VOV4.Êđê - Hruê 21/9, ti Anôk ktuê dlăng klei ruă tưp mrô 1 Sao Mai, êlan mŭt nah Dhŭng hlăm čar Kon Tum, êpul bruă djŏ tuôm čar Kon Tum test pral ƀuh 2 čô mnuih djŏ kman Sars-Cov 2. Phung bi tuôm giăm ăt dưi bi mklă leh anăn msir mgaih djŏ guôp, rơ̆ng Kon tum ăt amâo mâo ôh mnuih ruă hlăm Êpul êya. Dua čô Test pral ƀuh djŏ kman Sars-Cov-2 jing pô mgăt êdeh N.V.T, 33 thŭn dôk ti čar Bình Định, mă bruă ti ƀuôn prŏng Hồ Chí Minh leh anăn pô nao mbĭt jing H.V.T (ka klă ôh ƀuôn sang). Leh ƀuh 2 čô mâo klei ruă Covid-19, êpul bruă djŏ tuôm ti Anôk ksiêm dlăng klei ruă tưp sao Mai čuăl krĭng, mtă kơ mnuih mă bruă leh anăn mnuih ƀuôn sang dôk ngă hră mơar ti anôk gak răng amâo kƀiă kơ êngao. Snăn truh ară anei, čar Kon Tum ƀuh leh 29 čô djŏ kman SARS-CoV-2 leh anăn dưi bi ktlah hjăn mdrao mgŭn mtam leh mŭt hlăm čar. Kon Tum ară anei ka mâo ôh mnuih ruă Covid-19 hlăm êpul êya.

H Zawut pô mblang