̆ng čar Bình Dương. Klă klơ̆ng hlăm hruê 6-10,  bruă mdrao mgŭn čar Kon Tum ƀuh leh 4 čô djŏ kman Sars-Cov-2. Hlăm 4 čô F0 mâo 2 čô ti să Pô Kô, kdriêk Đăk Tô.

1 čô ti să Đăk Kan, kdriêk Ngọc Hôì leh anăn pô adôk sang ti să Đăk Ngọc, kdriêk Đăk Hà. Phung F0 anei dưi ba bi ktlah hjăn leh mơ̆ng čar Bình Dương wĭt truh ti Anôk ksiêm dlăng klei ruă tưp mrô 1 Sao Mai, ƀuôn prŏng Kon Tum hlăm hruê 4-10. Hlăm hruê 5/10, bruă mdrao mgŭn čar Kon Tum ăt ƀuh leh 12 čô lŏ wĭt djŏ kman Sars-Cov-2. Phung anei dưi mdrao klei ruă Covid-19 ti Bình Dương, čŏng wĭt ti čar leh anăn dưi ksiêm dlăng ti Anôk ksiêm mkă klei ruă mrô 1 Sao Mai, ƀuôn prŏng Kon Tum. Kon Tum ară anei jing čar sa anăn ti Lăn Dap Kngư ka ƀuh ôh mnuih ruă Covid-19 hlăm êpul êya.

Pô mblang: H’Zawut Ƀuôn Yă