VOV4.Êđê- Dua hruê anei, kyua hmăi mơ̆ng gưl angĭn êbŭ mrô 6 ngă leh lu krĭng wăl ti čar Kon Tum mrâo hjan man dưn truh kơ prŏng, đăo knăl hlăm 24 h ti anăp hlăm alŭ wăl čar srăng mâo hjan man dưn lehanăn prŏng. Dŭm kdriêk: Đăk Glei, Tu Mơ Rông, Kon Plŏng mâo hnơ̆ng hjan mơ̆ng 100 – 200 mm huĭ srăng mâo klei êa kluh, êa proh, klưh lăn. Ti anăp klei anei, Khua anôk bruă sang čư̆ êa čar Kon Tum ba mdah leh Hră mtrŭn mjêč brei pŏk ngă mtam hdră mdrơ̆ng hŏng klei êa lip, klưh lăn.

Hluê anăn, Khua anôk bruă sang čư̆ êa čar Kon Tum Lê Ngọc Tuấn mtă kơ Khua anôk bruă sang čư̆ êa 10 kdriêk, ƀuôn prŏng mơ̆ng čar ksiêm dlăng kjăp angĭn êbŭ mrô 6 lehanăn klei đăo knăl kñăm pral mâo klei hưn brei răng truh kơ dŭm êpul êya bruă lehanăn mnuih ƀuôn sang ti alŭ wăl čar thâo kñăm mâo hdră mdrơ̆ng hŏng klei truh mơ̆ng yan adiê ngă mbĭt anăn ksiêm dlăng, mprăp djăp ênŭm hdră mdrơ̆ng hŏng klei adiê hjan prŏng, êngăp êa, êa kluh, klưh lăn, angĭn đrŭng huĭ tăm mâo, amâo dưi ngă ngơi. Hŏng dŭm krĭng kreh hmaĭ mơ̆ng gưl adiê hjan, êa lip, klưh lăn... brei mâo hdră hưn mthâo, hưn brei răng truh kơ mnuih ƀuôns ang čiăng mâo hdră mdrơ̆ng./.

Pô mblang: H’Nêč Êñuôl