VOV4.Êđê - Hlăm dŭm hruê giăm anei, čar Kon Tum mâo nanao mnuih ruă F0 dưi hmao ƀuh hlăm krĭng bi ktlah lehanăn hlăm êpul êya. Ti anăp klei anei, bruă sang čư̆ êa alŭ wăl lehanăn êpul djŏ tuôm mơ̆ng čar dôk mđĭ hdră ksiêm dlăng kñăm mkhư̆ phŭn bi mtưp kman klei ruă Covid 19. Ti anôk bi kƀĭn jao bruă klei mrâo mlan 10, mâo Anôk bruă kiă kriê klei hâo hưn čar Kon Tum mkŏ mjing hruê 28/10, Nguyễn Đình Cầu, K’iăng khua adŭ bruă sang čư̆ êa čar Kon Tum hưn, čar Kon Tum lŏ dơ̆ng krơ̆ng kjăp anôk ksiêm dlăng klei ruă ti êlan dơ̆ng prŏng hlăm čar. Klei mĭn mơ̆ng čar, anei jing anôk ksiêm dlăng klei ruă tưp amâo djŏ anôk ksiêm dlăng êlan klông kyua anăn čar amâo lui ôh dŭm anôk gak răng anei msĕ si klei hưn mdah leh mơ̆ng Phŭn bruă Êlan klông dŭ mdiăng. Dua hruê êgao, ti anôk ksiêm dlăng mrô 1 Sao Mai, ƀuôn prŏng Kon Tum lehanăn Anôk ksiêm dlăng mrô 2 kčŭn čư̆ Lò Xo, kdriêk Đăk Glei, ti êlan dơ̆ng Hồ Chí Minh hmao ƀuh 3 čô djŏ kman SARS-CoV-2, hlăm anăn mâo 1 čô mrâo wĭt mơ̆ng Hà Nội lehanăn 2 čô mơ̆ng Dak Lak. Ti anăp klei mnuih ƀuôn sang jih wưng hluê ngă hdră bi ktlah, ksiêm dlăng klei suaih pral ti sang êdei anăn lŏ ƀuh djŏ kman SARS-CoV-2 ngă tưp lar klei ruă hlăm êpul êya, dŭm kdriêk, ƀuôn prŏng mơ̆ng Kon Tum mtrŭt mnuih ƀuôn sang čŏng pô lŏ dôk ti anôk bi ktlah 7 hruê dơ̆ng.

Truh ară anei, čar Kon Tum mâo leh 328 čô mnuih djŏ Covid 19, hlăm anăn mâo 222 čô ruă mrâo, 106 čô lŏ djŏ leh hlao. Hlăm anăn 206 čô ruă hmao ƀuh ti dŭm anôk bi ktlah, 15 čô hlăm êpul êya lehanăn 1 čô ruă hlăm krĭng bi ktlah mdrao mgŭn./.

H Nêč pô mblang