VOV4.Êđê - Leh 15 hruê hgŭm hlăm Knăm mphŭn pŏk thŭn hriăm hlăm hdră mđung rup leh anăn hriăm online ti sang čiăng gang mkhư̆ klei ruă Covid-19, aguah mbruê 20-9, êbeh 164 êbâo čô hđeh sang hră dŭm gưl hriăm ti čar Kon Tum nao ti sang hră mphŭn hriăm hruê tal êlâo mơ̆ng thŭn hriăm mrâo 2021-2022.

Bruă mkŏ mjing kơ phung hđeh nao sang hră hriăm sa anôk mâo čar Kon Tum ksiêm bi nik hŏng klei mtă răng kriê klei êđăp ênang jih hnơ̆ng kơ phung hđeh leh anăn nai mtô.

Truh ară anei, khă gơ̆ mâo leh 27 čô djŏ kman SARS-CoV-2, ƀiădah čar Kon Tum jing čar sa anăn ti krĭng Lăn Dap Kngư ka mâo ôh mnuih ruă hlăm êpul êya. Hlăm mmông hriăm aguah tal êlâo phung hđeh dưi nao sang hră sa anôk, Khua sang hră 373 sang hră ti Kon Tum ngă leh jăk bruă gang mkhư̆ klei ruă Covid-19. Jih jang phung hđeh, nai mtô dưi ksiêm mkă hnơ̆ng hlơr asei mlei leh anăn truă čhiăm guôm ƀô̆ hlăm klei mtô, hriăm ti sang hră.

H Zawut pô mblang