Dak Lak mâo êlan knông lăn dlông 73 km siă knông čar Mondulkiri (Ala mtao Campuchia) hlăm alŭ wăl 4 să: Êa Bŭng, Ia Rvê, Ia Lốp lehanăn Ƀuôn Đon. Anei jing krĭng wăl mdê hjăn, mnuih ƀuôn sang djuê ana ƀiă truh êbeh 50%. Hdră êlan klông gun kpăk, sang hră jhat rai ngă kơ bruă hriăm hră mơ̆ng phung hđeh tuôm hŏng lu klei dleh dlan. Grăp wưng mphŭn pŏk thŭn hriăm mrâo, amâo djŏ ƀiă ôh phung nai mtô nao truh ti grăp boh ƀuôn, grăp gŏ sang nao mtrŭt mjhar phung hđeh nao sang hră; lu phung hđeh nao găn ktuê êlan 15 – 20 km čiăng duah boh hră. Leh mâo klei hưn čar srăng duh mkra sang hră čiêm rông phung hđeh mnuih djuê ƀiă mlir gưl ti dŭm să knông lăn jing klei đăo knang lehanăn klei čang hmăn mlih mrâo hŏng mnuih ƀuôn sang tinei. Amai H’Đa Nê Byă, ti să Ƀuôn Đon brei thâo:

“ Kâo pô msĕ hŏng mnuih ƀuôn sang mơak êdi. Leh sang hră dưi rŭ mdơ̆ng, phun hđeh srăng mâo wăl anôk hriăm hră jăk hĭn, dưi đru thiăm hră mơar, anôk bruă nah gŭ lehanăn kdrăp mnơ̆ng mrâo mrang. Anei jing klei mơak, hmei čang hmăng hdră bruă hnưm dưi pŏk ngă čiăng kơ phung hđeh krĭng knông lăn dưi dưn”.

Hluê si hdră mkra, grăp boh sang hră mâo 1.000 – 1.200 čô hđeh, ênhă 5 – 10ha, mâo adŭ hriăm, anôk dôk, sang dlăng hră, sang huă ƀơ̆ng, anôk mjuăt ktang asei mlei, adŭ maĭtĭng, kdrăp êa doh lehanăn dŭm bruă mkăn. Ênoh duh bi liê tĭng hlăm brô 420 êklai prăk kơ 4 hdră bruă. Hŏng phung nai mtô, anei jing sa knhuang nao yuôm bhăn čiăng ruh mtlaih klei dleh dlan hlăm hdră mtô bi hriăm. Nguyễn Văn Sơn – Khua sang hră gưl 2 Lê Quý Đôn, să Ea Bung brei thâo:

 “Dưi duh bi liê rŭ mdơ̆ng anôk bruă nah gŭ mđrăm mbĭt srăng mjing klei găl kơ phung hđeh bi hrŏ klei amâo lŏ čiăng nao sang hră. Phung hđeh dưi dôk huă yang hruê dơ̆ng ti sang hră amâo dah hlŏng dôk tinei mtam snăn anei jing sa hlăm dŭm klei jăk găl kơ phung hđeh, amĭ ama lehanăn wăt nai mtô”.

Kơ bruă knŭk kna alŭ wăl, dŭm să mkăp leh lăn čiăng hluê ngă hdră mdơ̆ng sang hră mlir gưl. Hdră bruă ti să Ƀuôn Đon dưi čuăl mkă ti krĭng lăn prŏng êbeh 5 ha, tĭng srăng rŭ mdơ̆ng hlăm mlan 10/2025.  Lê Thanh Sơn – kơiăng khua anôk bruă sang čư̆ êa să Ƀuôn Đon brei thâo:

“Hmei mkăp leh krĭng lăn 3,6 ha lehanăn dôk pŏk mlar truh 5 ha čiăng mdơ̆ng sang hră. Hdră anei srăng ba wĭt lu klei găl hriăm hră kơ phung nai, phung hđeh, mbĭt anăn anei jing hdră mtrŭn yuôm bhăn đru kơ ala ƀuôn, đru kơ mnuih ƀuôn sang hơĭt ai tiê, mđĭ kyar bruă duh mkra ti krĭng knông lăn”.

Kluôm čar Dak Lak ară anei mâo êbeh 4.300 čô hđeh ti 4 să knông lăn. HDră rŭ mdơ̆ng dŭm sang hră čiêm rông phung hđeh mnuih djuê ƀiă mlir gưl amâo djŏ knŏng msir mghaih anôk hriăm, anôk dôk kơ phung hđeh ƀiădah anei lŏ jing hdră êlan mtrŭn kơ wưng sui. Nguyễn Đình Trung – Khua hlăm Anôk bruă Đảng gưl dlông, Khua bruă Đảng čar Dak Lak bi mklă: Anei jing klei bi mklă prŏng, mâo boh tŭ yuôm jăk, pŏk sa klei găl čiăng kơ phung hđeh mnuih djuê ƀiă ƀiă ti krĭng knông lăn dưi hriăm hlăm sa wăl anôk hriăm hră jăk hĭn, đru mjuăt bi hriăm mnuih mă bruă mâo hnơ̆ng hriăm thâo kơ alŭ wăl. Mbĭt anăn, hdră ăt đru bi kjăp wăl anôk răng mgang klei êđăp ênang hlăm jih jang mnuih ƀuôn sang ti krĭng knông lăn. Khua bruă Đảng čar Dak Lak mñă klă.

Mtă kơ anôk bruă tmô bi hriăm mbĭt hŏng dŭm gưl bruă Đảng, bruă knŭk kna alŭ wăl hluê djŏ hŏng klei dưi, bruă klam mâo jao mjêč pŏk ngă dŭm mta hră mơar djŏ tuôm čiăng hnưm ngă mkra hdră bruă. Bruă Đảng čar srăng hrăm mbĭt, gĭt gai kñăm rơ̆ng dŭm hdră ka ba yua djŏ wưng, mjing boh kdrŭt kơ hdră mđĭ kyar bruă mtô bi hriăm mơ̆ng čar, boh nik ti krĭng knông lăn”.

Dŭm boh sang hră prŏng siam dôk rŭ mdơ̆ng ti krĭng knông lăn amâo djŏ knŏng jing anôk “Ba boh hră” ƀiădah lŏ jing anôk bi guh mngač klei čang hmăng, pŏk sa băng bhă đru mđĭ klei thâo săng kơ dŭm êbâo čô hđeh hriăm hră. Hŏng klei hgŭm kngan mơ̆ng Gưl dlông, alŭ wăl lehanăn mnuih ƀuôn sang, klei čang hmăng ba boh hră ti krĭng ƀrư̆ ƀrư̆ dưi jing sĭt, ba wĭt boh tŭ dưn./.