Knŏng sa hruê kăm leh Klei bi kƀĭn, čar Dak Lak mkŏ mjing leh Knăm mơak mlih mrô thŭn 2025 hŏng akŏ “Kdrăp mrâo – mkra mjing êdei anăp”. Hŏng klei kñăm jing alŭ wăl ba anăp kơ klei mlih mrô krĭng wăl Lăn Dap Kngư- Ktuê hang ksĭ Dhŭng kwar Krah. Leh êbeh 3 mlan bi mŭt, Dak Lak bi leh 100% klei kñăm mlih mrô ti 102 să, ƀuôn hgŭm, ênoh hră mơar online kluôm čar mâo 34,5%, gưl să mâo 37%. Anôk bruă ngă hră mơar knŭk kna dua gưl tŭ mă êbeh 350 êbâo hră mơar, hŏng 76% msir mgaih online. Kluôm čar mâo êbeh 83% čô mnuih ƀuôn sang dưi mkăp mrô bi mklă anăn điện tử hnơ̆ng 2, giăm 79% ba yua leh.

 Dŭm boh tŭ anei brei ƀuh knhuang đĭ kyar ktang mơ̆ng bruă sang čư̆ êa alŭ wăl dua gưl Dak Lak hlăm hdră mrâo mlih mrô, mđing kơ bruă hră mơar giăm mnuih ƀuôn sang, klă mngač leh anăn mrâo mrang. Bùi Thanh Toàn, Khua Knơ̆ng bruă kreh knhâo leh anăn kdrăp mrâo čar Dak Lak, brei thâo:

“Si ngă čiăng kơ knŭk kna giăm mnuih ƀuôn sang hĭn hlăm boh klei jing ênhă prŏng hĭn amâo lŏ mâo gưl kdriêk snăn kreh knhâo mrâo mrang mlih mrâo, mbruă leh anăn mlih mrô jing hdră msir. Čar srăng lŏ dơ̆ng bi liê kơ anôk bruă naha gŭ, kơ anak mnuih srăng mâo sa gưl ba nao êpul knuă druh čar čiăng đru kơ dŭm să, ƀuôn hgŭm. Êngao anăn ăt iêô jak klei găl mơ̆ng nah êngao leh anăn ăt ba yua klei hrăm mbĭt, đru mơ̆ng dŭm anôk bruă duh mkra ti alŭ wăl čar.”

 Wưng mrâo, Dak Lak kčah klei kñăm đĭ kyar 10,5% mơ̆ng klei đĭ kyar klei găl mnuih mă bruă, mđĭ kyar bruă duh mkra- kdrăp mrâo, mlih mrâo mbruă leh anăn mlih mrô, bi liê hrăm  mbĭt kơ anôk nah gŭ čiăng pŏk mlar mlir krĭng. Mbĭt hŏng bruă sang čư̆ êa, mnuih ƀuôn sang leh anăn anôk bruă duh mkra ti čar thâo klă, mnuih ƀuôn sang leh anăn anôk bruă duh mkra ti čar klă mngač, wưng 2025-2030 Dak Lak amâo djŏ knŏng ba yua wăl kơ klei đĭ kyar ôh ƀiădah yuôm bhăn hĭn jing pŏk mlar kơ klei mĭn. Ngô Tường Vy,  Khua Knơ̆ng bruă Êpul grup ba čhĭ boh kroh kơ ala tač êngao Chánh Thu, kah mbha kơ klei găl bruă lŏ hma mơ̆ng Dak Lak wưng anei, srăng mâo wăt klei jăk lăn čư̆ dliê êa mâo leh leh anăn dŭm hdră tă mđing mrâo, klei bhiăn, hdră êlan mrâo:

 “Klei yuôm bhăn jing brei dlăng bruă lŏ hma msĕ si sa bruă duh mkra klei thâo – mơ̆ng kdrăp mrâo, ênoh yuôm leh anăn klei jăk čiăng kơ mnơ̆ng dhơ̆ng Dak Lak truh kbưi, jing klei ktưn hưn mơ̆ng bruă lŏ hma Việt Nam.”

Hŏng klei kñăm êdah êdi đĭ kyar, Dak Lak srăng mđĭ kyar klei kreh knhâo, kdrăp mrâo leh anăn bi mlih mrô, mđĭ kyar duh bi liê anôk bruă êlan klông nah gŭ. Tạ Anh Tuấn, Khua Knơ̆ng bruă sang čư̆ êa čar Dak Lak brei thâo, hlăk êjai bi mlih mrô – anôk bruă nah gŭ jing “boh kdrŭt ênun” hlăm hră mơar snăn anôk bruă êlan klông srăng jing “boh kdrŭt khăng” mđĭ kyar bruă duh mkra- ala ƀuôn:

 “Čar srăng kƀĭn klei găl čiăng bi leh ktuê êlan phŭn, boh nik ktuê êlan mkŏ Ngŏ Yŭ ti čar, mkŏ kdrŭn ksĭ leh anăn tač êdeh phiơr ăt msĕ mơh mkŏ hŏng dŭm ktuê êlan dơ̆ng êran pral mơ̆ng kluôm ala msĕ si êlan dơ̆ng êran pral Dưr- Dhŭng, êlan dơ̆ng êran pral Ƀuôn Ma Thuôt – Vân Phong leh anăn anôk bruă êlan klông nah gŭ nao êlâo sa knhuang srăng pŏk êlan kơ wăl đĭ kyar mrâo leh anăn ba yua klei găl mkăn”

Hŏng boh kdrŭt đĭ kyar mrâo dôk mjêč dưi mkra mđĭ, dŭm klei găl prŏng kơ bruă duh bi liê – mnia blei ti Dak Lak dôk dưi pŏk mlar. Lê Đức Huy, Khua Êpul gơ̆ng hlăm Knơ̆ng bruă ba čhĭ mnơ̆ng kơ ala tač êngao 29 Dak Lak, brei thâo:

 “Hmei đăo knang jing srăng ba Dak Lak đĭ kyar hlăm wưng mrâo, boh nik jing dŭm hdră êdah kdlưn. Tal sa jing kơ anôk bruă nah gŭ srăng mđĭ kyar kơ êlan klông, mkŏ Ngŏ Yŭ čiăng mđĭ kyar kơ klei mkra mjing êlam, dŭm anôk bruă kơ wăl tuh tia mkra mjing, kdrŭn ksĭ čiăng ba mnơ̆ng dhơ̆ng lŏ hma leh anăn kan hdang Lăn Dap Kngư jing ba čhĭ kơ ala tač êngao hŏng êlan knông lăn ti nah Ngŏ Dak Lak”

Leh Klei bi kƀĭn bruă Đảng čar, Dak Lak amâo djŏ knŏng lač kơ “hnơ̆ng kčah ôh” ƀiădah dôk mtrŭt mjhar dŭm bruă klă klơ̆ng, čiăng mjing ai ktang mrâo – anôk bruă lŏ hma, tuh tia mkra mjing leh anăn êa ksĭ hlai mbĭt hŏng klei đĭ kyar. Tơdah hdră mtrŭn dưi hlue ngă hŏng bruă ngă, tơdah ai tiê êdah kdlưn lar bra truh hŏng grăp čô mnuih ƀuôn sang leh anăn anôk bruă duh mkra, Dak Lak srăng amâo jing anôk phŭn kơ kphê ôh, ƀiădah lŏ jing klei bi knăk kơ sa krĭng lăn dôk kpưn đĭ ktang mơ̆ng dap kngư truh kơ êa ksĭ./.