VOV4.Êđê - Hlăm mmăt hruê 7/10 ti wăl knơ̆ng kdơ̆ng êa phŭn pui kmlă Plei Krông, kdrêč alŭ 3, să Hà Mòn, kdriêk Đăk Hà, čar Kon Tum mâo sa klei mran bliư̆ ngă kơ 2 čô mnuih luič ka thâo ƀuh. Hluê si klei hâo hưn mơ̆ng Knơ̆ng bruă sang čư̆ êa să Hà Mòn, kdriêk Đăk Hà hlăm yang hruê anăn mâo sa êpul 7 čô êdam êra đĭ mran nao wah kan leh anăn huă mnăm ti anei. Truh knhal jih mmông tlam, êpul êdam êra đĭ mran nao ti hang leh anăn mâo 4 čô mnuih truh êlâo.

Tlâo čô adôk mâo mnuih wơr bĭt đĭng blŭ anăn lŏ wĭt duah. Leh mram kbưi hŏng hang hlăm brô 30 met snăn bliư̆ leh anăn knŏng 1 hlăm phung anei luê truh ti hang, 2 čô adôk luič ka thâo ƀuh. Leh hmư̆ klei hâo hưn kơ klei djiê mngăt glăm êa, bruă sang čư̆ êa să Hà Mòn, kdriêk Đăk Hà ba nao êpul tinăn leh anăn bi hgŭm hŏng êpul kahan ksiêm mkŏ hiu duah phung mâo klei truh. Truh 12 mmông êgao, klei hâo hưn mơ̆ng anôk mâo klei truh lač êpul đru dŏng ăt ka ƀuh mơh asei atâo phung djiê mngăt hlăm êa.

H Zawut pô mblang