VOV4.Êđê - Ti čar Kon Tum, bruă đru kơ mnuih mă bruă, anôk bruă ba yua mnuih mă bruă hmaĭ kyua klei ruă Covid-19 hluê si klei Knŭk kna gĭt gai lŏ dơ̆ng mjêč pŏk ngă leh anăn rơ̆ng djŏ mnuih dưi dưn. Hlue ngă Hdră mtrŭn 68 leh anăn Hdră mtrŭn 23 mơ̆ng Knŭk kna kơ dŭm hdră êlan đru kơ mnuih mă bruă leh anăn mnuih ba yua mnuih mă bruă tuôm hŏng klei dleh dlan kyua klei ruă Covid-19, truh ară anei giăm 880 anôk bruă duh mkra hŏng êbeh 16 êbâo čô mnuih mă bruă ti čar Kon Tum dưi đru hŏng ênoh prăk êbeh 5 êklai 2 êtuh êklăk prăk.

Mbĭt hŏng klei đru kơ mnuih mă bruă hluê si Hdră mtrŭn 68, hdră mtrŭn 23, hluê ngă Hdră mtrŭn 116 mơ̆ng knŭk kna, čar Kon Tum mâo êbeh 17 êbâo čô mnuih mă bruă blei hră ênua luič bruă mă dưi đru hnơ̆ng ƀiă hĭn jing 1 êklăk 8 êtuh êbâo prăk leh anăn lu hĭn jing 3 êklăk 3 êtuh êbâo prăk. Truh krah mlan 10 mrâo êgao, mâo leh 1.800 čô mnuih mă bruă ti čar dưi đru giăm 4 êklai 6 êtuh êklăk prăk mơ̆ng keh hră ênua luič bruă mă.

H Zawut pô mblang