Ti krah adiê mđiă ktang, Y H’Xuân – Khua dlăng bruă Đảng hlŏng ngă Khua ƀuôn Kon H’Ring, ƀuôn hgŭm Đăk Tô, čar Quảng Ngãi nao ti sang amai Y Nai čiăng mtrŭt mjhar anak čô nao sang hră. Amai Y Nai, brei thâo, amâo djŏ knŏng hjăn gŏ sang ñu ôh, ƀiădah H’Xuân mđing uêñ jih ai tiê kơ klei hdĭp grăp gŏ sang mnuih ƀuôn sang ti Kon H’Ring:

‘’ Y H’Xuân jing sa čô knuă druh bi hmô, ñu mtrŭt mjhar mnuih ƀuôn sang leh anăn hâo hưn mtô mblang kơ mnuih ƀuôn sang hlăm alŭ mđĭ kyar bruă duh mkra, mtô anak čô. Ñu jing sa čô bi hmô kơ mnuih ƀuôn sang hlăm alŭ hmei tui hlue, tui hriăm čiăng êdei anei hmei bi hmô kơ anak čô pô”.

Hŏng klei mtrŭt mjhar leh anăn bi hmô mơ̆ng Y H’Xuân, jih jang anak čô mnuih djuê ƀiă ti Kon H’ring nao ti sang hră djăp ênŭm. Ñu brei thâo “čiăng tlaih ƀun klă sĭt snăn brei hriăm hră. Mâo klei thâo kơh dưi ƀuh klei mrâo mrang, hriăm klei mrâo”. Ăt kyua klei hriăm hră mơar mơh klei hdĭp mnuih ƀuôn sang hlăm alŭ ƀrư̆ bi mlih trei mđao.

Alŭ Kon Hring mâo êbeh 400 gŏ êsei, lu jing mnuih djuê ƀiă Sêdang,  ară anei knŏng dôk 6 gŏ êsei ƀun leh anăn 7 gŏ êsei giăm ƀun. Hŏng klei knŭk kna đru, ară anei jing jang dŭm gŏ êsei hlăm alŭ mâo leh sang dôk kjăp, hơĭt ai tiê mă bruă mkra mjing.

Yăl dliê kơ klei tlaih ƀun mnuih ƀuôn sang, Y H’Xuân, mnuih leh giăm 20 thŭn ngă khua ƀuôn, khua dlăng bruă Đảng alŭ Kon H’Ring, brei thâo:

‘’ Kâo mtrŭt mjhar nanao mnuih ƀuôn sang mkŏ mjing krĭng ƀuôn sang  mrâo, bi mlih klei hdĭp mda, pưk sang brei mkra mnư̆ mnang leh anăn doh, êlan ƀuôn sang brei pla mnga čiăng bi msiam kơ ƀuôn sang pô. Kâo mtrŭt mjhar mnuih ƀuôn sang bi mlih “klei mĭn, hdră ngă” lui hĕ klei ngă bruă duh mkra kthŭl mluk msĕ si êlâo dih. Hlăk đưm mnuih ƀuôn sang ngă pưk hma sa yan đuč, ară anei ngă dua yan hlăm thŭn. Lăn hma snăn bi mlih ana pla mjing. Hlăm war sang leh anăn pưk hma mnuh ƀuôn sang pla ana pla mjing mâo ênoh yuôm čiăng mđĭ prăk hrui wĭt. Hlăm alŭ ară anei bi mlih leh lu, ênuk mda asei ară anei gĭr kriăng kriê dlăng mă bruă knuă, bi lông ktưn ngă bruă duh mkra, lu gŏ sang blei êdeh p’phŭt, êdeh kai, masin tăp kphê, grăp boh sang blei lu mnơ̆ng dhơ̆ng kơ bruă pưk hma.”

Lač kơ mniê khua dlăng bruă Đảng Y H’Xuân, Lê Thị Kim Hiển –  Khua adŭ bruă dhar kreh ala ƀuôn ƀuôn hgŭm Đăk Tô, čar Quảng Ngãi,  brei thâo, anei jing sa čô kriăng hriăm leh anăn jih ai tiê hŏng bruă knuă. Y H’Xuân jing sa čô hlăm ƀiă knuă druh mnuih djuê ƀiă ti alŭ wăl khua thŭn ƀiădah thâo yua hla pŏk web ala ƀuôn Zalo čiăng bi trông kơ bruă knuă.  Dŭm hdră bruă mơ̆ng ƀuôn hgŭm pŏk ngă ti alŭ Kon H’Ring dưi ngă pral, găl ênưih. Lê Thị Kim Hiển, brei thâo:

‘’ Y H’Xuân jing sa hlăm dŭm phung êdah êdi hlăm êpul. Mrâo êgao alŭ Kon H’Ring mâo Klei bi kƀĭn bi lông ktưn khăp kơ ala čar ti ƀuôn hgŭm yap jing alŭ mâo lu klei đru mguôp hlăm hdră mđĭ kyar bruă duh mkra krĭng mnuih djuê ƀiă wưng 2020 – 2025.  Hjăn ñu ăy mâo klei bi mni hlăm klei bi kƀĭn, jing đảng viên bi hmô ngă jăk bruă hâo hưn mtrŭt mjhar mnuih ƀuôn sang mđĭ kyar bruă duh mkra”.

Hŏng ai tiê đua klam, bi hmô ba anăp mơ̆ng sa čô đang viên, Y H’Xuân jing anôk knang hŏng mnuih Sêdang ti Kon H’ring, đru mđĭ kyar bruă duh mkra ala ƀuôn, bi mlih  ƀô̆ mta krĭng ƀuôn sang, đru kơ mnuih ƀuôn sang mâo klei hdĭp trei mđao.