VOV4.Êđê - Ti kdriêk knông lăn Tuy Đức čar Dak Nông, dŭm hruê êgao mâo leh êbeh 1.200 čô mnuih wĭt mơ̆ng dŭm čar kwar Dhŭng. Bruă sang čư̆ êa alŭ wăl bi hgŭm leh hŏng dŭm êpul êya bruă, mnuih nao đru kơ hdră mdrao mgŭn, đru mkăp mnơ̆ng ƀơ̆ng huă kơ mnuih mrâo wĭt mơ̆ng dŭm čar kwar Dhŭng h’ĭt ai tiê hluê ngă hdră bi ktlah mklin sa anôk kñăm gang mkhư̆ klei ruă Covid 19.

Hlăm wăl bi ktlah hjăn sa anôk ti sang hră hđeh điêt Hoạ My ti alŭ 5, să Quảng Tâm, ayŏng Lương Văn Lý, mnuih wĭt mơ̆ng Bình Dương, brei thâo: “Kâo wĭt hlăm hruê 3/10, hluê si klei gĭt gai mơ̆ng anôk bruă mdrao mgŭn alŭ wăl snăn bi ktlah hjăn 14 hruê. Mơ̆ng leh wĭt tinei snăn kâo dưi test pral Covid-19 lu blư̆, klei tŭ ksiêm mkă amâo ƀuh ôh klei ruă. Anôk pĭt đih bi ktlah hjăn snăn doh, huă mnăm djăp ênŭm 3 blư̆ hlăm sa hruê, rơ̆ng klei suaih pral. Kâo ƀuh hơĭt ai tiê leh bi ktlah hjăn tinei.”

Nguyễn Quốc Hải - K’iăng Khua Knơ̆ng bruă sang čư̆ êa să Quảng Tâm brei thâo, să ară anei mâo êbeh 60 čô mnuih ƀuôn sang wĭt mơ̆ng krĭng mâo klei ruă tưp ti dŭm čar nah Dhŭng dôk bi ktlah hjăn sa anôk. Đru kơ mnuih ƀuôn sang hơĭt ai tiê bi ktlah hjăn gang mkhư̆ klei ruă tưp, să iêu mthưr dŭm êpul bruă, mnuih bi đru prăk, mnơ̆ng ƀơ̆ng huă, tŭk knă amâo mă prăk kơ wăl bi ktlah hjăn sa anôk “Hluê si klei kčah mtrŭn mơ̆ng gưl dlông snăn hrui mă sa hruê 80 êbâo prăk huă/1 čô mnuih, ka yap ôh prăk êa mnăm, amâodah dŭm mta mnơ̆ng mkăn. Hluê si klei kčah mtrŭn snăn ƀiădah hmei ka mă sa mta prăk ôh. Ară anei ti să hmei dôk iêu mthưr phung mâo ai tiê kmah đru tŭk knă amâo mă prăk kơ mnuih ƀuôn sang hlăm wăl bi ktlah hjăn. Mnuih ƀuôn sang tinei adôk dleh dlan, hmei gĭr iêu mthưr čiăng bi đru klei dleh dlan mdrơ̆ng hŏng klei ruă tưp hlăm gưl anei.”

Hlăm dŭm mlan êgao, kdriêk knông lăn Tuy Đức (čar Dak Nông) drông êbeh 4 êbâo čô mnuih ƀuôn sang wĭt mơ̆ng dŭm čar mâo klei ruă tưp Covid-19. Hjăn mơ̆ng akŏ mlan 10 truh ară anei mâo êbeh 1.200 čô mnuih wĭt kơ alŭ wăl. Kluôm kdriêk čih yap leh 16 čô djŏ klei ruă Covid-19, ƀuh hlăm wăl bi ktlah hjăn sa anôk, amâo mâo ôh mnuih ruă hlăm êpul êya.

Trương Đức Minh –  Khua Anôk bruă mdrao mgŭn kdriêk Tuy Đức, hâo hưn, ti anăp bruă mnuih ƀuôn sang wĭt mơ̆ng krĭng mâo klei ruă tưp đĭ lu, Knơ̆ng bruă sang čư̆ êa kdriêk mkŏ mjing leh 7 wăl bi ktlah hjăn sa anôk ti dŭm să leh anăn sa wăl ti Anôk hriăm bruă kđi čar kdriêk. Bi ktlah hjăn sa anôk jing hdră jăk čiăng gang mkhư̆ klei ruă tưp lar hlăm êpul êya. Hluê si klei kčah mtrŭn snăn mnuih bi ktlah hjăn brei tla prăk bi liê 80 êbâo prăk ƀơ̆ng grăp hruê. Khădah, kdriêk hluê ngă klei iêu mthưr ala ƀuôn rơ̆ng amâo mă prăk kñăm đru kơ mnuih ƀuôn sang hơĭt ai tiê bi ktlah hjăn “Kơ hdră êlan snăn phung jing gŏ êsei ƀun snăn amâo mă prăk ôh, dưi mă mang, bi phung mkăn snăn ăt hrui mă prăk. Hŏng kdriêk Tuy Đức snăn msĕ si hmei iêo jak, iêo mkrum. Bruă ba bi ktlah hjăn ti dŭm să jing hdră jăk, tŭ dưn. Sĭt mnuih ƀuôn sang dưi ba bi ktlah hjăn ti dŭm să, digơ̆ ƀuh hlăm ai tiê jĕ giăm kyua pô wĭt, jing bruă iêo mkrum đru mguôp đru tŭk knă ngă jăk snăk”.

Hlăm boh klei ruă tưp ngă, knhuah gru jăk siam “bi khăp bi đru, hla hmum hruôm hla tĭ” mơ̆ng djuê ana Việt Nam ngă leh, leh anăn mnuih ƀuôn sang ti kdriêk ƀun Tuy Đức dưi mđĭ lar tŭ dưn. Ai tiê bi hgŭm, kah mbha srăng jing aruăt vaccin tŭ dưn đru gang mkhư̆ klei ruă Covid-19./.