Thŭn 2022, leh mdei jih thŭn ngă Khua Êpul hgŭm ƀĭng lŏ hma ƀuôn hgŭm Quảng Trực, Điểu Dray lŏ dơ̆ng djŏ ruah K’iăng Khua dlăng bruă Đảng, Khua ƀuôn Bu Prăng1, hlŏng ngă K’iăng Khua êpul čŏng ksiêm dlăng êlan knông lăn. Hlăm djăp bruă, ñu mđĭ nanao ai tiê đua klam,  jih ai tiê kyua êpul êya.

          Hlăm klei mă bruă mkra mjing, Điểu Dray jing pô ba anăp hlăm klei mlih mrô ana pla mjing, mkra mđĭ đang pla mjing, ba klei tŭ dưn bruă duh mkra lu. Thŭn 2010, Hdră mtrŭt mjhar bruă lŏ hma ala čar ba ana măk ka pla ti krĭng knông lăn Quảng Trực.  Hlăk êjai lu gŏ êsei dôk huĭ, snăn gŏ sang Điểu Drây pla êbeh 1 ha măk ka. Klei tŭ jing tal êlâo, gŏ sang ñu pŏk mlar ênhă pla mjing măk ka mbĭt hŏng kphê, tiu. Khua mduôn Điểu Dray brei thâo:

“Ară anei, ênhă măk ka  gŏ sang kâo 8 ha, hlăm anăn 1,5 ha dôk pĕ boh, 1 thŭn pĕ dua blư̆, grăp blư̆ mâo hlăm brô 2 ton, ênoh čhĭ hlăm brô 70 êklăk prăk/ton hlăm yan mlan 3-4, bi yan phŭn (mlan 9-10) jing ênoh yuôm hĭn.”

Čiăng mkra mjing kjăp, gŏ sang Điểu Drây hgŭm hlăm Êpul hgŭm bruă lŏ hma ti alŭ wăl. Ñu gĭr hriăm hdră mnêč, hdră kriê dlăng, hrui pĕ, mkra mjing mnơ̆ng dhơ̆ng lŏ hma hlue si hdră kjăp. Ñu ăt mtrŭt mjhar mnuih ƀuôn sang hgŭm hlăm êpul hgŭm bruă čiăng mđĭ kyar bruă duh mkra kjăp.

Truh ară anei, ƀuôn hgŭm Quảng Trực, čar Lâm Đồng mâo leh hlăm brô 1.500 ha măk ka, pŏk klei găl bi mdrŏng kơ ƀĭng lŏ hma, boh nik mnuih djuê ƀiă. Ti bon Bu Prăng 1, mâo dŭm pluh gŏ êsei pla măk ka; lu gŏ sang mâo prăk hrui wĭt grăp thŭn dŭm êtuh êklăk prăk. Đoàn Lê Anh – Khua Knơ̆ng bruă mặt trận să Quảng Trực brei thâo, čiăng mâo krĭng pla mjing măk ka msĕ si ară anei, mâo klei đru mguôp yuôm bhăn mơ̆ng Khua mduôn Điểu Dray.

 “Điểu Dray jing Khua mduôn khua mduôn mâo kơhưm, tuôm jing Khua Êpul hgŭm ƀĭng lŏ hma să, kyua anăn bruă hâo hưn mtô mblang, mtô bi hriăm bruă lŏ hma mâo mnuih ƀuôn sang đăo knang. Ñu ăt tuôm hgŭm pla mjing măk ka tal êlâo ti Bu Prăng 1, Bu Prăng 2, mơ̆ng anăn mnuih ƀuôn sang hlue ngă, đru kơ dŭm ƀuôn sang knông lăn ƀrư̆ bi mlih jăk siam.”

