VOV4.Êđê- Hlăk mlan 9 leh êgao, čar Kon Tum jing čar mâo ƀiă hĭn klei duh bi liê kơ dŭm hdră êngao ngăn prăk knŭk kna mkă hŏng dŭm čar mkăn krĭng Lăn Dap Kngư. Ti anăp klei sĭt anei, hlăm klei kƀĭn trông tal 5 êpul khua bruă Đảng čar Kon Tum gưl 16 mrâo mkŏ mjing hlăk hruê kăm êgao, bruă Đảng čar Kon Tum mâo lu mmông bi trông kơ mta kñăm thâo kral anôk kpăk gun, duah hdră iêo mthưr klei duh bi liê hlăm čar kñăm mtrŭt mjhar mđĭ kyar bruă duh mkra.

Hlăm 9 mlan êgao čar Kon Tum iêo jăk mâo 28 anôk bruă duh bi liê hŏng ênoh čih êbeh 8 êbâo êklai prăk ƀiădah lu ăt dôk hlăm hră mơar. Klă klơ̆ng, ară anei mrâo knŏng mâo 2 hdră bruă bi leh nao hlăm hdră duh mkra mnia blei hŏng ênoh duh bi liê êbeh 10 êklai prăk, 5 hdră bruă dôk pŏk ngă duh bi liê 24 êklai prăk leh anăn ênoh lu 21 hdră bruă adôk hlăm hdră bi leh hră mơar. Hluê si Ngô Việt Thành, Khua Knơ̆ng bruă Hdră kčah duh bi liê čar Kon Tum, sa klei kpăk đuôm klă klơ̆ng hlăm bruă iêo jak duh bi liê ti čar jing bruă djŏ tuôm kơ lăn ala:   

“Giăm 90% anôk bruă djŏ tuôm kơ lăn ala snăn mâo sơaĭ klei mdê hjăn plah wah hdră kčah 3 mta dliê hŏng boh sĭt lăn ară anei jing mtŭk mtul hlăm bruă tŭ ư hdră mtrŭn duh bi liê. Êngao kơ lu hdră bruă čuăl mkă mđĭ kyar bruă duh mkra ala ƀuôn amâodah hdră čuăl mkă lăn ala amâo djŏ gjuôp hŏng hdră kčĕ mơ̆ng phung duh bi liê. Leh anăn dŭm Knơ̆ng bruă sang čư̆ êa kdriêk, ƀuôn prŏng leh hưn mthâo lăn ăt kăn ktuê dlăng bi nik leh phung duh bi liê ngă hră mơar snăn mâo lu klei gun kpăk, mtŭk mtul hŏng dŭm mta bruă dưi brei hluê ngă amâodah amâo djŏ nguôp ôh hŏng hdră čuăl mkă kluôm.”

Êa hnoh hlơr Đăk Tô lu thŭn lui êruh dôk guôn pô duh bi liê

 Mbĭt hŏng mta phŭn mrâo lač, dŭm klei kpăk đuôm hĭn hlăm bruă iêo jak duh bi liê hlăm čar Kon Tum ăt dưi lač anăn jing klei êdu kƀah hlăm bruă kriê dlăng mơ̆ng knơ̆ng, dhar bruă djŏ tuôm. Klă klơ̆ng amâo tŭ ư hlăm bruă klei blŭ mguôp hmaĭ kơ hnơ̆ng jăk, wưng mơ̆ng dŭm mta bruă duh bi liê, Dŭm alŭ wăl ka dưi mđĭ lar ôh bruă ktuê dlăng, duh bi liê čiăng hmao păn kjăp, ruh mgaih klei dleh dlan kơ phung duh bi liê, kƀah klei tliêr kjăp hlăm bruă ktuê dlăng hnơ̆ng duh bi liê mơ̆ng dŭm mta bruă. Lač kơ klei kƀah mơ̆ng čar hlăm bruă iêo kjak duh bi liê, Khua hlăm bruă Đảng gưl dlông, Khua dlăng bruă Đảng čar, Khua Êpul gơ̆ng bruă ƀuôn sang čar Kon Tum Dương Văn Trang  brei mđing kơ bruă klam mơ̆ng phung khua gĭt gai hŏng klei čiăng brei bi mlih mtam:      

“Drei lač hlăm anăn mâo sa, dua tlâo čô mnuih mâo bruă klam ka jăk leh anăn ka pral kdal kyua bruă mbĭt ti čar, kyua klei mbĭt mơ̆ng mnuih ƀuôn sang. Hlăm hnơ̆ng kčah lač kơ ênoh bi ktưn mâo sa hnơ̆ng kčah jing pral kdal mơ̆ng khua gĭt gai. Snăn čar ăt jing khua gĭt gai ƀiădah knơ̆ng bruă ăt jing khua gĭt gai mơ̆ng knơ̆ng bruă. Bi sĭt diñu hriê pô bi tuôm, amâo hriê pô tlaih bi tuôm ôh, amâo čiăng ôh. Anôk bruă duh mkra digơ̆ lač amâo čiăng snăn lui, kyua anăn bruă duh mkra ala ƀuôn amâo đĭ kyar ôh”.

Pla leh anăn mkra mjing êa drao sa mta bruă čar Kon Tum iêo mthưr duh bi liê

 Hŏng klei thâo kral ti anôk gun kpăk, gĭr mkŏ mjing anôk duh bi liê klă mngač, găl ênưih leh anăn pral kdal čiăng iêo jak klei duh bi liê, sa bruă ăt mâo čar Kon Tum gĭr hluê ngă, anăn jing ktuê dlăng, gĭr lăm lui phung duh bi liê kƀah klei thâo, duh bi liê knŏng čiăng lŏ ba čhĭ kơ hdră bruă mkăn čiăng duah ƀơ̆ng.

Pô mblang: H’Zawut Ƀuôn Yă