VOV4.Êđê - Mơ̆ng 12 mmong hruê mbruê, Kdriêk Dak R’Lâp, čar Dak Nông mjưh ngă klei bi kbưi yang ƀuôn tui si asăp mtrŭn mrô 16. Kluôm hlăm kdriêk srăng lŏ hluê ngă tui si asăp mtrŭn mrô 15. Khădah, ti anăp klei dleh dưi ksiêm dlăng mơ̆ng klei ruă tưp, bruă sang čư̆ êa čar Dak Nông mtă kơ bruă sang čư̆ êa kdriêk Dak R’Lâp dưn yua dŭm hdră êlan gang mkhư̆ klei ruă tưp hŏng asăp mtrŭn mrô 15+ hŏng să Dak Ru leh anăn Quảng Tín jing 2 să mâo lu mnuih mâo klei ruă tưp hlăm êpul êya. Bi kơ dŭm anôk huă mnăn djiêu dŭm êlan dơ̆ng, knơ̆ng čih ba wĭt. Hlăm dŭm anôk bi ktlah mbĭt, phung F1 srăng lŏ bi tai mmông bi ktlah thiăm 7 hruê. Alŭ wăl mtă kơ mnuih ƀuôn sang amâo kƀiă mơ̆ng pưk sang tơdah amâo mâo bruă mjêč, ngă djŏ dŭm hdră gang mkhư̆ klei ruă tưp Covid-19, amâo brei klei ruă tưp bluh đĭ. Yap truh kơ hruê mbruê, čar Dak Nông mâo 664 čô mâo klei ruă tưp, hlăm anăn kdriêk Dak R’Lâp mâo 314 čô. Hlăm čar mâo 242 čô mnuih ruă dưi mdrao hlao leh anăn 1 čô djiê.

Y Ƀel pô mblang