Hŏng amai Phạm Thị Thu Hằng, ti ƀuôn hgŭm Tân Lập, čar Dak Lak, dŭm mnơ̆ng jak yâo hing ang msĕ si: kphê, kruê̆ hruê̆, boh ƀơr, amâo djŏ knŏng jing boh mnga – mnơ̆ng ƀơ̆ng. Pô mkŏ mjing anăn knăm mnơ̆ng bi msiam Pơ Lang mkŏ mjing leh kơ dŭm boh mnga, mnơ̆ng jăk anăn mâo bruă klam mrâo – jing mnơ̆ng bi msiam. Leh 5 thŭn čô̆ kơ bruă, amai ksiêm duah – mkŏ mjing 11 mta mnơ̆ng mơ̆ng dŭm mta mâo hlăm ƀuôn sang, mâo phung tuê tŭ drông. Phạm Thị Thu Hằng mñă klă, hŏng dŭm mta mnơ̆ng mâo hlăm alŭ wăl jing leh klei găl kơ êpul êya čô̆ kơ bruă:

“Mđĭ kyar dŭm mta mnơ̆ng mkra mjing êlan mơ̆ng boh mnga alŭ wăl leh anăn mđing truh kơ mnơ̆ng dhơ̆ng doh êbăt. Hlăm klei čô̆ kơ bruă hmei ăt dlăng anei jing klei êlâo êdei leh anăn hŏng dŭm hdră đru knơ̆ng bruă mkŏ mjing boh kdrŭt ăt msĕ mơh dŭm knơ̆ng bruă mtah, ngăn prăk mtah, ngăn prăk hơĭt kjăp”.

Hŏng phung mniê Raglai, K’Ho leh anăn Chăm ti ƀuôn hgŭm Phan Sơn, car Lâm Đồng, djam Kataya jing mnơ̆ng ƀơ̆ng grăp hruê. Ƀiădah hŏng êpul amai Tạ Huyền Thuật, anei jing anôk knang yuôm bhăn kơ klei čô̆ kơ bruă. Ăt yua kan, hra mơ̆ng êa ksĭ ƀuôn sang, êpul amai bi mguôp mnơ̆ng bi ƀăt, êa drao mâo hlăm alŭ wăl, mkra mlih mnâo mñañ, bi msiam čiăng jing mnơ̆ng ba yua ba čhĭ lu anôk. Amai Tạ Huyền Thuật, brei thâo, kayata knhuah gru ară anei jing leh anăl knăl, ba wĭt boh tŭ dưn.

“Mnơ̆ng dhơ̆ng hmei mâo mnâo mnañ mơ̆ng čưl dliê, kyua hmei mă hla êa drao hlăm dliê mkra mnơ̆ng anei. Hmei pia anăn jing mnâo čư̆ dliê – mngăt êwa ƀuôn sang, hŏng hdră êlan, mnâo mñañ ƀuôn sang rông ba êdei anăp. Kyua mơ̆ng mta mnơ̆ng anei. lu phung amai adei, boh nik jing phung mniê dôk rông anak êlâo dih amâo mâo bruă mă, ară anei mâo leh hdră duh ƀơ̆ng hơĭt, mâo klei jhŏng leh anăn klei găl đĭ kyar wưng sui”.

Ăt msĕ hlăm bruă êlan klông, dŭm bĭt êlan điêt dôk dưi čuăl mkă jing êlan prŏng, ngăn dŏ alŭ wăl ti Dak Lak ƀrư̆ ƀrư̆ dưi čô̆ kơ klei čuăl mkă, đĭ kyar jing anăl knăl. Ayŏng Lê Anh Thông, sa čô čô̆ kơ bruă hŏng klei rông êmô, mnŭ ti ƀuôn hgŭm Sơn Hoà lač, êmô ti alŭ wăl, mnŭ mjeh hđăp ăt srăng dưi bi lar klei yuôm mdê hjăn êjai dưi đĭ kyar hlăm hdră êlan găl guôp. Ƀiădah čiăng klă sĭt pŏk dŭm anăn knăl mrâo, čiăng năng hŏng ngăn prăk leh anăm mnuih mă bruă hrăm mbĭt:

“Dleh dlan hĭn ară anei jing kƀah prăk, bruă nao jĕ dŭm hdră êlan đru kơ bruă lŏ hma adôk dleh, tal dua jing kƀah mnuih mă bruă. Kâo hmăng hmưi knŭk kna uêñ mĭn đru brei ngăn prăk, hưn mdah mnơ̆ng dhơ̆ng hlăm dŭm mbah hâo hưn alŭ wăl, mbĭt anăn mkŏ mjing klei găl čiăng mkŏ mjing bruă mkra mjing kƀĭn, mâo lu gŏ sang nao hgŭm, đru mđĭ kyar bruă duh mkra kơ krĭng.”

Kwar krah Lăn Dap Kngư, krĭng lăn lu jơr dhar kreh, ngăn dŏ mơ̆ng dliê truh kơ êa ksĭ, dôk dưoi mtrŭt mđĭ hŏng ai tiê mbruă, klei hmăng hmưi đĭ kơ mdrŏng, kriê pioh dhar kreh leh anăn răng mgang wăl hdĭp mda. Dŭm mta mnơ̆ng dhơ̆ng msĕ si êa drao mơ̆ng boh ƀơr, kan tlê Kataya amâodah klei bi hmô rông êmô… brei ƀuh tơdah bi mguôp hŏng knhuah gru alŭ wăl, dŭm boh tŭ yuôm dưi jing anăl knăl mnơ̆ng mnia mblei mrâo mrang, mâo anôk jưh ti anôk mnia mblei.