Amâo djŏ knŏng ba anăp hlăm bruă mkra mjing ôh, Khua mduôn Điểu Dray lŏ mđing uêñ kriê pioh leh anăn mđĭ lar knhuah dhar kreh djuê ana Mnông. Mrâo êgao, leh ruĕ yan hrui êmiêt, mnuih Mnông ti Quảng Trực mkŏ mjing Knăm mơak yan mrâo hlăm ênai čing kdrăm kơah. Khua mduôn Điểu Dray êdah êdi hlăm kdrăp djuê ana ba anăp êpul tông čing Bu Prăng 1. Thi Sư, knuă druh Adŭ bruă dhar kreh ala ƀuôn să Quảng Trực, hâo hưn: Khua mduôn Điểu Dray hŏng êpul tông čing mâo leh lu klei tŭ dưn hlăm dŭm klei bi lông kdŏ mmuñ ƀuôn sang.

“Ñu jih ai tiê hlăm dŭm bruă ngă ti ƀuôn, jing ƀuôn ba anăp mtrŭt mjhar mnuih ƀuôn sang kriê pioh klei bhiăn. Jing khua êpul tông čing, ñu mkŏ mjing klei mdah hlăm gưl knăm mơak, mjĕ êrô, lŏ mtô kơ phung mda asei leh anăn kriê pioh knhuah djuê ana.”

 Hlăm ktuê knông lăn Quảng Trực, čar Lâm Đồng, Khua mduôn Điểu Drây dưi thâo msĕ si sa klei bi hmô hdĭp. Mlan 6 thŭn dih, ñu mâo  Anôk bruă gĭt gai kahan răng mgang knông lăn bi mni jing “Mnuih mâo kơhưm êdah êdi krĭng knông lăn, plao ksĭ” hlăm hdră “Anôk knang kơ ƀuôn sang”.  Khua mduôn Điểu Drây jing K’iăng  Khua êpul čŏng kriê dlăng êlan knông lăn ti Quảng Trực. Ñu gĭr bi hgŭm hŏng êpul lĭng kahan răng mgang knông lăn hiu ksiêm dlăng, răng mgang knông lăn; khăng hâo hưn mtô mblang kơ mnuih ƀuôn sang amâo hmư̆ klei phung jhat mplư, gĭr hgŭm hlăm hdră “Jih jang mnuih ƀuôn sang hgŭm răng mgang klei dưi lăn čar, klei êđăp ênang knông lăn.” Điểu Minh Nhật, K’iăng Khua Knơ̆ng bruă mặt trận, Khua dlăng bruă êdam êra CS Hồ Chí Minh ƀuôn hgŭm Quảng Trực brei thâo, Khua mduôn Điểu Dray jing klei bi hmô êdah êdi kơ phung mda asei tui hlue.

“Êpul êdam êra bi hgŭm hŏng dŭm ƀuôn, êpul răng mgang knông lăn hŏng Kđông kahan răng mgang knông lăn kriê pioh klei êđăp ênang krĭng knông lăn. Khua mduôn Drây lŏ bi hgŭm hŏng Êpul êdam êra ƀuôn hgŭm mkŏ mjing klei bi lông tông čing čhar, hâo hưn kơ phung êdam êra kriê pioh dhar kreh, hlue ngă klei bhiăn, răng mgang dliê, amâo hmư̆ ôh klei arăng mplư hiu mă bruă soh hŏng hdră bhiăn…”

Dŭm klei gĭr Khua mduôn Điểu Drây đru leh bon Bu Prăng 1, ƀuôn hgŭm knông lăn Quảng Trực ( Lâm Đồng) kriê pioh klei êđăp ênang, mđĭ kyar bruă duh mkra, knhuah dhar kreh. Ñu pô lu blư̆ mâo knŭk kna leh anăn êpul kahan răng mgang knông lăn bi mni kyua boh tŭ êdah êdi hlăm bruă mtrŭt mjhar mnuih ƀuôn sang, mkŏ mkra krĭng ƀuôn sang mrâo leh anăn răng mgang knông lăn.