Êbeh 10 thŭn ngă bruă êdam êra ti alŭ wăl, ñu mâo mnuih ƀuôn sang iêo hŏng anăn “khua bruă djah”. Ƀrư̆ ƀrư̆ ñu mkŏ mjing êpul ngă bruă ba anăp, êpul hgŭm bi mdah wăl hdĭp mda, lehanăn êpul hgŭm bruă êdam êra Čư̆ Pơ̆ng... iêo jak phung êdam êra hlăm grăp hrue kăm nao hwai djah hlăm ƀuôn sang, jah waih rơ̆k ƀur, pla ana kyâo mtah ktuê êlan... Ti anôk bi lông rup “Găn klei lông dlăng čiăng mâo klei bi mlih” thŭn 2019 mâo êpul bruă êdam êra gưl dlông Cộng sản Hồ Chí Minh mkŏ mjing, klei yăl dliê lehanăn rup kơ êkei êdam Ê Đê Y Hlý Niê Kdăm dôk hur har bi mdoh dŭm anôk čhŏ djhan djah djâo, ngă mgei leh ai tiê hlăm hla pŏk, đru kơ ñu jing pô mâo leh lu mnuih khăp hĭn lehanăn mâo mă klei pah mni “Pô ba klei mđĭ ai”.Kâo mâo iêo jak êbeh 20 čô phung êdam êra lehanăn phung amai adei ngă bruă hlăm ƀuôn hgŭm, čiăng hrăm mbĭt mă bruă, kčưm mơ̆ng bruă hwai mdoh ƀuôn sang jing bruă čŏng čiăng ngă. Leh kơ anăn kâo mtrŭt mjhar mkŏ mjing êpul hgŭm bruă êdam êra ƀuôn hgŭm. Hdră bi hmô anei mâo ngă truh kơ ară anei, đru mđĭ klei thâo săng hlăm bruă răng mgang wăl hdĭp mda. Hmei ară anei hlăk dôk ngă hwai djah 5 blư̆ hlăm sa hrue kăm, grăp blư̆ hwai mâo hlăm brô 3 tôn djah. Hmei ăt mđrăm mbĭt hŏng mnuih ƀuôn sang ngă lu mta bruă: Hwai bi mdoh pin êa, bi mdoh sang phung knŭk kna dlăng ba, đru mnuih ƀuôn sang nao ngă kak asei, lehanăưn mkŏ mjing êpul tông čing mda asei čiăng bi kriê pioh knhuah gru dhar kreh djuê ana pô.

Mơ̆ng leh thâo păn kjăp klei phung êdam êra čiăng, leh kơ anăn mkŏ mjing êpul hrăm mbĭt bi mă bruă lehanăn ƀrư̆ ƀrư̆ bi mguôp mơ̆ng ƀuôn anei kơ ƀuôn adih, Y H’Lý mâo mkŏ mjing leh kdrông mkŏ kjăp plah wah êdam êra hŏng êpul hgŭm bruă êdam êra, êpul êya mkăn. Ya mta bruă êdam êra ba anăp kyua ƀuôn sang mâo lŏ bi lar hlue si thŭn mlan. Mâo lu phung mda asei dưi mđĭ ai, iêo ba tui hriăm, lehanăn đĭ kyar. Klei năng mpŭ êdi mơ̆ng Y Hlý Niê Kdăm lŏ bi lar truh hŏng phung mda asei ti Čư̆ Pơ̆ng kơ klei thâo khăp hriăm êmuh , hur har, hdĭp jih ai tiê kyua mnuih ƀuôn sang, ba anăp nanao hlăm djăp mta bruă. H El Niê, Ƀuôn Săm A, ƀuôn hgŭm Čư̆ Pơ̆ng, čar Dak Lak lač:“Y Hly jing anak mơ̆ng ƀuôn sang, mâo nanao ai tiê lehanăn klei ngă bruă kyua klei mđĭ kyar ƀuôn sang, dơ̆ng mơ̆ng bruă điêt hwai djah, hlŏng truh kơ bruă prŏng bi mlih klei mĭn mnuih ƀuôn sang. Ñu jing nanao mnuih ba anăp hlăm jih jang bruă yang ƀuôn ti alŭ wăl. Klei thâo duh myơr mơ̆ng Y Hly kčŭt leh ai tiê jih jang mnuih. Mnuih ƀuôn sang hlăm ƀuôn mpŭ sơăi kơ ñu, boh nik phung êdam êra. Ñu amâo mâo djŏ knŏng thâo săng kơ dŭm klei dleh dlan ƀiădah lŏ jing mnuih ktrâo atăt, ba êlan êlâo kơ hđeh gưl êdei tui hlue êlan jăk hĭn.

Kriê pioh nanao knhuah hdĭp hlăm ƀuôn sang, jing kriê pioh knhuah gru dhar kreh – ƀiădah kčưm tal êlâo mơ̆ng wăl anôk hdĭp mda, hlŏng truh kơ klei mưng hlăm grăp hrue. Êkei êdam Ê Đê Y Hlý Niê Kdăm lač, mơ̆ng dŭm bruă ngă điêt, ƀiă dah mâo mjuăt bi hriăm hŏng klei bhiăn kjăp snăn kơh yang ƀuôn mâo klei thâo săng:Kâo đăo hlăm grăp čô phung mda asei mâo sơăi bruă klam hlăm klei rŭ mdơ̆ng yang ƀuôn. Hmei jing kdrông, jing pô ba hriê dhar kreh jăk siam mơ̆ng djuê ana pô truh hŏng tar rŏng lăn. Kyuanăn, kâo čang hmăng mah jiăng mâo nanao klei thâo gĭr hriăm êmuh, ba yua klei keh knhâo, kdrăp mrâo hlăm klei mă bruă, lehanăn mđing hmư̆ klei mtô mơ̆ng mnuih nao êlâo, ñĕ đuĕ kơ klei soh jhat hlăm yang ƀuôn./.