VOV4.Êđê -  Yang hruê 21/10, sa čô hđeh sang hră adŭ 12C2, sang hră gưl 3 Trần Quốc Tuấn ti wăl krah Đăk Hà, kdriêk Đăk Hà, čar Kon Tum mâo klei tŭ ksiêm mkă djŏ kman SARS-CoV-2.  Khua sang hră brei thâo, 50 čô hđeh sang hră leh anăn nai mtô bi tuôm giăm hŏng hđeh sang hră anei năng ai srăng ba bi ktlah hjăn sa anôk čiăng mkhư̆ klei ruă tưp.

Êlâo anăn, Khua sang hră gưl 3 Trần Quốc Tuấn brei phung hđeh sang hră leh anăn nai mtô tuôm bi tuôm giăm bi ktlah hjăn ti sang. Mơ̆ng tlam sang hră gưl 3 Trần Quốc Tuấn hrăm online. Anôk bruă ksiêm dlăng klei ruă tưp čar Kon Tum leh anăn êpul mdrao mgŭn ti kdriêk ktuê dlăng phung bi ktlah hjăn sa anôk leh anăn mă mta ksiêm mkă ti sang hră gưl 3 Trần Quốc Tuấn.

Hđeh sang hră L.T.H.G ka tlŏ ôh vaccin, tưp Covid mơ̆ng amai hdĭp mda ti ƀuôn hgŭm Tân Phú, ƀuôn prŏng Đồng Xoài, čar Bình Phước wĭt, leh bi ktlah hjăn sa anôk. Bruă mdrao mgŭn čar Kon Tum leh anăn êpul bruă djŏ tuôm čar Kon Tum mjêč hiu duah, mă mta ksiêm mkă phung huĭ tưp mơ̆ng 5 čô F0. Tal êlâo êpul bruă djŏ tuôm bi mklă mâo 230 čô jing F1.

H Zawut pô mblang