VOV4.Êđê- Hlăm bruă hluê ngă hdră mkra mlih dŭm kdrêč êlan hlăm ktuê êlan dơ̆ng prŏng mrô 24, hlăm hdră ngă mkra mrô 5 găn alŭ wăl să Hiếu, kdriêk Kon Plông, čar Kon Tum kreh mâo klei lăn klưh hroh hluê êa hjan săr dơr giăm 8 ha lăn pla mdiê mơ̆ng mnuih ƀuôn sang. Kñăm rơ̆ng klei êđăp ênang ăt msĕ mơh hdră hluê ngă bruă, dŭm êpul êya ti Kon Tum prăk nao ngă klei ƀuăn rơ̆ng hŏng êpul ngă bruă srăng mâo hdră đru djŏ guôp kơ mnuih ƀuôn sang.

Ktuê êlan dơ̆ng prŏng mrô 24, kdrêč găn să Hiê̆u, kdriêk Kon Plông, mâo lu kdrêč êlan hlăk dôk lŏ mkra wĭt ti dŭm anôk jhat rai kyua mâo lăn boh tâo klưh kyua hjan hlĭm, hlŏng kdơr lăn lŏ phung ƀuôn sang amâo lŏ dưi pla mnơ̆ng ôh. Phan Thế Vinh, Khua să Hiê̆u lač, ênhă lăn mdiê hmăi lu jing dŏ phung ƀuôn sang dŭm boh ƀuôn Đăk Lom; Vi Glơng; lehanăn Kon Plông:

“Êjai dôk mkra êlan dơ̆ng prŏng mrô 24 hmăi mơ̆ng adiê hlĭm hjan ngă klưh hroh lăn boh tâo, lăn kdơr hlăm lŏ phung ƀuôn sang. Phung ƀuôn sang hlăk dôk guôn anôk bruă mâo klei dưi lehanăn phung duh bi liê mkra êlan nao đru phung ƀuôn sang hŏng klei pral lehanăn rơ̆ng kơ phung ƀuôn sang lŏ mâo anôk pla mjing”.

Rŭ mdơ̆ng mkra êlan mrô 5

Tui si Êpul êya bruă pô mkra êlan êlan mrô 5 mkra êlan kdrêč găn să Hiê̆u, mâo leh hdră tĭng kơ klei truh msĕ djuê anei, lehanăn mâo leh mơh lu hdră čiăng gang mkhư̆ lăn kdơr hlăm lŏ phung ƀuôn sang, ƀiădah amâo mâo klei dưi gang mkhư̆ ôh. Kyuadah ta luy nah dlông dơ̆ng đei, lehanăn boh klĭng čư̆ jing dơ̆ng mơh, snăn leh tuôm hŏng hjan prŏng êa khăt mơ̆ng čư̆ kluh hlŏng kur ba lu lăn boh tâo kdơr hĕ mbĭt hŏng phung ƀuôn sang. Bùi Huy Trình, K’iăng khua kiă kriê knơ̆ng bruă Trường Long, pô klam bruă mkra êlan mrô 5 brei thâo, êpul bruă anei mâo leh klei ƀuăn čiu hnô kơ phung ƀuôn sang:

“Hmei jing êpul êya bruă pô mkra êlan, mâo leh klei bi mguôp hŏng dŭm tĭng djŏ tuôm, pô duh bi liê hlăm hrue kăm kơ anăp srăng mâo klei bi kƀĭn, duah hdră mghaih msir, ciăng dưi đru bi pral kơ phung ƀuôn sang, hŏngklei năng mơh”.

Nguyễn Văn Thanh, pô bi ala anôk kiă kriê bruă mkra êlan klông Kontum, jing êpul mâo knơ̆ng bruă êlan klông dŭ mdiăng čar Kontum jao klei dưi kiă kriê bruă mkra êlan anei lač:

“Êpul kiă kriê bruă mkra wĭt êlan mâo bi mguôp leh hŏng bruă sang čư̆ êa alŭ wăl, dŭm êpul êya djŏ tuôm, dŭm gŏ êsei bi nao ksiêm mklă, mka tĭng, lehanăn mkŏ mjing hdră srăng čiu hnô đru kơ phung ƀuôn sang hŏng klei năng mơh”.

Boh sĭt, êjai mkra wĭt êlan, snăn bruă lŏ mkra mđĭ êlan dơ̆ng mrô 24 kdrêč găn să Hiê̆u, kdriêk Kon Plông tuôm hŏng klei êa kluh kur lăn lehanăn săr kdơr giăm 8ha lŏ mơ̆ng 87 gŏ êsei, hŏng hnơ̆ng truh tơl mdê mdê. Êpul kiă kriê bruă knuă mkra êlan klông čar Kontum tui si klei leh bi tŭ ư plah wah dŭm tĭng djŏ tuôm mâo mkŏ mjing leh hdră đru kơ phung ƀuôn sang mbha jing 4 hnơ̆ng. Msĕ si hŏng lăn lŏ hmăi amâo mâo jăk truh 70% ênhă lăn kơ dlông srăng đru kơ phung ƀuôn sang 3 yan mdiê; mơ̆ng 50 – 70% đru dua yan mdiê, mơ̆ng 30 – 50% đru 1,5 yan mdiê, lehanăn hmăi kgŭ 30% ênhă lŏ srăng đru 1/2 yan mdiê. Mâo klei bi tŭ ư hŏng phung ƀuôn sang, bruă bi đru kơ hnơ̆ng luič liê anăn srăng dưi ngă mtam hlăm mlan 10 anei./.

Pô mblang: Y-Khem Niê